Epektibo a Panangasaba Kadagiti Publiko a Lugar
1. Kas panangtulad kadagiti Kristiano idi umuna a siglo, kasano nga ikagkagumaan dagiti Kristiano ita ti mangasaba kadagiti publiko a lugar, ket ania ti resultana?
1 Kas kadagiti nagkauna nga adalan ni Jesus, ikagkagumaan dagiti Kristiano ita nga iranud ti naimbag a damag kadagiti tattao iti sadinoman a pakasarakan kadakuada. (Ara. 16:13; 17:17; 20:20, 21) Kas resulta ti panangasabada kadagiti publiko a lugar, makasarsarakda kadagiti interesado a nalabit saanda a pulos madanon no mamalaybalayda.
2. Apay a nasken ti panagannad no mangaskasaba kadagiti publiko a lugar, ken ania ti mabalin nga aramiden tapno naurnos ti panangasabatayo kadagita a lugar?
2 Nasken ti panagannad no mangaskasaba kadagiti publiko a lugar. Kaaduanna, kasayaatan nga aramiden dayta iti wagas a di madmadlaw. Kas pagarigan, no nakaad-adu nga agibumbunannag ti mangasaba iti maysa a lugar wenno sumarungkar kadagiti isu met laeng a lugar ti negosio, mabalin a dillawen dagiti dadduma a tattao ti kaaddatayo. Apektaran daytoy ti dignidad ti trabahotayo ken mabalin a saan unay nga epektibo. Ania ti mabalin nga aramiden tapno saan a mapasamak daytoy? Dagiti dadduma a kongregasion nga adu ti teritoriada a publiko a lugar, natakuatanda a makatulong ti panangorganisar kadagitoy a lugar kadagiti indibidual a teritoria. (1 Cor. 14:40) Kanayonanna, naurnos ti trabahotayo no ti laeng naituding a teritoria ti kongregasiontayo ti pangasabaantayo malaksid no adda dagiti masnup nga urnos nga inaramid ti Komite ti Serbisio ti Kongregasion a tumulong iti sabali a kongregasion.—Kitaenyo ti Enero 1999 a Ti Ministeriotayo iti Pagarian, p. 5, par. 18-19.
3. Ania nga epektibo a pamay-an ti natakuatan dagiti dadduma iti panangasaba kadagiti publiko a lugar?
3 Iyaasideg Kadagiti Tattao: Idi kinasarita ni Jesus ti maysa a babai iti abay ti bubon, inrugina babaen ti apagbiit a panangdakamatna iti maysa a banag ket in-inut nga inyat-atiddogna ti nakisarita idi makitana nga interesado ti babai. (Juan 4:7-26) Epektibo met ita ti kastoy a pamay-an kadagiti dadduma a kasasaad. Natakuatan dagiti dadduma nga agibumbunannag a tapno ad-adda nga epektibo ti panangasabada kadagiti publiko a lugar, makatulong ti panangkablaaw nga umuna kadagiti tattao ken panangipakita iti personal nga interes kadakuada sakbay nga iranudda ti mensahe maipapan iti Pagarian. Mangdakamatda iti topiko a pakaseknan dagiti lumugar, a masansan a mangiturong iti saritaan. Denggenda a naimbag ti ibaga dagiti sabsabali. Di agbayag, iranranuddan ti liwliwa manipud iti Sao ti Dios.—Roma 15:4.
4. Kasano a maparayraytayo ti interes ti maysa a tao?
4 Panangparayray iti Interes: Tunggal adda masarakantayo a sidadaan a makisarita, ikagumaantayo ti mangaramid kadagiti urnos tapno parayrayen ti interesna. Kasanotayo a maaramid daytoy? No agngudon ti saritaan, mabalinyo nga iruar ti kuadernoyo sa ibagayo ti kastoy: “Maragsakanak iti panagsaritata. Adda ngata pamay-an tapno maituloyta ti agsarita iti sabali a gundaway?” Wenno: “Kayatko a mabasam ti maysa nga artikulo a siguradok a magustuam. Mabalinko kadi nga itulod idiay balayyo wenno idiay opisinayo?” Dagiti dadduma nga agibumbunannag damagenda laeng: “Mabalin kadi nga alaen ti numero ti teleponoyo?” Masansan a paborable ti sungbat dagiti tattao.
5. Ania ti ikagumaantayo nga aramiden no mangaskasabatayo kadagiti publiko a lugar?
5 Adu kadagiti nakasabaan nga umuna kadagiti publiko a lugar ti nagpayadal iti Biblia. Mabalin nga angayen dagiti kasta a panagadal iti pagtaengan, panggedan, iti maitutop a publiko a lugar, wenno babaen ti telepono. Sapay koma ta ikagumaantayo ti mangirugi kadagiti panangyadal iti Biblia babaen ti epektibo a panangasaba kadagiti publiko a lugar.