Ania ti Masursuro Dagiti Sabsabali Bayat a Palpaliiwendakayo?
1. Ania ti nasursuro dagiti adalan iti panangpaliiwda ken Jesus?
1 Kinuna ni Jesus: “Ibaklayyo ti sangolko ket agsursurokayo kaniak.” (Mat. 11:29) Nalawag a nangisuro ni Jesus babaen ti nasayaat nga ulidan, saan laeng a babaen iti sao. Panunotenyo no ania ti nasursuro dagiti adalan iti panangpaliiwda ken Jesus. Isu ket naalumamay, naasi, ken naayat. (Mat. 8:1-3; Mar. 6:30-34) Pudno a napakumbaba ni Jesus. (Juan 13:2-5) Bayat a makikuykuyog dagiti adalan kenkuana, napaliiwda nga isu ket napinget a trabahador a sieepektibo a nangisuro iti kinapudno kadagiti sabsabali. (Luc. 8:1; 21:37, 38) Ania ti epektona kadagiti sabsabali ti mapalpaliiwda kadatayo iti ministerio?
2. Kasano a ti nasayaat a panaglanglanga ken kababalintayo iti ministerio ket makaibati iti nasayaat nga impresion kadagiti bumalay?
2 Dagiti Bumalay: Mabalin a nasayaat ti epektona kadagiti bumalay ti naemma a panagkawkawes, nasayaat a kababalin, ken ti naimpusuan a pannakaseknantayo kadakuada. (2 Cor. 6:3; Fil. 1:27) Madlawda a kanayontayo nga us-usaren ti Biblia. Apresiaren dagiti dadduma ti nadayaw a panagimdengtayo kadakuada no agsasaoda. Pulos a ditay koma tagibassiten ti maaramidan ti panagbalin a mapagulidanan kadagitoy a banag no iti panangtignay kadagiti tattao nga umawat iti mensahe maipapan iti Pagarian.
3. Ania ti nasayaat nga epekto ti ulidantayo kadagiti kakabsattayo?
3 Dagiti Kakabsattayo: Panunotentayo met ti nasayaat nga epekto ti ulidantayo kadagiti kakabsattayo. Mabalin a tuladenda ti kinaregtatayo iti ministerio. Kas iti landok patademenna ti landok, ti presentasiontayo a naisagana a naimbag tignayenna met ti dadduma a mangpasayaat iti pamay-anda a mangasaba. (Prov. 27:17) Ti kinaaneptayo a mangsurat kadagiti detalye iti house-to-house record mainaig kadagidiay nangipakita iti interes ken ti panangsarungkartayo kadakuada iti kabiitan a panawen mabalin a tignayenna dagiti dadduma a mangaramid met iti kasta. Nasayaat ti epektona kadagiti kakabsattayo no naan-anay nga itungpaltayo ti ministeriotayo.—2 Tim. 4:5.
4. Apay a rumbeng nga usigentayo sagpaminsan ti ulidantayo?
4 Nasayaat no sagpaminsan nga usigenyo ti ar-aramiden ken sasawenyo ken no kasano a maim-impluensiaanyo dagiti dadduma babaen iti ulidanyo. Maay-ayo ni Jehova iti nasayaat nga ulidantayo ken tignayennatayo a mangibaga iti daytoy a sinao ni apostol Pablo: “Agbalinkayo a tumutulad kaniak, kas met iti panangtuladko ken Kristo.”—1 Cor. 11:1.