Saludsod

◼ Ania ti nasken a pagannadan no makilanglangentayo kadagiti kasungani a sekso iti ministeriotayo?

Manamnamatayo a kalikaguman dagiti kakabsattayo a suroten ti kangatuan a pagalagadan iti moral iti personal a konduktada. Nupay kasta, agbibiagtayo iti narugit a lubong a bassit ti pagbeddenganna iti moral. Nupay mabalin a nakasaysayaat ti panggeptayo, masapul nga agannadtayo a kanayon tapno saantayo a makapataud iti pakababalawan wenno makaaramid iti di umiso. Ramanen daytoy ti panagannad bayat a makipaspasettayo iti ministerio.

Iti panagserbi iti tay-ak masansan a makasaraktayo kadagiti tattao iti kasungani a sekso a mangipakita iti kasla napasnek a panaginteres iti kinapudno. No datdatayo ti simmarungkar ket awan sabali iti pagtaengan, gagangay a nasaysayaat a kasabaan iti ruangan imbes a sumrek. No aginteres, mayurnos ti panagsubli inton adda kakuyogtayo a maysa pay nga agibumbunannag wenno inton adda sabali pay a kaduana iti balayda. No saan a posible daytoy, nainsiriban nga ipabiang ti panagsarungkar iti agibumbunannag a kapadana iti sekso. Agaplikar met daytoy iti panangyadal iti Biblia iti kasungani a sekso.—Mat. 10:16.

Masapul nga agannadtayo iti panagpili iti kaduatayo nga agtrabaho iti ministerio. Nupay mabalin nga agkuyog no dadduma dagiti agibumbunannag iti agkasungani a sekso, nasaysayaat a maaramid daytoy no kaduada ti grupo. Kadawyanna, uray kabayatan nga addatayo iti ministerio, saan a nainsiriban ti mabayag a pannakikuyogtayo a datdatayo laeng iti kasungani a sekso a saantayo nga asawa. Gapuna, rumbeng nga agpanunot a naimbag ti kabsat a mangidaulo iti grupo ti serbisio bayat a pagkakaduaenna dagiti agibumbunannag a mangasaba, a pakairamanan dagiti tin-edyer.

Babaen ti kanayon a panangusig a naimbag, maliklikantayo ti ‘mangted iti aniaman a pakaigapuan ti pannakaitibkol’ kadatayo man a mismo wenno iti sabsabali.—2 Cor. 6:3.