Makapagagar ken Baro a Pamay-an ti Panangasaba iti Publiko
1. Ania ti naiparegta kadagiti kongregasion nga addaan iti teritoria nga adu ti matataona?
1 Naiparegta kadagiti kongregasion nga addaan kadagiti teritoria nga adu ti matataona a mangorganisarda iti panangasaba iti publiko, babaen ti panangusarda iti lamisaan wenno cart. No cart ti mausar, mabalin a maysa laeng nga agibumbunannag ti agtakder wenno agtugaw iti abay dayta. Ngem no lamisaan, dua nga agibumbunannag ti agbantay. Masapul nga ikagumaan dagidiay agbantay kadagiti displey ti agbalin a naisem, mannakigayyem, ken nalaka a maasitgan. No adda aginteres iti displey, mabalin a kasarita ti maysa nga agibumbunannag. Nalabit ibagana, “Napampanunotyo kadin no ania ti kuna ti Biblia maipapan iti dayta a topiko?” Ti maysa wenno dua pay nga agibumbunannag ket agpuesto iti saan unay nga adayo tapno mangasaba iti di pormal.
2. Mangisalaysaykayo iti kapadasan a mangipakita iti kinapateg ti panangasaba iti publiko babaen ti lamisaan wenno cart.
2 Adu ti nayadalan iti Biblia gapu iti daytoy a pamay-an. Adda maysa nga estudiante iti kolehio a kayatna ti mangaramid iti thesis maipapan kadagiti Saksi ni Jehova, ngem awan ti nabirokanna a Kingdom Hall. Iti simmaganad a lawas, adda nakitana a lamisaan a nakaikabilan dagiti literaturatayo iti kampusda. Nairugi a nayadalan ti estudiante, ket ita, bautisadon nga agibumbunannag ken makiramramanen iti dayta a kita ti panangasaba.
3. Ania ti makuna ti dadduma maipapan iti daytoy a pamay-an ti panangasaba iti publiko?
3 Kinuna ti maysa a kabsat a babai a maragragsakan iti daytoy a kita ti panangasaba iti publiko: “Adda dagiti agsardeng iti displey tapno mangalada kadagiti kaudian a magasin. Adda met dagiti saan pay a nakangngeg iti maipapan kadagiti Saksi ni Jehova. Nadlawko nga adu ti makasabaan iti kastoy a pamay-an.” Kinuna ti sabali pay a kabsat a babai: “Makapagagar daytoy a baro a pamay-an ti panangasaba gapu ta umasideg kenka dagiti tattao, ken adda dagiti agusioso uray no saanda unay nga interesado.”
4. Apay a nasayaat no maipuesto ti lamisaan wenno cart iti isu met laeng a lokasion iti kada lawas?
4 Nasayaat no maipuesto ti lamisaan wenno cart iti isu met laeng a lokasion, aldaw, ken oras iti kada lawas. Kas resultana, mairuam dagiti tattao a makakitkita kadagiti displey ken saandanton a mabain nga umasideg ken agsaludsod wenno mangala iti literatura. Adda kadin ti naorganisar a panangasaba iti publiko iti kongregasionyo? No addan, mabalin a kayatyo ti makiraman iti daytoy a makaparagsak ken nabunga a pamay-an ti ‘panangideklara a sisasaknap iti Pagarian ti Dios.’—Luc. 9:60.