Dagiti Singasing iti Panangitukon iti Pudno Aya a Maseknan ti Dios Kadatayo?
Kalpasan ti panangdakamatmo iti makapaladingit a damag, mabalinmo a kunaen:
“Pinampanunotmo kadin a no talaga a maseknan ti Dios kadatayo, apay nga impalubosna nga agsagaba dagiti tattao? [Palubosam a sumungbat.] Mangipaay daytoy a broshur iti makapnek a sungbat iti dayta a saludsod ken ipakitana no anianto ti aramiden ti Dios iti asidegen a masanguanan. [Ipakitam dagiti ilustrasion iti panid 27, sa basaem ti Salmo 145:16 iti parapo 22.] Kasano ti panangikkat ti Dios iti amin a panagsagaba a mapaspasaran ti sangatauan? Kayatko nga ilawlawag dayta a saludsod iti sumaruno a panagsarungkarko.” Itukonmo ti broshur, ken iyurnosmo ti agsubli.
Iti panagsarungkarmo, mabalinmo a kunaen:
“Idi napalabas nga isasarungkarko, binasata daytoy a teksto. [Basaen wenno adawem ti Salmo 145:16.] Kalpasanna insaludsodko: Kasano ti panangikkat ti Dios iti amin a panagsagaba a mapaspasaran ti sangatauan?” Pairuarmo ti broshurna. Kalpasanna, paukradmo ti panid 27-8 sa pagsaritaanyo ti parapo 23-5. Itukonmo ti panagadal iti Biblia, wenno iyurnosmo a pagsaritaanyo ti parapo 26-7 iti sumaruno nga isasarungkarmo.
Ti agtutubo nga agibumbunannag mabalinna a kunaen:
“Maseknan ti adu nga agtutubo a kas kaniak no anianto ti pagbalinan ti lubong kalpasan ti 10 wenno 15 a tawen. Ania ti pagarupyo a kasasaadto ti biag? [Palubosam a sumungbat.] Dagiti parikut a mapaspasarantayo ita ipasimudaagna nga agbibiagtayon kadagiti maudi nga al-aldaw. [Basaem ti 2 Timoteo 3:1-3.] Mangipaay daytoy a broshur iti sungbat dagiti sumaganad a saludsod. [Basaem dagiti saludsod iti akkub sa itukonmo ti broshur.] Inton agsubliak, no adda gundawayyo uray sumagmamano laeng a minuto, adda makaparagsak a kayatko nga iranud maipapan iti panawen nga awanen ti sakit ken panaglakay.” Iyurnosmo ti agsubli.
Inton agsublika, mabalinmo a kunaen:
“Iti napalabas a panagsaritata, nadakamatko nga adda ibagak kenka maipapan iti panawen nga awanen ti sakit ken panaglakay. Dayta a punto ket masarakan ditoy.” Pairuarmo ti broshurna sa basaen ken pagsaritaanyo ti parapo 6-7 iti panid 23-4. Iyurnosmo a pagsaritaanyo ti parapo 8-9 iti sumaganad a panagsarungkarmo.
No makipagtrabaho ti nataengan iti maysa nga ubing, ti nataengan mabalinna nga iyam-ammo ti bagida sa kunaenna:
“No ipalubosmo, adda maysa a teksto a kayat nga ibasa kenka ni ________. [Basaen ti ubing ti Salmo 37:29 ken komentuanna iti apagbiit.] Salaysayen daytoy a broshur no kasano a tungpalen ti Dios ti panggepna iti sangatauan ken iti daga. [Ipakitam dagiti ladawan iti panid 24-7.] Inton agsublikami, kayatko nga ipakita kenka ti nakaskasdaaw a kari ti Biblia maipapan iti panagungar.” Itukonmo ti broshur, ken iyurnosyo ti agsubli.
Iti panagsarungkar, mabalin a kunaen ti nataengan:
“Iti napalabas nga isasarungkarko, binasatayo ti Salmo 37:29, ken dinakamatko a kayatko nga ipakita kenka no ania ti kuna ti Biblia maipapan iti panagungar. Imutektekam no ania ti nadakamat ditoy.” Pairuarmo ti broshurna sa usigenyo ti parapo 12-14 iti panid 24-5. Itukonmo ti panagadal iti Biblia, wenno iyurnosmo a pagsaritaanyo ti parapo 15-16 iti sumaganad nga isasarungkarmo.