Sieepektibo a Panangusar Kadagiti Broshur iti Agosto
1 Tapno mapapartak ti panagaramid iti disipulo a trabaho, inyabasto ti organisasion dagiti adu a broshur maipapan kadagiti masinnunuo a tema, kas iti panggep ti Dios iti daga, ti Trinidad, nagan iti Dios, ti gobierno iti Pagarian, ken ti pammalubos iti Dios ti kinadakes. Kasanotayo a mausar dagiti broshur a sieepektibo?
2 Ti broshur a Pudno Aya a Maseknan ti Dios Kadatayo? ilawlawagna nga ti maysa a baro a lubong a nawayaan iti panagsagaba ket asidegen. Kasanotayo nga iyammo daytoy? Masarakan dagiti singasing idiay Panakirinnason a libro iti baba ti “Panagsagaba,” manipud panid 295, wenno agturongkayo idiay introduksion iti panid 12 ti baba iti paulo nga “Kinaulpit/Panagsagaba.”
3 Mabalinyo a kunaen:
◼ “Natingitingyo kadin: ‘No pudno a ti Dios ket maseknan iti kapadasan dagiti tattao maipapan ti kinaulpit ken panagsagaba?’” Palubosan a sumungbat. Basaen ti Salmo 72:12-14. Kalpasanna iturong iti panid 22 ti broshur a Pudno Aya a Maseknan ti Dios Kadatayo? ken pagsaritaan dagiti paulo idiay paset 10, agraman ti ilustrasion iti panid 23. No agkedkedda iti broshur, itukon ti maysa a tract, kas iti Liwliwa Kadagiti Malmaldaang wenno Biag iti Maysa a Natalna a Baro a Lubong.
4 Ti naimbag a gobierno isut’ dakkel a pakaseknan kadagitoy nga aldaw. Adu ti agduadua no ti turay iti tao ket mapagkaykaysana ti lubong. Nasayaat nga impormasion ti masarakan iti baba ti “Gobierno,” a mangrugi iti panid 154 ti Panakirinnason a libro.
5 Mabalinyo nga isaludsod:
◼ “Mabalin kadi dagiti tattao nga ipasdek ti maysa a gobierno a mangyeg iti manayon a ragsak?” Palubosan a sumungbat, sa isaludsod: “Ania ti ipakita iti rekord ti natauan nga historia?” Iturong idiay Jeremias 10:23, wenno itudo iti panid 155 ken basaen ti maitutop a teksto ken komento. Kalpasanna maiturong iti pinanid 24 ken 25 iti Gobierno a broshur ken mausig dagiti ilustrasion ken kasuratan. No ti bumalay ket saanna nga alaen ti broshur, tukonanyo iti tract a Daytoy Kadi a Lubong Makalasatto?
6 No adda panagbuteng maipapan ti krimen iti sangakaarubaan, ti sumaruno nga introduksion isut’ makaallukoy.
7 Mabalinyo a kunaen:
◼ “Adu a tattao ti mangikuna, ‘No ti Dios ket ayat, apay a palubosanna iti kinadakes?’ Kasta met kadi ti makunayo?” Palubosan nga agkomento, sa kunaen: “Siputanyo ti pammakdaar iti Proverbio 19:3 a maikontra ti panangpabasol iti Dios kadagiti dakes a bambanag nga ar-aramiden ti tao.” Kalpasan a mabasa ti teksto, iturong iti asikaso idiay panid 15 ti broshur nga “Adtoy! Pagbalinek dagiti Isuamin a Bambanag a Baro” ken basaen iti parapo 27.
8 Ti panangusar kadagiti broshur a pangisuro kadagiti marakarnero a tattao isut’ maysa a banag a maaramidtayo amin. Usarentayo ida a sieepektibo iti Agosto.