Mangikeddeng Kadagiti Naespirituan a Kalat
1 Anian a pribilehio ti panangidayaw ken Jehova iti agnanayon! Tapno maragpattayo dayta a kalat, mabalintayo ti mangikeddeng kadagiti naespirituan a kalat uray pay itan ken ikagumaantayo a gun-oden dagitoy. Makatulong daytoy kadatayo a mangusar a nainsiriban iti pigsatayo. (1 Cor. 9:26) Ania dagiti kalat a realistiko kenka?
2 Panagadal iti Biblia: Agsagsaganaka kadi para iti tunggal gimong ti kongregasion? No kasta, adda kadi panawenmo nga agsukimat ken agmennamenna no agad-adalka? Kas pagarigan, no agsagsaganaka para iti linawas a Panagadal iti Pagwanawanan ken Panagadal iti Libro ti Kongregasion, ugedam laeng kadi dagiti sungbat wenno kitaem dagiti nadakamat a kasuratan ken kasta met a mennamennaem ti pannakailawlawagda? Maaramidmo kadi a kalat ti agsukimat iti sumagmamano a punto kada lawas manipud iti paset ti Biblia a naituding a basaen iti Teokratiko nga Eskuelaan ti Panagministro? Ti kasta a panagsukimat kadagiti naespirituan a banag kalikagumanna ti panawen ken panagregget, ngem mangyeg dayta kadagiti nabaknang a gunggona.—Prov. 2:4, 5.
3 Dagiti Gimong ti Kongregasion: Ti sabali pay a kalat ket ti itatabuno a regular iti amin a lima a gimong ti kongregasion. Ti nasapa nga isasangpet tapno makilangen kadagiti kakabsat ken pannakipaset iti panglukat a kanta ken kararag pabilgenna ti espiritu ti kongregasion. Mabalintay met nga ikagumaan ti agkomento iti kada gimong ken pasayaatentayo pay dagitoy. Mabalinmo nga ipakita no kasano a ti maysa a teksto iti parapo ket nainaig iti mapagsarsaritaan wenno no kasano a mayaplikar ti material iti inaldaw a panagbiag.—Heb. 10:24, 25.
4 Tay-ak ti Serbisio: Dakkel ti pagrang-ayan ti ministeriotayo no mangikeddengtayo kadagiti kalat. Adda kadi kalatmo nga oras a busbosen iti panangasaba kada bulan? Nakatulong dayta iti dadduma. Wenno maparang-aymo pay kadi ti dadduma nga aspeto ti ministeriom, kas ti panangusar iti Biblia iti panagbalay-balay, nabungbunga a panagsarungkar, panangikagumaan a makairugi iti panagadal iti Biblia, wenno mas epektibo a panangisuro kadagiti iyad-adalan?
5 Nagannak, parparegtaenyo kadi dagiti annakyo a mangikeddeng kadagiti kalat iti panagserbida ken Jehova? Ipabigbigyo kadakuada a ti panagserbi kas payunir, misionero, wenno kameng ti pamilia ti Bethel ket nagsayaat a pamay-an tapno maipakitada ti nauneg a panagyamanda ken Jehova.—Ecl. 12:1.
6 Bayat nga usigentayo dagiti aktibidadtayo, mangikeddeng kadagiti naespirituan a kalat, ket kalpasanna, ikagumaantayo a ragpaten dagitoy, dakdakkel a rag-o ti masagraptayo iti panagserbitayo ken maparegtatayo dagiti sabsabali.—Roma 1:12.