Ti Kinapudno Maipapan iti Masanguanan
Pampanunotem kadi no ania ti mapasamak iti masanguanan? Ibaga ti Biblia nga adda dagiti asidegen a dadakkel a pasamak a mangapektar iti amin a tao ditoy daga.
Imbaga ni Jesus no kasanotayo a ‘masigurado nga asidegen ti Pagarian ti Dios.’ (Lucas 21:31) Impadtona nga addanto dagiti dadakkel a gubat, napigsa a ginggined, bisin, ken makapapatay a sakit—dagita ti makitkitatayo nga eksakto a mapaspasamak ita.—Lucas 21:10-17.
Ipakita pay ti Biblia a ti pagilasinan ti “maudi nga al-aldaw” ti panangituray ti tao ket ti dumakdakes a kababalin ti tattao. Mabasam dagita iti 2 Timoteo 3:1-5. No makitkitam ita dagitoy a kababalin ken aramid, sigurado nga umanamongka a matungtungpalen dayta a padto ti Biblia.
Ania ti kayatna a sawen? Dandanin ti dadakkel a panagbalbaliw nga aramiden ti Pagarian ti Dios a mangpasayaat iti biag ditoy daga. (Lucas 21:36) Iti Biblia, nagsasayaat dagiti ikarkari ti Dios para iti daga ken kadagiti tattao nga agyan iti dayta. Dagitoy ti dadduma kadagita.
NASAYAAT NGA AGTURAY
“Naited kenkuana [ni Jesus] ti autoridad nga agturay, dayaw, ken pagarian, tapno agserbi koma kenkuana ti amin a tattao iti nadumaduma a nasion ken lengguahe. Agnanayonto ti panagturayna a saanto nga agpatingga, ket saanto a madadael ti pagarianna.”—DANIEL 7:14.
Ti kaipapananna: Naragsak ti biagmo iti panangituray ti impasdek ti Dios a nangatngato a sangalubongan a gobierno a ti Anakna ti Ari.
NASAYAAT A SALUN-AT
“Awanto ti residente a mangibaga: ‘Masakitak.’”—ISAIAS 33:24.
Ti kaipapananna: Saankanton a pulos nga agsakit wenno mabaldado; agbiagkanto a saanmon a mapadasan ti matay.
TALNA
“Pagsarsardengenna dagiti gubat iti intero a daga.”—SALMO 46:9.
Ti kaipapananna: Awanton ti mapasamak a gubat ken ti amin a rigat nga ibungana.
MAPNO TI DAGA KADAGITI NASAYAAT A TATTAO
“Awanton dagiti managdakdakes . . . Dagiti naemma kukuadanto ti daga.”—SALMO 37:10, 11.
Ti kaipapananna: Awanton dagiti dakes a tattao. Dagiti laeng mayat nga agtulnog iti Dios ti agyan ditoy daga.
AGBALINTO A PARAISO TI INTERO A DAGA
“Mangbangondanto kadagiti balay ket agnaedda kadagita, ken agmuladanto kadagiti ubas ket kanenda ti bungada.”—ISAIAS 65:21, 22.
Ti kaipapananna: Pumintaston ti intero a daga. Tungpalento ti Dios ti ikarkararagtayo a maaramid koma ti pagayatanna “ditoy daga.”—Mateo 6:10.