Saganaan ken Tagiragsaken Dagiti Gimong ti Kongregasion
1 Kas timpuyog dagiti agkakabsat, nainsiriban ti agtataripnong a kanayon kadagiti linawas a gimongtayo. (1 Tim. 4:15, 16) Kasanotayo a matagiragsak ken masagrap ti kasayaatan a gunggona kadagitoy?
2 Mangilasin koma iti tiempo iti regular a panagsagana a maipaay kadagiti gimong. Uray kasano ti kaokupadotayo, nainsiriban nga iwayaan ti panagsagana kadagiti gimong. Ti panagsagana a sangapamiliaan ket makagunggona unay.—Efe. 5:15, 16.
3 Maipaay iti Teokratiko nga Eskuelaan ti Panagministro: Ikagumaanyo ti makidanggay iti linawas nga eskediul ti panagbasa iti Biblia. (Jos. 1:8) Repasuenyo ti material a masaklaw, ken itugotyo dagiti kasapulan a publikasion tapno mabalinyo a suroten dagiti agpalawag.
4 Maipaay iti Gimong ti Serbisio: Kitaenyo ti naibalabala a programa idiay Ti Ministeriotayo iti Pagarian. Basaenyo dagiti artikulo a mapagsasaritaan. No ti material a mausig ket aggapu iti artikulo ti Pagwanawanan, kitaenyo dayta ken basaenyo met. No maidemostra dagiti parang maipaay iti tay-ak ti serbisio, repasuenyo dagitoy a nasaksakbay tapno sidadaan nga usarenyo ida iti ministerioyo.
5 Maipaay iti Panagadal ti Pagwanawanan: Basaenyo a nasaksakbay ti leksion, nga imutektekanyo dagiti sungbat ti salsaludsod. Kitaenyo dagiti naisitar a kasuratan. Utobenyo no kasano a maisinggalut ti leksion kadagidiay dati nga ammoyon. Mangisaganakayo iti ababa a komento iti maysa wenno dua a parapo. Nasken daytoy a wagas tapno maaramid “ti publiko a panangideklara iti namnamatayo.”—Heb. 10:23.
6 Maipaay iti Panagadal ti Libro iti Kongregasion: Umuna, pindaen ti material; usigen ti paulo ti kapitulo ken subtitulo. Imutektekanyo dagiti panulbek nga ideya. Repasuenyo dagiti mangsuportar a bersikulo ti Biblia. Padasenyo a sungbatan dagiti saludsod iti bukodyo a sasao. Kalpasanna repasuenyo ti leksion iti panunotyo.—2 Tim. 2:15.
7 Tagiragsakenyo Dagiti Gimong: Tapno matagiragsakyo a naan-anay dagiti gimong, nasken a mairugiyo ida tapno makiraman iti panglukat a kanta ken kararag, a kiddawen ti espiritu ni Jehova. No awan ti babassit nga ubbing a taripatuenyo, nasaysayaat no agtugawkayo iti asideg ti sango a sadiay awan unay ti makasinga. Dagiti nagannak nga addaan babassit nga annak a masapul a mairuar bayat iti gimong ti saan unay a makasinga no agtugawda iti asideg ti pagnaan nga agturong iti likud.
8 Isaparyo ti aginana bassit sakbay a makigimongkayo tapno naridam ken naalibtakkayo. Ti panangkita kadagiti kasuratan a mabasa tulongannakay a manglagip no ania ti nangngegyo. Isaritayo iti pamilia ken gagayyemyo maipapan iti maadalyo. Ti panangyaplikar kadagitoy a singasing pagbalinenna nga ad-adda a makaay-ayo dagiti gimong, ket pudno a “mangparegta [kadatayo] iti ayat ken nasayaat nga ar-aramid.”—Heb. 10:24, 25.