Ti Kapatgan a Trabaho
1. Ti nauneg nga apresasiontayo iti ministerio tignayennatayo a mangaramid kadagiti ania a sakripisio?
1 Apay a kanayon a maiparparegta kadatayo nga usarentayo a naan-anay ti tiempo, pigsa, ken sanikuatayo iti ministerio? Gapu ta awanen ti trabaho a napatpateg pay ngem iti daytoy! No utobentayo ti dakkel nga epektona kadagiti tattao, rumayray ti tarigagaytayo a makiraman iti daytoy a trabaho a saanton a maulit.—Ara. 20:24.
2. Kasano a ti panangasabatayo ket makatulong a mangsantipikar iti naindaklan a nagan ni Jehova?
2 Masantipikar ti Nagan ni Jehova: Ti trabaho a panangasaba ipaganetgetna a ti Pagarian ni Jehova babaen ken Kristo Jesus sukatannanto ti amin a gobierno ti tao ken ipaayna ti solusion dagiti amin a parikut ti sangatauan. (Mat. 6:9, 10) Daytoy ti mangipadayag ken Jehova kas ti kakaisuna a makaispal kadatayo manipud iti sakit ken ipapatay. (Isa. 25:8; 33:24) Dagidiay makapaliiw iti kinaregta ken nasayaat a kababalintayo mabalin nga idaydayawda met ni Jehova yantangay naigalad kadatayo ti naganna. (1 Ped. 2:12) Mapnektayo la ketdi a mangipakaammo iti nagan ti Soberano nga Apo a ni Jehova iti intero a daga!—Sal. 83:18.
3. Ania dagiti bendision nga awaten dagidiay mangipangag iti mensahe mainaig iti Pagarian?
3 Mangispal iti Biag: ‘Saan a tarigagayan ni Jehova a madadael ti asinoman no di ket tarigagayanna a makagteng ti isuamin iti panagbabawi.’ (2 Ped. 3:9) Kaskasdi, no awan ti mangisuro kadagiti tattao, kasano a maammuanda no ania ti ibilang ni Jehova nga umiso ken di umiso a kababalin? (Jon. 4:11; Roma 10:13-15) No ipangag dagiti tattao ti naimbag a damag, sumayaat ti kalidad ti biagda bayat nga isardengda dagiti dakes nga aramidda. (Mik. 4:1-4) Maysa pay, maaddaanda iti makaparagsak a namnama nga agbiag nga agnanayon. Ti aktibo a panangasaba ken panangisuro ispalennatayo ken dagidiay dumngeg kadatayo. (1 Tim. 4:16) Ibilangtayo a dayaw ti makiraman iti daytoy a kapatgan a trabaho!
4. Apay a rumbeng a makiramantayo a sireregta iti trabaho a panangikasaba iti Pagarian ken iti panagaramid iti adalan?
4 Iti din agbayag, ti dakkel a rigat pagpatinggaennan daytoy nadangkes a lubong. Maispalto dagidiay dumasig ken Jehova. Gapuna, ti kagaganatan, kapapatgan, ken ti makagunggona unay a trabaho ita ket ti panangasaba ken panagaramid iti adalan. Daytoy ti ipangpangrunatayo iti biagtayo!—Mat. 6:33.