Maawanton ti Gura iti Agnanayon!
Uray no naikkattayon ti gura iti pusotayo, saantayo a makontrol ti ar-aramid ken ug-ugali ti dadduma. Agtultuloy a magurgura dagiti inosente a tattao. Ania ngarud ti permanente a makaikkat iti gura?
Ni laeng Jehova a Dios ti interamente ken permanente a makapasardeng iti panagwaras ti gura a makitkitatayo ita. Dayta ti eksakto nga ikarkari ti Biblia nga aramidento ti Dios.—Proverbio 20:22.
IKKATENTO TI DIOS TI RAMUT TI GURA
1. NI SATANAS A DIABLO. Ni Satanas, ti rebelioso nga anghel, ti promotor ti gura iti lubong. Ti Dios dadaelennanto ni Satanas ken ti amin nga im-impluensiaanna a gumura.—Salmo 37:38; Roma 16:20.
2. TI NAPNUAN-GURA A LUBONG NI SATANAS. Interamente nga ikkatento ti Dios ti amin a paggapgapuan ti gura iti lubong, pakairamanan dagiti kurakot a politiko ken lider ti relihion. Ikkatennanto met dagiti kurakot ken naagum a komersio a manglukluko kadagiti tattao.—2 Pedro 3:13.
3. KINAIMPERPEKTO. Ibagbaga ti Biblia a natawid ti amin a tattao ti kinaimperpekto—ti tendensia nga agpanunot, makarikna, ken agaramid iti di umiso. (Roma 5:12) Karaman kadagita ti panagipempen iti sakit ti nakem ken panangiparikna iti gura iti dadduma. Tulonganto ti Dios dagiti tattao a manglaban kadagiti tendensiada tapno awanton ti uray bassit a pakakitaan iti gura iti agnanayon.—Isaias 54:13.
IKARKARI TI BIBLIA A MAPUKAWTON TI GURA ITI LUBONG
1. AWANTON TI BIKTIMA ITI KINAAWAN HUSTISIA. Ti lubong ket iturayanto ti Pagarian ti Dios, maysa a nailangitan a gobierno nga awan ti idumdumana ken agturay iti agnanayon. (Daniel 2:44) Awanton ti panangidumduma ken gura. Ilintegto ti Dios ti amin a kinaawan hustisia a mapadpadasan dagiti tattao ita.—Lucas 18:7.
2. MARIKNANTON TI AMIN TI TALNA. Awanton ti marigatan gapu iti kinaranggas ken gubat. (Salmo 46:9) Mannakikappianton ti amin a tao ditoy daga isu nga awanton ti pagbutnganda.—Salmo 72:7.
3. AGBIAGTON NGA AGNANAYON TI AMIN ITI PERPEKTO A KASASAAD. Agiinnayatton ti amin a tattao iti intero a daga. (Mateo 22:39) Awanton ti agrigat. Awanto metten ti madagdagsenan gapu kadagiti napait a napalabas. (Isaias 65:17) Inton awanen ti gura, perminton ti ragsak ti amin gapu iti “naruay a talna.”—Salmo 37:11.
Kayatmo kadi ti agbiag iti kasta a lubong? Uray ita, malablabananen ti adu a tattao ti gura ta sursurotenda dagiti prinsipio ti Biblia. (Salmo 37:8) Kasta ti ar-aramiden ti minilion a Saksi ni Jehova iti intero a lubong. Agduduma man ti kultura ken naggappuanda a nasion, adda ayat ken panagkaykaysada kas iti maysa a pamilia.—Isaias 2:2-4.
Maragsakan dagiti Saksi ni Jehova a mangipakaammo iti dadduma ti nasursuroda no kasano a malabanan ti kinaawan hustisia ken diskriminasion. Makatulong dagiti maadalmo tapno in-inut a masuktan iti ayat ti gura nga adda iti pusom. Madiskobrem no kasano ti nasayaat a panangtrato iti amin a tao uray dagidiay kasla saan a managyaman wenno dagidiay mangipakpakita iti gura. Kas resultana, agbalinka a naragragsak ita ken sumayaat ti relasionmo iti dadduma. Kangrunaan iti amin, maammuam no ania ti aramidem tapno maysakanto nga iturayan ti Pagarian ti Dios inton ikkatenna ti gura iti agnanayon.—Salmo 37:29.
a Available iti dadduma a lengguahe