Agsaganakayo a Naimbag Para iti Memorial
Anian a rag-o ken pribilehio para kadagiti pasurot ni Kristo ti panagsagana a naimbag iti rabii a pananglaglagiptayo iti ipapatay ni Jesu-Kristo! (Luc. 22:19) Ania dagiti praktikal a bambanag a masapul nga aramidentayo kas panagsagana iti Memorial?
◼ Oras ken Lugar: Masapul nga ammo ti tunggal maysa ti eksakto nga oras ken lugar a pakaangayan ti Memorial. No saan la a maymaysa a kongregasion ti mangusar iti Kingdom Hall, nasken a sumangpettayo a nasapa ken pumanawtayo a dagus iti naurnos a pamay-an, yantangay adda pay sumaruno a mangusar iti Kingdom Hall. Nasken a liklikantayo ti aglilinnetlet iti pagserkan, iti lobby, iti kalsada, ken iti paradaan ti lugan.
◼ Imbitasion: Adda kadin imbitasion nga ibunong dagiti amin nga agibumbunannag, ken kabesadoda kadin ti linaonna? Naensayoyo kadin ti panangitukon iti dayta? Siasino dagiti ikkanyo iti imbitasion? Ikagumaanyo koma nga ibunong amin nga imbitasion.
◼ Pagluganan: Dagiti dadduma nga interesado kasta met dagiti adu a kakabsat ket mabalin nga agkasapulan iti pagluganan ken iti sabali pay a personal a tulong. Ania dagiti naaramidyon nga urnos tapno maasikaso dagiti kasapulanda?
◼ Emblema: Siguraduenyo a sa la maipasa dagiti emblema no limneken ti init. Masapul a mangaramidkayo iti urnos tapno maserbian ti asinoman a napulotan a masakit ken saan a makatabuno. Adda koma maisagana nga umiso a kita ti tinapay ken arak agraman dagiti maitutop a plato ken kopa.——Kitaem ti Pebrero 15, 2003 a Pagwanawanan, panid 14-15, parapo 14, 17.
◼ Kingdom Hall: Nasaksakbay koma a madalusan a naimbag ti Kingdom Hall. Maisagana ken mayurnos koma dagiti plato, kopa, agraman ti maitutop a lamisaan ken mantel sakbay a mangrugi ti Memorial. No sabali a lugar ti pakaangayan ti Memorial, siguraduenyo nga adda maitutop a sound system tapno ti agpalawag ket mangngeg ti amin a timmabuno. Masapul a mapili a nasaksakbay dagiti paraasistir ken paraipasa iti emblema ken maipaayanda iti instruksion mainaig kadagiti annongenda, ti umiso a pamay-an a masurot, ken ti maitutop a panaglanglanga ken panagkawkawesda.
Iti daytoy a kapatgan nga okasion, ti Pananglaglagip iti ipapatay ni Jesu-Kristo, kayattayo a nakasaganatayo a naimbag kas indibidual ken kas kongregasion. Sigurado a sibabaknang a bendisionan ni Jehova dagiti amin a mangipakita iti naimpusuan nga apresasionda kadagiti amin nga impaay ni Jehova iti sangatauan babaen iti sakripisio ti ipatpategna nga Anak, a ni Jesu-Kristo.