Makasublikayo Kadi iti Ranggo Dagiti Payunir?
1 Bayat iti napalabas a lima a tawen, rinibo a regular payunir ti agkasapulan a sumardeng manipud ranggo dagiti payunir. Maysakayo kadi kadakuada? No kasapulan nga isardeng dayta gapu iti salun-at, pinansial a problema, wenno obligasion iti pamilia, nagbalbaliwen aya ti kasasaadyo? Makaaramidkayo aya ti sumagmamano a panangihusto tapno makapayunirkayo manen? Napanunotyo kadin ti agaplikar manen?
2 Kas pagaammoyo, kasapulan ti nasayaat nga organisasion tapno agballigikayo kas payunir. No saan unay nga adu iti panaglinglingay, ti ababa a periodo ti panagaliwaksay ket masansan a makapnek kadakayo. (Prov. 19:17; Ara. 20:35) Babaen ti kinakupado iti serbisio, masalaknibankayo manipud iti managimbubukodan a wagas ti biag daytoy lubong. Inkari ni Jehova a pabaknangennakayo iti naespirituan no sapulenyo nga umuna iti interes ti Pagarian. Masagrapyo ti napudno a rag-o ken pannakapnek babaen iti naimpusuan a serbisio ken Jehova.—Prov. 10:22; Col. 3:23, 24.
3 Ti aya amin a tiempo a ministerio ket pribilehio laeng a nakalukat iti sumagmamano? Saan—silulukat kadagiti amin. Maigapu iti sapata ti dedikasiontayo, tunggal Kristiano ti mangted iti serioso a panangusig iti amin a tiempo a serbisio malaksid no saan nga ipalubos dayta ti kasasaad.—Mar. 12:30.
4 No ti salun-at ken Nainkasuratan a responsabilidad ket saanda a palubosan ti panagpayuniryo iti agdama, masiguro nga ammo ken maawatan ni Jehova dayta. Gunggonaannakayo iti aniaman a maaramidanyo. (1 Cor. 4:2: 2 Cor. 8:12) Ngem no makapayunirkayo manen, apay a dikay umasideg iti mangidaulo a manangaywan ken kumiddawkayo iti aplikasion?
5 Makatulong Aya ti Pamiliayo? Nalabit a napanawanyo ti ranggo gapu ta kasapulan a taripatuenyo iti obligasion ti pamilia. Posible kadi a dagiti dadduma a miembro ti pamilia ket addadan iti kasasaad a makatulong tapno makasublikayo manen iti payunir a trabaho?
6 Ti nasayaat a kooperasion ken bassit a pinget iti biang ti maysa a miembro ti pamilia ti mamagbalin iti dayta. Mabalin a maipaay ti tulong iti langa ti magasto wenno transportasion, agraman regular a panangkuyog iti serbisio. No saan nga ipalubos iti kasasaad a masublian daytoy a pribilehio, nalabit a ti kasta a tulong ti maited iti sabali a miembro ti pamilia nga isu ti mangaramid iti dayta.
7 Apay a dikay pagsasaritaan daytoy a banag kas pamilia? Nasayaat ti manamnama no aramidenyo dayta a kas nagkaykaysa a proyekto iti pamilia. No adda payunir a mainayon iti ranggo, marikna ti intero a sangakabbalayan nga adda pannakiramanda. Dayta a nabuslon nga espiritu ti mamagsinged iti pamilia ti naespirituan.—Luc. 6:38; Fil. 2:2-4.