Naikkan iti Adu—Adu ti Makalikaguman
1 Anian a pabor iti kaadda ti kinapudno kadatayo! Gapu iti dedikasiontayo ken Jehova, naitalek kadatayo ti naimbag a damag. (1 Tes. 2:4) Daytoy ti mangilugar kadatayo iti dakdakkel a responsabilidad. Kinuna ni Jesus: “Tunggal maysa a naikkan iti adu, adunto ti makalikaguman kenkuana.”—Luc. 12:48b.
2 Anian ti kinapudno dagita a sasao! Kas nabendisionan iti pannakaammo iti Sao ti Dios, nakaskasdaaw a panagkakabsat, ken nakaskasdaaw a namnama, sigurado a nawadwad ti naited kadatayo. Nainrasonan, nawadwad met ti makalikaguman kadatayo.
3 Salimetmetan ti Umiso a Panangmatmat Kadagiti Kasapulan: Kunaen ti dadduma nga adu unay ti makiddaw kadatayo. Kas Ulo ti kongregasion Kristiano, inkeddeng ni Jesu-Kristo no ‘ania ti kasapulan’ tapno umiso ti panagtignayna. (Efe. 4:15, 16) Impasigurona a ‘ti sangolna ket naasi ken nalag-an ti awitna.’ (Mat. 11:28-30) Siaayat a mangted ti pawayway kadagidiay adda limitasionda. (Luc. 21:1-4) No ipaay ti kasayaatantayo, aniaman ti gatadna, mabendisionantayto.—Col. 3:23, 24.
4 Isaludsodyo iti bagiyo, ‘Dagiti kadi interes iti Pagarian ti umuna iti biagko? Us-usarek aya ti tiempo ken sanikuak a mangidayaw iti nagan ti Dios ket magunggonaan dagiti dadduma? Magunggun-odak kadi ti kadakkelan a ragsak iti panagserbi ken Jehova imbes nga agrag-oak iti material a bambanag?’ Ti napudno a sungbattayo kadagitoy a salsaludsod ipalgakda ti motibo dagiti pusotayo.—Luc. 6:45.
5 Liklikan ti Masulisog nga Agaramid iti Dakes: Nakarkaro ita ngem idi ti kaadda dagiti pagduyosan nga agturong iti bukod nga interes, kinaagum, ken ayat ti kinaderrep. Inaldaw a mapasanguantayo kadagiti sulisog a makikompromiso. Tapno masaranget dagitoy a sibaballigi, masapul a dawatentayo ken Jehova a saranayennatayo. (Mat. 26:41) Babaen ti espirituna, papigsaennatayo. (Isa. 40:29) Dakkel met ti akmen ti panangdisiplina ti bagi ken ti panagteppel.—1 Cor. 9:27.
6 Saan nga umdas ti panagayat iti naimbag, masapul met a guraentayo ti dakes. (Sal. 97:10) Inlista ti Proverbio 6:16-19 dagiti pito a bambanag a kagura ni Jehova. Nabatad a ti maysa a mangparagsak ken Jehova masapul a guraenna met dagita a bambanag.
7 Maitutop unay ti agkararag a maipaay kadagiti sirkumstansia a kanayon a mangipalubos “nga aduan[tayo] ti aramiden iti trabaho ti Apo.” (1 Cor. 15:58) Adu ti nakapadas a ti kinakupado iti iskediul a maipaay ti serbisio ken Jehova ket maysa a salaknib agsipud ta kissayanna iti tiempo a mangaramid kadagiti awan kaes-eskanna a bambanag.
8 Amin dagiti nausig a bambanag, no ania ti kalikaguman ni Jehova kadatayo ket nainrasonan unay. (Mik. 6:8) Gapuna a di koma agsarday nga “agtartrabahotayo a sipipinget ken umag-agawatayo,” a sitatalek a ti gunggonatayo ket di marukod no maidilig iti makiddaw kadatayo.—1 Tim. 4:10.