Epektibo a Panangasaba iti Lansangan
1. Ania ti maysa a pamay-an a matuladtayo ni Jesus?
1 Bayat ti ministerio ni Jesus ditoy daga, saan a nagkedked a nakisarita kadagiti tattao a nasabatna iti dalan ken iti dadduma pay a publiko a lugar. (Luc. 9:57-61; Juan 4:7) Kayatna nga iranud ti napateg a mensahena iti adu a tattao aginggat’ mabalin. Iti kaaldawantayo, ti panangasaba iti lansangan ket nagsayaat a pamay-an tapno matulongantayo dagiti tattao a maaddaan iti nadiosan a sirib. (Prov. 1:20) Dakdakkel ti posibilidadna nga agballigitayo no asitgantayo dagiti tattao ken agbalintayo a nataktika.
2. Ania ti pagsayaatanna no datayo ti umasideg kadagiti tattao no mangasabatayo iti lansangan?
2 Asitganyo Dagiti Tattao: Gagangay a nasaysayaat no asitganyo dagiti tattao imbes a nakatakder wenno nakatugawkayo iti maysa a lugar ket urayenyo nga isuda ti umasideg kadakayo. Isemanyo ida, kumitakayo iti matada, ken nainggayyeman ken siaalumamay a makisaritakayo kadakuada. No adda kaduayo a dadduma pay nga agibumbunannag, gagangay a nasaysayaat no saggaysakayo iti kasarita. Mangaramidkayo met iti pamuspusan tapno makasaritayonto manen ti makasabaanyo nga interesado. No maitutop, iti ngudo ti panagsaritayo, sidadayaw a saludsodenyo no kasanoyonto manen a makasarita. Adda dagiti agibumbunannag a regular a mangaskasaba iti lansangan iti isu met la a lugar isu a masansan a makasaritada ti isu met la a tao ken maparayrayda ti interesna.
3. Kasanotayo nga agbalin a nataktika no iti panangasaba iti lansangan?
3 Agbalinkayo a Nataktika: Panunotenyo a naimbag no sadino ti pagtakderanyo ken no siasino ti kasaritayo. Saan a kasapulan a kasaritayo ti amin nga aglabas. Agpaliiwkayo a naimbag. Kas pagarigan, no agdardaras ti maysa a tao, nasaysayaat no saanyon a kasarita. No mangasabakayo iti sango ti lugar ti negosio, agbalinkayo a nataktika tapno saan a makaunget ti manedyer. Masansan a nasaysayaat no ti kasaritayo ket dagiti rumrummuar iti lugar ti negosio saan a dagiti sumsumrek. Asitganyo dagiti tattao iti wagas a saanda a mapabutngan wenno makigtot. Agbalinkayo met a nataktika no iti panangitukon iti literatura. No saan unay nga interesado ti makasabaanyo, mabalinyo ti mangitukon iti tract imbes a magasin.
4. Apay a makagunggona ken makaparagsak ti panangasaba iti lansangan?
4 Ti panangasaba iti lansangan tulongannatayo a mangiwaras iti adu a bin-i ti kinapudno iti ababa laeng a tiempo. (Ecl. 11:6) Ti dadduma a makasabaantayo ket mabalin a dagidiay saantayo a madandanon kadagiti pagtaenganda no mangaskasabatayo iti binalaybalay. Apay a diyo iyurnos ti makiraman iti panangasaba iti lansangan, a maysa a makaparagsak ken epektibo a pamay-an ti panagserbi iti tay-ak?