Tulongan Dagiti Dadduma a Mangadal iti Kinapudno
1 Immay ni Jesus ditoy daga tapno saksianna ti kinapudno. Sinanayna dagiti disipulona nga agbalin a mannursuro. Inyarigna ida a kas ‘dagiti manangisuro iti publiko’ nga addaan ti nawadwad a naipempen a gameng a mabalin a magun-odan. (Mat. 13:52) Dagiti disipulo ni Jesus ita ti mangusar iti naimaldit a publikasion tapno mapapartak ti panangikasaba ti Pagarian a trabaho. Kas ehemplo, addaantayo ti nagduduma a broshur a tumulong iti dadduma nga agbalin nga adalan. Kasanotayo a mausar dagitoy a napapateg nga instrumento?
2 Tapno mairugi ti saritaan a mangiturong iti pannakaitukon ti broshur nga “Adtoy! Pagbalinek dagiti Isuamin a Bambanag a Baro,” mabalinyo nga isaludsod:
◼ “Masdaawkayo kadi nga iti sidong ti amin a pamuspusan ti tao, ti namnama a maipaay iti masakbayan ket agparang a nalidem? [Palubosan a sumungbat.] Ilawlawag ti Biblia no apay a dagiti adu a pamuspusan ket natungdayda.” Basaen ti Salmo 146:3, 4. Iturong idiay parapo 43 ti broshur ken basaen dagiti umuna a tallo a sentensia. Kalpasanna mailawlawag ti natalna a gobierno ti Dios manipud parapo 43 ken 44, kas nailadawan iti sango ken likud nga akkub ti Adtoy! a broshur.
3 Adtoy ti maysa a wagas a mabalinyo a pangusaran iti broshur a “Pudno Aya a Maseknan ti Dios Kadatayo?”:
◼ “Adu a tattao ti nangisaludsod kadagitoy saludsod iti akkub daytoy a broshur. [Basaen dagiti saludsod.] Idinto ta ti naayat a Dios ket saanna nga itandudo nga agpadpada ti naimbag ken dakes iti isu met laeng a tiempo, ania ti pagarupyo iti karina ditoy Isaias 65:21, 22?” No maipakita ti interes, iturong iti pinanid 26 ken 27, parapo 19-22, ken ilawlawag no ania ti maibanag iti Pagarian ti Dios.
4 No itukon ti broshur nga “Ania ti Panggep ti Biag?,” mabalinyo a kunaen:
◼ “Kadagiti adu, agminar nga awan panggep ti biag. Ania ti pagarupyo a kasapulan tapno adda kaeskan ti panagbiag? [Palubosan ti bumalay nga agkomento.] Ipakita ti Biblia a nangisagana ti Dios iti nasaysayaat a bambanag nga agpaay kadatayo. Kitaenyo ti kunaenna ditoy Apocalipsis 21:4, 5.” No maiparbeng, itultuloy ti diskusion kadagiti puntos manipud paset 8 iti broshur idiay pinanid 29 ken 30.
5 No usaren ti broshur a “Tagiragsakenyo ti Biag nga Agnanayon Ditoy Daga!,” ti agtutubo nga agibumbunannag mabalinna nga isaludsod:
◼ “Kayatyo kadi ti agbiag iti maysa a paraiso a daga a kas iti daytoy? [Ipakita ti parupa ken palikud nga akkub, ken palubosan nga agkomento.] Ti pamiliak ken siak ket kumitkita iti masakbayan nga agbiag sadiay gapu iti nakuna ti Biblia iti Juan 17:3.” Kalpasanna mabalin a maitukon ti broshur.
6 No agusarkayo ti sabsabali a broshur iti ministerioyo iti daytoy a bulan, mabalinyo nga ipadron dagiti panangiparangyo kadagiti singasing ditoy ngato. Laglagipenyo nga ababa ken positibokayo a mangriing iti interes dagiti bumalay.
7 Inted ni Jehova kadatayo ti kinapudno. Iranudtayo met iti dadduma, agpadpada iti namaldit a porma ken ti pannakisaritatayo. Iti kastoy a wagas mapatalgedan a manangisurotayo iti publiko a maipaay a pagimbagan dagiti dadduma.—Mat. 28:19, 20.