Regular Pioneer-ka Kadi Idi?
1. Ania a pribilehio ti tagtagiragsaken ti adu, ngem ania ti inaramid dagiti dadduma gapu iti kasasaadda?
1 Adun a tawen a rinibu ti mangtagtagiragsak iti pribilehio a “mangisuro ken mangideklara iti naimbag a damag” kas amin-tiempo a ministro. (Ara. 5:42) Nupay kasta, adda dagiti nagsardeng nga agpayunir gapu iti nagduduma a rason. No regular pioneer-ka idi, inusigmo kadin ti agdama a kasasaadmo tapno makitam no mabalinmo ti agsubli a payunir?
2. Apay a nasayaat no usigen dagiti dati a payunir ti agdama a kasasaadda?
2 Agbalbaliw Dagiti Kasasaad: Mabalin a ti makagapu iti panagsardengmo idi a payunir ket saan itan a problema. Kas pagarigan, no nagsardengka a payunir gapu ta saanmo a kabaelan a ragpaten ti 90 nga oras iti binulan, mabalinmo kadin ti agsubli a payunir ita ta 70 laengen ti makalikaguman nga oras a ragpatem? Naksayan kadin ti oras a panagtrabahom wenno dagiti responsabilidadmo iti pamiliayo manipud idi nagsardengka a payunir? Adda maysa a kabsat a babai a nagsardeng a payunir gapu iti salun-atna ngem nagsubli met laeng a payunir idi agtawenen iti 89. Nasurok a makatawen ngamin a saan a nayospital ken mariknana a simmayaat ti salun-atna isu a kabaelanna manen ti agpayunir!
3. Kasano a makapagtitinnulong dagiti kameng ti pamilia tapno makapagpayunir ti maysa kadakuada?
3 Nalabit saanmo pay a napadasan ti nagpayunir, ngem adda kapamiliam a nagsardeng nga agpayunir tapno maasikasona ti maysa a kameng ti pamiliayo, kas iti nataengan a nagannak. (1 Tim. 5:4, 8) No kasta, kabaelam kadi wenno ti sabali pay a kameng ti pamiliayo a tulongan daydiay nagsardeng a payunir? Apay a diyo pagsasaritaan dayta? (Prov. 15:22) Nakapatpateg no agtitinnulong dagiti kameng ti pamilia tapno makapagpayunir ti maysa kadakuada.
4. Ania ti aramidem no saanmo pay a kabaelan ita ti agsubli a payunir?
4 Saanka a maupay no saan pay nga ipalubos ti kasasaadmo nga agpayunirka manen. Maay-ayo ni Jehova gapu ta ammona ti tarigagaymo a mangaramid iti dayta. (2 Cor. 8:12) Ipakatmo iti ministeriom dagiti paglaingan a napatanormo idi payunirka pay laeng. Ikararagmo ti tarigagaymo nga agpayunir manen ken siputam dagiti gundaway a mabalinmo a baliwan ti kasasaadmo. (1 Juan 5:14) Inton agangay, mabalin nga ilukatto kenka ni Jehova “ti maysa a dakkel a ruangan a mangiturong iti panagaramid” tapno mariknam manen ti rag-o nga itden ti panag-regular pioneer!—1 Cor. 16:9.