“Nasgedkayo Koma iti Espiritu”
1. Ania a kababalin ti nasken nga iparangarangtayo iti trabaho a panangasaba?
1 Nasken a rumang-aytayo iti amin nga aspeto ti panagserbitayo kas Kristiano. Gapuna, ‘nasgedtayo koma iti espiritu’ ken ‘agpaadipentayo ken Jehova.’ (Roma 12:11) Nupay kasta, adu a bambanag ti mabalin a mangpabaaw iti kinaregtatayo iti ministerio. Gapuna, kasanotayo a ‘maparangrang a kas apuy’ ti kinaregta ken kinagagartayo nga agserbi maipaay iti Pagarian?—2 Tim. 1:6, 7.
2. Ania ti pakainaigan ti personal a panagadal iti Biblia iti kinaregtatayo iti ministerio?
2 Personal a Panagadal iti Biblia: Tapno epektibotayo kas manangikaskasaba iti Pagarian, masapul nga ipapusotayo ti linteg ti Dios ken dagiti kinapudno a ramanen dayta. (Sal. 119:97) Tunggal adda napateg a masursurotayo bayat ti personal a panagadaltayo, magutugot ti pusotayo ken matignaytayo nga ad-adda a rumegta. Ti ayattayo iti Daydiay mangipapaay kadagita a kinapudno ken ti tarigagaytayo a mangiranud iti naimbag a damag tignayennatayo a mangidaydayaw iti Dios ken mangipakaammo iti naganna. (Heb. 13:15) Nalawag ngarud a no sireregta nga ikaskasabatayo ti naimbag a damag, iparparangarangtayo ti nauneg a panangapresiartayo iti kinapateg dayta.
3. Ania ti maitulong ti nasantuan nga espiritu ti Dios iti ministeriotayo?
3 Ikararagyo ti Espiritu ti Dios: Saantayo a maitungpal ti ministeriotayo iti kabukbukodantayo laeng a pigsa. Ti napaypayso a kinaregta ket agpannuray iti agtultuloy a panagandar ti espiritu ti Dios. (1 Ped. 4:11) Ti iyaadanitayo iti Gubuayan ti “dinamiko nga enerhia” pabilgennatayo iti naespirituan ket makakasabatayo a situtured. (Isa. 40:26, 29-31) Idi naipasango ni apostol Pablo iti ibubusor iti ministeriona, ‘nagun-odanna ti tulong a naggapu iti Dios.’ (Ara. 26:21, 22) Pabilgennatayo ti nasantuan nga espiritu ni Jehova nga agbalin a naregta iti ministerio, isu a masapul nga ikararagtayo dayta.—Luc. 11:9-13.
4. Ania dagiti nasayaat a resulta ti kinaregtatayo, ngem ania ti rumbeng a laglagipentayo?
4 Masansan nga ad-adda a rumegta dagiti padatayo a Kristiano no makitada ti kinapingettayo a mangikaskasaba iti Pagarian. (2 Cor. 9:2) Ad-adda nga imdengan dagiti tattao iti teritoriatayo ti mensahe nga awittayo no narayray ti panagsaotayo ken kombinsidotayo iti ibagbagatayo. Nupay kasta, ti kinaregta ket masapul a mabuyogan iti kinataktika ken kinaalumamay. (Tito 3:2) Iti amin a gundaway, ikagumaantayo a padayawan ti bumalay ken raemen ti wayawayana nga agpili.
5. Ania a Nainkasuratan a balakad ti masapul nga ikagumaantayo nga iyaplikar?
5 Kas manangiwaragawag iti Pagarian, kanayontayo koma a ‘nasged iti espiritu.’ Parayrayentayo ti regtatayo babaen ti personal a panagadal iti Biblia ken napasnek a panagkararag ken Jehova, ta isu ti mangipapaay kadatayo iti nabileg a nasantuan nga espirituna. Iti kastoy a pamay-an, sireregta a maitungpaltayo ti ministeriotayo ‘buyogen ti nasantuan nga espiritu ken nabileg a kombiksion.’—1 Tes. 1:5.