Iti Ania a Nakadepende ti Masakbayam?
Adu ti mamati a konkontrolen dagiti di makita a puersa ti masakbayanda. Gapu iti dayta, sursurotenda dagiti ar-aramid a ti panagkunada, mangted kadakuada iti suerte wenno mangpasayaat iti biagda.
TI PATIEN TI ADU
ASTROLOHIA: Patien ti dadduma a nakadepende ti masakbayanda iti posision dagiti bituen idi nayanakda. Agbasada kadagiti horoscope tapno maammuanda ti masakbayanda ken ti masapul nga aramidenda ken ti liklikanda tapno agballigida.
FENG SHUI: Patien ti dadduma a no ibatayda ti disenio ti aglawlawda kadagiti di makita a puersa ti nakaparsuaan, sumrek ti suerte ken agballigida. Imbaga ni Lo Winga a taga-Hong Kong, “Imbaga kaniak ti maysa a feng shui master nga umadu ti kuartak no agikabilak iti espesial a kristal iti maysa nga espesipiko a lugar iti paglakuak.”
PANAGDAYAW ITI INAPO: Patien met ti dadduma a masapul nga ay-aywenda dagiti natayen nga inapoda wenno ti dadduma pay a didiosen tapno maprotektaran ken mabendisionanda. Kuna ni Van a taga-Vietnam, “Patiek a no pagdayawak dagiti inapok, nasayaat ti biagko ita ken sigurado ti masakbayak ken dagiti annakko.”
REINKARNASION: Adu ti mamati nga awan patingga ti siklo ti biag ti tao—matay sa mayanakto manen. Patienda a ti mapadpadasanda ita, nasayaat man wenno dakes, ket resulta ti inar-aramidda iti napalabas a biagda.
Ngem para iti adu, kadaanan dayta a pampammati. Nupay kasta, patienda latta ti panagpalad, horoscope, Ouija® board, tarot card, ken dadduma pay. Para kadakuada, posible a makatulong dagita tapno maammuanda ti masakbayanda.
ANIA TI RESULTANA?
Agpayso kadi a naragsak ti biag ken nasayaat ti masakbayan dagidiay agtaltalek kadagiti kasta a patpatien ken ar-aramid?
Kitaem ti kapadasan ni Hào a taga-Vietnam. Nagtalek iti astrolohia, feng shui, ken panagdayaw iti inapo. Nagballigi kadi? Imbaga ni Hào, “Nabangkrapak, nailumlomak iti utang, problemado ti pamiliami, ken nadepresak.”
Mamati met idi ni Qiuming a taga-Taiwan iti astrolohia, reinkarnasion, gasat, feng shui, ken panagdayaw iti inapo. Ngem idi inadalna a naimbag dagita a patpatienna, imbagana: “Nabigbigko a dagita a sursuro ken kostumbre ket agkokontra ken makariro. Nakitak a kaaduanna a saan met a mapasamak ti ibagbaga ti horoscope. No maipapan met iti reinkarnasion, kasano koma a makapagbalbaliwka iti sumaruno a biagmo no saanmo metten a malagip ti dati a biagmo?”
“Nabigbigko a dagita a sursuro ken kostumbre ket agkokontra ken makariro.”—QIUMING, TAIWAN
Kas iti nabigbig ni Hào, ni Qiuming, ken ti adu pay, saan a nakadepende ti masakbayantayo iti gasat, kadagiti bituen, kadagiti natayen nga inapo, wenno iti pannakayanak manen. Kayatna kadi a sawen nga awan ti maaramidantayo para iti masakbayantayo?
Patien ti adu a tapno garantisado ti masakbayanda, mangalada iti nangato nga edukasion ken agpabaknangda. Ania ti napasamak kadagiti kasta ti pinilida?
a Nabaliwan ti dadduma a nagan iti daytoy nga artikulo ken kadagiti sumaruno.
b Daytoy a sasao ket makita iti Nasantuan a Biblia iti Galacia 6:7. Kas met la dayta iti popular a pagsasao dagiti taga-Daya: “No agmulaka iti melon, agapitka iti melon; no agmulaka iti balatong, agapitka iti balatong.”