Baro a Pamay-an ti Panangasaba iti Publiko

1. Ania ti inyulidan dagiti Kristiano idi umuna a siglo?

¹ Saan laeng a nangasaba iti binalaybalay dagiti Kristiano idi umuna a siglo. Nangasabada pay iti publiko. (Ara. 20:20) Kas pagarigan, napanda iti templo, ta ammoda nga adu ti tattao sadiay. (Ara. 5:42) Idi adda idiay Atenas, inaldaw a nangasaba ni apostol Pablo iti plasa. (Ara. 17:17) Ita, ti panangasaba iti binalaybalay ti kangrunaan latta a pamay-antayo a mangiwaragawag iti naimbag a damag. Nupay kasta, mangaskasabatayo met kadagiti lugar nga adu ti matataona kas kadagiti kalsada, paradaan, lugar ti negosio, parke, ken dadduma pay. Nupay maiparparegta kadagiti agibumbunannag ti panangasaba iti publiko aginggat’ mabalin, adunto ti maaddaan iti oportunidad a makiraman iti dua a baro ken makapagagar a pamay-an ti panangasaba iti publiko.

2. Ania a baro a pamay-an ti panangasaba iti publiko ti naipadas idi Nobiembre 2011?

² Espesial a Panangasaba iti Publiko Kadagiti Siudad: Kas naipadamag iti panid 16 ken 17 ti 2013 Tinawen a Libro, adda baro a pamay-an ti panangasaba iti publiko a pinadas dagiti Saksi ni Jehova iti New York City idi Nobiembre 2011. Dagiti lamisaan ken cart nga addaan kadagiti makaawis a displey ken literatura iti sumagmamano a lengguahe ket naipuesto kadagiti lugar iti siudad nga adu ti aglabas. Inaldaw a rinibu a tattao ti aglabas, a pakairamanan dagiti agnanaed kadagiti nainget ti pannakabantayna nga apartment ken tattao a masansan nga awan kadagiti pagtaenganda. Nakasaysayaat ti resultana. Iti nabiit pay, 3,797 a magasin ken 7,986 a libro ti naipaima iti maysa laeng a bulan. Adu kadagiti aglablabas ti nagkiddaw a mayadalan iti Biblia. Yantangay ti kangrunaan a panggep ket ti panangirugi iti panagadal iti Biblia, dagus a maipatulod kadagiti maitutop a kongregasion dagiti adres nga inted dagiti interesado tapno adda sumarungkar kadakuada.

3. Kasano ti panagsaknap daytoy a pamay-an ti panangasaba?

³ Gapu iti panagballigi daytoy a pamay-an ti panangasaba, maar-aramiden daytoy kadagiti dadakkel a siudad iti intero a lubong. Ti sanga nga opisina ti mangikeddeng no ania dagiti siudad a pakaaramidan daytoy. Gagangay a maaramid daytoy kadagiti siudad nga addaan kadagiti terminal dagiti pangpubliko a lugan wenno kadagiti sentro ti negosio wenno kadagiti kondominium gapu ta adu ti matataona. Kalpasanna, suratan ti sanga nga opisina dagiti kongregasion a makiraman iti daytoy a pamay-an ti panangasaba para kadagiti kanayonan nga instruksion. Gagangay a dagiti regular ken special pioneer ti makiraman, nupay iti dadduma a lugar ket mabalin met a makipaset dagiti auxiliary pioneer.

4. Kasano a maaramid ti espesial a panangasaba iti publiko kadagiti siudad?

⁴ No Kasano a Maaramid Daytoy a Pamay-an ti Panangasaba: Dagidiay makipaset iti espesial a panangasaba iti publiko kadagiti siudad ket gagangay nga agurayda kadagiti umasideg iti lamisaan wenno iti mayakar-akar a pagidispleyan iti literatura. No adda umasideg, ibagada laeng a mangala iti aniaman a literatura a paginteresanna. No agsaludsod, sidadaan dagiti payunir a mangipaay iti Nainkasuratan a sungbat. No mangala iti literatura, saan a dakamaten dagiti payunir ti maipapan iti donasion. Ngem no saludsodenna no pagtataudan ti pondo ti trabahotayo, mabalinda nga ilawlawag a ti ad-adu nga impormasion ket masarakan iti opisial a website-tayo ken mabalinda a dakamaten ti artikulo maipapan kadagiti pamay-an ti panangted iti kontribusion. No posible, mabalinda nga isaludsod: “Kayatmo kadi nga adda mangbisita kenka?” wenno “Ammom kadi a malaksid iti dayta a publikasion, mangituktukonkami met iti panangyadal iti Biblia nga awan ti bayadam?”

