Panangapresiar Kadagiti Probision ni Jehova
1 Mangipapaay ni Jehova iti probision tapno mapennek dagiti naespirituan a kasapulantayo babaen ti matalek nga “adipen.” (Mat. 24:45-47) Adu kadagitoy a probision ti pakairamanan dagiti libro, Biblia, tomo, video, audiocassette, ken computer disc a mausar iti panagsukimat iti impormasion a mainaig iti Biblia. Pudno a maikunatayo a siwawadwad a maipapaayantayo kadagiti kasapulantayo iti naespirituan a pamay-an!
2 Dakkel ti magastos iti pannakapataud amin dagitoy a probision. Dagitoy a magastos ket supsuportaran ti sangalubongan a panagkakabsat. Pudno unay daytoy nangruna kalpasan ti pannakayussuat ti urnos iti donasion idi tawen 2000, yantangay naan-anay nga agpannuray itan kadagiti boluntario a kontribusion ti pangsupusop kadagitoy a gastos. Ti kasta a naayat nga urnos tulonganna dagiti kakabsat a maaddaan kadagiti kasapulanda kadagiti gimong ken iti panagserbida iti tay-ak nupay mabalin nga addaan dagiti dadduma iti limitado unay a material a sanikua.
3 No Kasanotayo a Makatulong: Mabalintay ti agtignay a maitunos iti balakad ni Pablo a mangiranud kadagiti sabsabali “sigun kadagiti kasapulanda.” (Roma 12:13) No agkontribusiontayo para iti sangalubongan a trabaho, direkta nga iranranudtayo ti adda kadatayo kadagiti kakabsat iti intero a lubong. Gapu ta sipapanunotda iti daytoy, adu ti nangikeddeng a “mangilasin” iti idonarda iti kada lawas wenno kada bulan, a kas iti ar-aramidenda kadagiti magastos iti Kingdom Hall. (1 Cor. 16:2) Iti panangaramidda iti daytoy, ipakpakitada a bigbigenda a dagitoy a pondo ket saan laeng a mausar iti pannakaimaldit dagiti literatura no di ket iti amin a benneg ti sangalubongan a trabaho. Gapuna, saan koma a maibilang ti kontribusiontayo a kas bayad laeng dagiti literatura, no di ket kas tulongtayo iti intero a sangalubongan a trabaho.
4 ‘Naparaburkayo Koma iti Kontribusionyo’: Ipakita dagitoy a sasao ti 2 Corinto 9:13 ti umiso nga espiritu nga adda koma kadatayo. Dagidiay aduan sidadaanda a mangted iti ad-adu ngem kadagiti dadduma tapno dagidiay addaan iti bassit ket matulongan, iti kasta adda ti “panamagpapada.” (2 Cor. 8:14, 15) Napanglaw man wenno nabaknang, no ited ti tunggal maysa ti aniaman a kabaelanna nga ikontribusion maipaay iti sangalubongan a trabaho, inkari ni Jehova nga ibukbokna ti “bendision agingga nga awanen panagkasapulan.” (Mal. 3:10) Paneknekan koma ti tunggal maysa kadatayo a maikaritayo iti kasta a bendision babaen ti personal a panangipakita iti panangapresiar iti amin a nawadwad a probision ni Jehova!