Agbalinkayo a Nasayaat a Kadua iti Panangasaba

1. Ania dagiti pagsayaatanna no adda kaduam a mangasaba?

¹ Naminsan, imbaon ni Jesus ti 70 nga adalan a mangasaba, ket “imbaonna ida a sagdudua.” (Luc. 10:1) Gapu iti daytoy nga urnos, awan duadua a nakapagtitinnulong ken nakapagpipinnaregta dagiti adalan bayat ti panangasabada. Kasanotayo a matulongan ti kaduatayo iti ministerio iti tay-ak?

2. No madama a mangaskasaba ti kaduatayo, kasano ti rumbeng a panagimdengtayo ken apay?

² Panagimdeng: Dumngegka a naimbag bayat a mangaskasaba ti kaduam. (Sant. 1:19) No adda maibasa a teksto, surotem ti pannakaibasa dayta iti bukodmo a Biblia. Kitaem daydiay agsasao, ti man kaduam wenno ti bumalay. No dumngegka a naimbag, mabalin a maparegtam ti bumalay nga umimdeng met.

3. Kaano a mabalin nga agpatulong kadatayo ti kaduatayo?

³ Panangammo No Kaanoka a Bumallaet: No batang ti kaduatayo ti mangasaba, maipakitatayo a raraementayo no bay-antayo nga agsao. (Roma 12:10) Liklikantayo ti bumallaet. No agpatulong kadatayo ti kaduatayo gapu ta saannan nga ammo ti ibagana wenno no sumupiat wenno agsaludsod ti bumalay, ikagumaantayo a nayonan dagiti imbagana imbes a mangibangontayo iti sabali a topiko. (Prov. 16:23; Ecl. 3:1, 7) Dagiti sasaotayo suportaranna koma ti mensahe nga ikaskasaba ti kaduatayo.—1 Cor. 14:8.

4. Kasanotayo nga agballigi ken maaddaan iti rag-o iti ministerio?

⁴ Idi nalpasen a nangasaba ti 35 a paris dagiti adalan, “nagsublida nga addaan rag-o.” (Luc. 10:17) Maaddaantayo met iti rag-o ken agballigitayo iti ministerio no dumngegtayo ken ammuentayo no kaanotay a bumallaet tapno tulongantayo ti kaduatayo a mangasaba.