5. Ania ti nagsayaat a resulta ti pannakipaset iti daytoy baro a pamay-an ti panangasaba para iti maysa a pagassawaan?

⁵ Nagsayaat ti resultana ti pannakipaset iti daytoy a pamay-an ti panangasaba. Insurat ti maysa a pagassawaan: “Iti panagbantaymi iti lamisaan ken ti pannakakitami kadagiti rinibu a tattao a lumablabas iti inaldaw, naamirismi a talaga a nagdakkel a trabaho ti maar-aramid tapno makasabaan dagiti tattao iti intero a lubong. Ti pannakakitami kadagitoy a nagadu a tattao ken ti panangpanunotmi no kasano ti pannakaseknan ni Jehova iti tunggal indibidual pinatibkerna ti determinasionmi a mangyun-una iti trabaho a panangasaba. Pampanunotenmi a suksukimaten ni Jehova ti puso dagiti amin nga aglabas, ket birbirokenna no siasino dagiti maikari. Talaga a marikriknami a nasingedkami kadagiti anghel a katrabahuantayo.”

6. (a) Ania pay a baro a pamay-an ti panangasaba iti publiko ti maor-organisar kadagiti adu a kongregasion, ken kasano a naiduma daytoy iti espesial a panangasaba iti publiko kadagiti siudad? (b) Kasano a makapagtitinnulong dagiti kongregasion iti panangasaba iti publiko?

⁶ Panangasaba iti Publiko nga Inorganisar ti Kongregasion: Malaksid iti espesial a panangasaba iti publiko kadagiti siudad, adda baro a pamay-an ti panangasaba nga inorganisar ti adu a bagi dagiti panglakayen iti lokal a teritoriada. Iti daytoy a pamay-an, agusar dagiti agibumbunannag iti lamisaan wenno mayakar-akar a pagidispleyan kadagiti publikasion kadagiti lugar nga adu ti aglabas iti teritoria ti kongregasion. Naiduma daytoy iti espesial a panangasaba iti publiko kadagiti siudad, a dagiti kakabsat a makiraman ket pinili ti sanga nga opisina manipud iti nagduduma a kongregasion a mangasaba iti maymaysa a lugar iti siudad nga adu ti matataona.—Kitaen ti kahon a “Masapul ti Kooperasion.”

7. No praktikal, kasano nga organisaren dagiti panglakayen ti panangasaba iti publiko iti teritoriada?

⁷ Tingitingen dagiti panglakayen no adda teritoria ti kongregasionda nga adu ti matataona ken usigenda no nasken a mangorganisarda iti panangasaba iti publiko. Dagiti lugar a mabalin a pagipuestuan iti lamisaan wenno iti mayakar-akar a pagidispleyan ket kadagiti terminal dagiti pangpubliko a lugan, plasa, parke, kalsada nga adu ti aglabas, shopping mall, eskuelaan ti kolehio, eropuerto, ken kadagiti lugar a pakaang-angayan dagiti tinawen a taripnong. Adda pagsayaatanna no maipuesto ti lamisaan iti maymaysa a lugar, iti agpapada nga aldaw ken oras. Napaliiw a nasaysayaat no maipuesto ti lamisaan kadagiti shopping mall ngem iti ruar ti maysa a dakkel a pagtagilakuan a masansan a mapan laeng dagiti tattao no adda partikular a gatangenda iti dayta a pagtagilakuan. Iti dadduma a lugar, kas kadagiti adu ti matataona a kalsada, mabalin a mas praktikal ti bassit a mayakar-akar a pagidispleyan iti literatura. Adda dagiti naisagana a file a mabalin nga i-download dagiti panglakayen iti Web site-tayo tapno maidispley dagiti poster para kadagiti magasin a Pagwanawanan ken Agriingkayo! ken ti libro nga Isursuro ti Biblia. Dagitoy a file ket nairanta a para iti daytoy a panangasaba iti publiko. Dagiti makiraman tuladenda ti adu kadagiti pamay-an a maar-aramid iti espesial a panangasaba iti publiko kadagiti siudad ken masapul a surotenda a naimbag ti instruksion ti manangaywan ti serbisio. No ti adres ti interesado ket saan a sakup ti teritoriada, dagus nga isuratda iti porma a Please Follow Up (S-43) sa itedda iti sekretario.

