Nasken a Taginayonentayo ti Kinaregtatayo iti Ministerio
1 Sipud idi 1992, kada tawen a nasurok a maysa a bilion nga oras ti sireregta a busbusbosen dagiti Saksi ni Jehova iti sangalubongan a trabaho a panangikasaba iti Pagarian ken iti panagaramid iti adalan. Anian a ragsaktayo ta adda bassit naitulongtayo iti kasta a nagsayaat a nagapuanan!—Mat. 28:19, 20.
2 Rumbeng a maiturong ken Jehova ti amin a panagyaman ken dayaw ta tultulongannatayo a mangitungpal iti ministeriotayo kadagitoy “napeggad a tiempo.” (2 Tim. 3:1) Ania ti masapul nga aramidentayo tapno maitultuloytayo ti makiraman a sireregta iti daytoy napateg a trabaho?
3 No Apay a Naregtatayo: Ti nauneg a panagayat iti Dios ken kadagiti padatayo a tao, kasta met ti naimpusuan a tarigagaytayo a mangtungpal iti dedikasiontayo, ti manggutgutugot kadatayo nga agserbi iti Pagarian. (Mat. 22:37-39; 1 Juan 5:3) Ti ayat tignayennatayo nga agsakripisio tapno mabalintayo ti makiraman a naan-anay iti trabaho a panangasaba.—Luc. 9:23.
4 Ikagumaantayo ti Agtalinaed a Naregta: Ti Diablo a kabusortayo ar-aramidenna ti amin a kabaelanna tapno bumaaw ti kinaregtatayo iti ministerio. Ti kinaaleng-aleng dagiti tattao iti teritoriatayo, dagiti pakasingaan iti daytoy a lubong, dagiti pakarigatan iti inaldaw a panagbiag, ken ti pannakaseknan iti kumapkapuy a salun-attayo ket sumagmamano laeng kadagiti us-usarenna iti pananggandatna a mangupay kadatayo.
5 Gapuna, nasken nga ikagumaantayo ti agtalinaed a naregta. Napateg a parayrayentayo “ti ayat nga adda [kadatayo] idi damo.” Ramanen dayta ti regular a panangbasa ken panangutob iti Sao ti Dios, ti Biblia, ken ti panangaprobetsar kadagiti amin a naespirituan a probision nga ipapaay “ti matalek ken masirib nga adipen.”—Apoc. 2:4; Mat. 24:45; Sal. 119:97.
6 Nabatad nga ipasimudaag dagiti padto iti Biblia a sipapardas nga umas-asidegen ti aldaw a panangdadael ni Jehova kadagiti dakes a tattao. (2 Ped. 2:3; 3:10) Gapu ta nalawag dayta iti panunottayo, ikagumaantayo a taginayonen ti kinaregtatayo iti ministerio, a makiramantayo a naan-anay iti agdama a sangalubongan a trabaho a panangikasaba iti Pagarian ken panagaramid iti adalan!