No Kasano ti Mangasaba Babaen ti Pagidispleyan iti Literatura

Ti panangasaba babaen ti lamisaan wenno cart a pagidispleyan kadagiti literatura ket talaga nga epektibo a mangyasideg kadagiti nasingpet a tattao iti kinapudno. (Juan 6:44) Gapuna, naiparegta kadagiti panglakayen a mangorganisarda iti panangasaba iti publiko kadagiti lugar nga aduan iti aglabas a tattao a sakup ti teritoria ti kongregasionda. Gapu ta mayakar-akar dagiti de pilid a pagidispleyan, kadawyanna a saanen a kasapulan ti dumawat iti pammalubos iti autoridad. Siasino ti kualipikado a makiraman? Dagiti agibumbunannag a nasayaat ti panagdesdesisionna, mararaem ti panaglanglanga ken panagtigtignayna, ken nalaing a makisarita. Dagitoy dagiti aramiden ken saan nga aramiden a makatulong kadagiti agibumbunannag tapno ad-adda nga epektiboda.

Aramiden:

Agbalin a mannakigayyem, sidadaan a makisarita, ken manangtulong kadagiti aglabas. Dadduma nga agibumbunannag ti naimpusuan nga agisem ken nainggayyeman a kumablaaw. No adda kumitkita iti displey bayat a lumablabas, mabalinyo nga ibaga, “Mabalinmo ti mangala no kayatmo.”
Agtakder iti kaus-ustuanna a distansia manipud iti displey. Iti dadduma a lugar, nakita dagiti agibumbunannag a nasayaat ti resultana no agtakderda iti asideg ti displey. Ngem nadlaw ti dadduma a no kasta ti aramidenda, agpangadua nga umasideg dagiti aglabas isu nga agpuestoda iti medio ad-adayo ket agurayda agingga nga adda sumardeng iti displey. No adda umasideg iti displey, ikagumaanyo a kasarita, nalabit babaen ti panangibagayo iti “Napampanunotyo kadin dayta a saludsod?”
Usaren ti Biblia aginggat’ mabalin.
Ilawlawag ti urnos a panagadal iti Biblia iti asinoman a mangala iti maysa kadagiti publikasiontayo a maus-usar iti panangyadal iti Biblia, a kas iti libro nga Isursuro ti Biblia. Iyopreseryo nga ipabuya iti electronic device ti video nga Apay nga Adalem ti Biblia?
Alaen ti impormasion maipapan iti pangkontakan kadagiti interesado no posible. No ti maysa ket saan nga agnanaed iti sakup ti teritoriayo, punnuan ti porma a Please Follow Up (S-43) sa itedyo a dagus iti sekretario agingga a posible.