8. No awan ti inorganisar ti kongregasionyo a panangasaba iti publiko, ania dagiti gundaway a mabalinyo latta a tagiragsaken dayta?

⁸ Panangasaba iti Publiko iti Personal a Ministerio: Iti dadduma a kongregasion, nalabit awan ti lugar iti teritoriada nga adu ti matataona a praktikal a pakaipuestuan ti lamisaan wenno pakausaran ti mayakar-akar a pagidispleyan iti literatura. Nupay kasta, maiparegta latta kadagiti agibumbunannag kadagita a kongregasion nga iramanda iti ministerioda ti panangasaba iti publiko. Adda kadi dagiti shopping mall, strip mall, ken dadakkel a grocery store iti teritoriayo? Adda kadi parke wenno lugar a paguurnongan dagiti tattao? Adda kadi dagiti dadakkel nga okasion para iti publiko a sagpaminsan a maangay iti teritoriayo? No adda, matagiragsakyo latta ti panangasaba iti publiko.

9. Apay nga ikagumaantayo a kasabaan dagiti tattao sadinoman ti pakasarakantayo kadakuada?

⁹ Pagayatan ni Jehova a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Gapuna, ikagumaantayo nga idanon ti mensahe ti Pagarian iti adu a tattao aginggat’ mabalin sakbay a dumteng ti panungpalan. (Mat. 24:14) Iti adu a lugar, manmano a madanon dagiti tattao iti pagtaenganda. Ngem nalabit makasaritatay ida no addada iti publiko. Mabalin a ti panangasaba laeng iti publiko ti pamay-an tapno mangngegan ti dadduma ti naimbag a damag. Gapuna, naan-anay koma nga itungpaltayo ti ministeriotayo babaen ti panangasaba kadagiti tattao sadinoman a pakasarakantayo kadakuada.—2 Tim. 4:5.

[Kahon iti panid 5]

Masapul ti Kooperasion

Napaliiw a no dadduma, adda dagiti agibumbunannag kadagiti agaassideg a kongregasion a mangaskasaba iti publiko iti maymaysa a kalsada, paradaan, ken sango ti lugar ti negosio wenno iti terminal dagiti pangpubliko a lugan. Dagiti agibumbunannag iti agduduma a kongregasion mangibatida kadagiti magasin iti maymaysa a lobby wenno waiting area, ken mangasabada iti maymaysa a lugar ti negosio. No dadduma, dayta ti pakarurodan dagiti negosiante ken dagiti agnanaed iti asideg, uray no agduduma a tiempo ti panangasaba dagiti agibumbunannag. Gapuna, nasaysayaat no iti laeng sakup ti teritoria ti kongregasion ti pangasabaantayo iti publiko.

No kayat dagiti agibumbunannag ti mangasaba iti publiko iti teritoria ti kabangibang a kongregasion, masapul a makisaritada iti manangaywan ti serbisio. Kalpasanna, ti manangaywan ti serbisio kontakenna ti manangaywan ti serbisio ti kabangibang a kongregasion tapno dumawat iti pammalubos sakbay a mangasabada. No mangaskasaba dagiti kongregasion nga agus-usar iti sabali a lengguahe iti isu met la a lugar, masapul nga adda komunikasion dagiti manangaywan ti serbisio tapno saan a masuron dagiti tattao. No adda kooperasion, amin a banag ket maaramid a “sitatakneng ken sigun iti urnos.”—1 Cor. 14:40.

[Ladawan iti panid 6]

[Ladawan iti panid 6]