Kasanoda a Dumngeg no Ditay Sumarungkar?
1 “Kasano . . . a mangngegdanto no awan ti mangasaba?” (Roma 10:14) Pudno, kasano a maawatanda ti kinapudno no ditay mangaramid ti epektibo a panagsarungkar? Iti daytoy a bulan mabalintayo a sarunuen ti immuna a saritaan babaen iti kanayonan a Nainkasuratan a puntos manipud aniaman a broshur a naipaima, ket dayta ti mangiturong iti panagadal ti Biblia.
2 No nakaipaimakayo iti broshur nga “Ania ti Panggep ti Biag?, mabalinyo nga iturong iti panagadal ti Biblia iti kastoy. Mabalinyo a kunaen:
◼ “Kayatyo kadi agraman pamiliayo ti agbiag iti maysa a lubong a kas nailadawan ditoy panid 30 iti broshur a naibatik kadakayo? [Ipakita ti ilustrasion ken palubosan a sumungbat.] Amintayo ti agtarigagay iti daytoy, nupay adu dagiti agdudua a pumudno daytoy. Iti Dios, daytoy ket saan nga imposible.” Iturong iti panid 29 ken basaen ti Salmo 145:16 manipud parapo 1. Itultuloy a malawagan dagiti sumaruno a parapo, ken maigay-at ti panagadal iti Biblia. Maiyurnos ti panagsarungkar iti mabiit tapno maituloy ti diskusion.
3 No agsarungkarkayo kalpasan a maipaima ti broshur a “Pudno Aya a Maseknan ti Dios Kadatayo?,” nalabit a ti kaasping daytoy ti epektibo:
◼ “Idi napalabas a sarungkarko, napagsaritaantayo ti saludsod nga, Pudno aya a maseknan ti Dios kadatayo? Ti pagarupyo maseknan ngata ti Dios kadatayo a mangyeg iti panagngudo ti panagsagaba ken ranggas? [Palubosan a sumungbat. Kalpasanna maiturong iti paset 10 iti broshur idiay panid 22, ken maitultuloy.] Inkari ti Dios a suktanna daytoy dakes a lubong iti maysa a baro a pagtaengan dagiti nalinteg a tattao a mabalinda ti agbiag a sitatalna. [Basaen ti Salmo 37:11.] Siak ken dakayo ti agsagrap iti biag iti dayta a baro a lubong no patientayo ti Biblia ken alagaden dagiti pammagbagana.” Mailawlawag ti panagadal iti Biblia a programatayo.
4 No sumarungkarkayo kalpasan a naipaima iti broshur nga “Adtoy! Pagbalinek Dagiti Isuamin a Bambanag a Baro,” mabalinyo a rugian babaen ti panangipakita iti ladawan iti akkub sa maisaludsod:
◼ “Ania ti pagarupyo a kasasaad iti panagbiag iti maysa a perpekto a lubong? [Pagkomentuen ti bumalay.] No ania ti makitayo iti daytoy a ladawan ket saan laeng nga arapaap; naibasar daytoy iti sigurado a kari a naisawang ti Biblia. [Basaen ti Apocalipsis 21:4 ken Salmo 37:11, 29.] Kayatko nga ilawlawag no kasano agraman ti pamiliayo a masagrap daytoy a bendision.” No ipamatmat ti bumalay ti interes, maitultuloy ti diskusion, ken maitukon iti panagadal ti Biblia.
5 No makasaraktayo iti tattao nga agsapsapul ti kinapudno, ipakita ti napudno nga ayat babaen ti panagsarungkar a tumulong pay kadakuada. Ti kinapudno a naitalek kadatayo ti mangsalbar kadatayo ken kadagidiay mangipangag kadatayo.—1 Tim. 4:16.