Ti Teokratiko nga Eskuelaan ti Panagministro Para iti 1998
Ti ageskuela kayatna a sawen “masursuruan wenno masanay iti espesipiko a pannakaammo wenno paglaingan.” Babaen iti Teokratiko nga Eskuelaan iti Panagministro, naynay a masursuruantayo iti pannakaammo ti Dios. Kasta met, ti pannakipasettayo iti daytoy nga eskuelaan palaingennatayo nga agsao ken mangisuro. Ti programa ti eskuelaan para iti 1998 ipaayannatayo iti adu a gundaway a rumang-ay pay iti naespirituan.
No kitaenyo a naimbag ti eskediul ti eskuelaan iti sumaganad a tawen, madlawyo a pasaray maibasar ti Paset Num. 3 iti maysa a karakter iti Biblia a masarakan kadagiti tomo ti Insight. Kasta met, nainayon iti kurikulum para iti 1998 ti libro a Kinaragsak iti Pamilia, ken in-inut a saklawen dayta dagiti Paset Num. 3 ken Num. 4. No ti libro a Kinaragsak iti Pamilia ti pakaibasaran ti Paset Num. 4, rumbeng nga ipaay dayta ti kabsat a lalaki kas palawag iti kongregasion. Ket, kas palagip, awan koma ti lumbes iti oras iti programa ti eskuelaan.
Baro a Paset: Para iti personal a pagimbagantayo, naipaay ti “Kanayonan nga Eskediul ti Panagbasa iti Biblia” a masarakan kadagiti bracket kalpasan ti numero a kantaen iti kada lawas. Nupay awan maibasar iti dayta a paspaset iti linawas a programa ti eskuelaan, pagbalinenyo a kalat a suroten dayta. Daytoy ti tumulong kadakayo tapno mayugaliyo ti agbasa iti Biblia iti inaldaw no saanyo pay nga ar-aramiden ti kasta.
Para iti ad-adu pay nga impormasion maipapan kadagiti paset, balakad, ken naisurat a repaso, pangngaasiyo ta basaenyo a naimbag dagiti instruksion a masarakan iti “Eskediul iti Teokratiko nga Eskuelaan ti Panagministro Para iti 1998,” kasta met ti panid 3 ti Oktubre 1996 a Ministeriotayo iti Pagarian.
No dikay pay nakapagpasalista iti Teokratiko nga Eskuelaan ti Panagministro, awisendakayo nga agpasalista itan. Daytoy naisalsalumina nga eskuelaan agtultuloy ti nagpateg nga akemna a mangsanay kadagiti napakumbaba ken napasnek nga adipen ni Jehova tapno ad-adda a makualipikarda kas ministrona.—1 Tim. 4:13-16.