Eskediul ti Gimong ti Serbisio

Lawas ti Pebrero 11

Kanta 6

12 min: Lokal a pakaammo. Dagiti napili a Pakaammo iti Ministeriotayo iti Pagarian. Paregtaen ti tunggal maysa a basaen wenno repasuenda ti Genesis 6:1 agingga iti 9:19 ken buyaenda ti video a Noah​—He Walked With God kas panagsagana iti maysa a diskusion iti Gimong ti Serbisio iti lawas ti Marso 4.

20 min: ‘Naan-anay nga Ikasabayo ti Sao ti Dios.’a (Parapo 1-13) Imatonan ti mamangulo a manangaywan. Maysa a narayray a diskusion kadagiti kayattayo nga ibanag iti Marso, Abril, ken Mayo. Nasken nga usaren ti tunggal maysa ti kalendario nga adda iti insert tapno makaaramidda iti praktikal nga eskediul ti ad-adu a panangasaba iti Marso. Paregtaen amin dagidiay makapag-auxiliary pioneer iti dayta a bulan. No mausig ti parapo 7-8, paisalaysay dagiti bendision a tinagiragsak dagidiay nagpayunir itay napan a bulan ti Memorial. Ipakaammo a magun-odan dagiti aplikasion para kadagidiay agpalplano nga ag-auxiliary pioneer kalpasan daytoy a gimong ken kalpasan ti gimong no Domingo, Pebrero 17.

13 min: “No Ania ti Ibagayo Maipapan Kadagiti Magasin.” Paisalaysay kadagiti agibumbunannag no kasano a nakatulong kadakuada daytoy a benneg Ti Ministeriotayo iti Pagarian tapno ad-adda a makapagsaganada. Iti dua nga ababa a demostrasion, ipakita no kasano a maipaima ti Pebrero 15 a Pagwanawanan ken ti Pebrero 22 nga Agriingkayo!

Kanta 49 ken pangserra a kararag.

Lawas ti Pebrero 18

Kanta 95

10 min: Lokal a pakaammo. Report ti kuenta.

15 min: “Apay nga Itultuloyyo ti Mangasaba?”b Iti ngudona, manginterbiu iti maysa wenno dua nga agibumbunannag a napinget a mangaskasaba iti adun a tawen. Paisalaysay ti riknada no apay a naanepda iti daytoy a trabaho ken no kasano a nagunggonaanda.

20 min: ‘Naan-anay nga Ikasabayo ti Sao ti Dios.’c (Parapo 14-23) Imatonan ti manangaywan iti serbisio. Idatag ti intero nga eskediul ti panangasaba a naiplano iti Marso. Itampok no kasano a paregtaen dagidiay nagbalin nga inaktibo ken no kasano a tulongan dagiti ubbing ken dagiti iyad-adalan iti Biblia a makualipikar kas di bautisado nga agibumbunannag. Ipakaammo dagiti nagan dagidiay nagpasalista kas auxiliary pioneer iti Marso, ken paregtaen ti ad-adu pay a sikakararag nga usigenda no mabalinda met ti makiraman.

Kanta 143 ken pangserra a kararag.

Lawas ti Pebrero 25

Kanta 174

10 min: Lokal a pakaammo. Idemostra ti dua nga ababa a panangipaima iti magasin—usaren ti maysa ti Marso 1 a Pagwanawanan ken ti maysa ti Marso 8 nga Agriingkayo!

35 min: “Iyap-aplikaryo Kadi ti Naadalyo iti ‘Dagiti Mannursuro iti Sao ti Dios’ a Kombension Distrito?” Pagsasaritaan ti tallaong ti programa ti kombension, nga imatonan ti konduktor ti Panagadal iti Pagwanawanan. Kalpasan ti maysa a minuto nga introduksion, mangipaay iti 10-12 a minuto a panagrepaso iti programa ti kada aldaw. Dakamaten iti ababa dagiti kangrunaan a punto iti kada subtitulo, sa awisen nga agkomento dagiti agdengdengngeg (1) no kasano nga inkagumaanda a mayaplikar ti instruksion, (2) no ania dagiti nagunggonada a nangyaplikar iti dayta, ken (3) no ania ti mariknada a mabalinda pay nga aramiden. Usarenyo dagiti mamagpanunot a saludsod tapno nabiag ti diskusion.

Kanta 151 ken pangserra a kararag.

Lawas ti Marso 4

Kanta 207

5 min: Lokal a pakaammo.

10 min: Usarenyo ti Libro a Pannakaammo a Mangirugi iti Panagadal. Iti Marso, kayattayo nga ikagumaan a makairugi iti panagadal iti Biblia. Apagbiit nga isalaysay ti kapadasan iti Agosto 1998 a Ti Ministeriotayo iti Pagarian, panid 4, parapo 8. No adda nabiit pay a nakairugi iti panagadal iti libro a Pannakaammo babaen ti baro a tract a, Kayatyo Kadi a Maammuan ti Ad-adu Pay Maipapan iti Biblia?, paidemostra no kasanoda a naaramid dayta.

15 min: “Ti Epekto Dagiti Video a Mangipaay iti Panangsaksi.” Pagsasaritaan ti tallaong. Adda walo a video a narepasotayon iti Gimong ti Serbisio. Saludsodenyo kadagiti agibumbunannag no ania dagiti tinagiragsakda a balligi idi impabuyada dagita a video iti sabsabali.

15 min: “Makasursuro ti Tunggal Maysa iti Noah—He Walked With God.” Insigida a pagsasaritaan kadagiti agdengdengngeg ti video a Noah, nga usaren laeng dagiti saludsod nga adda iti kahon iti daytoy a panid. Inton Abril, repasuentayo ti video a Young People Ask—How Can I Make Real Friends? (Tandaanan: Kadagiti kongregasion nga awan ti asinoman nga addaan iti daytoy a video, mabalin nga iparang ti palawag a “Napategka iti Imatang ti Dios,” a naibatay iti Hunio 8, 1999 nga Agriingkayo!, panid 11-13.)

Kanta 215 ken pangserra a kararag.

[Dagiti Footnote]