2 | “Liwliwa Manipud iti Kasuratan”

TI KUNA TI BIBLIA: “Amin a naisurat ket nasaksakbay a naisurat a pakasursuruantayo, tapno maaddaantayo koma iti namnama babaen ti panagibturtayo ken babaen ti liwliwa manipud iti Kasuratan.”—ROMA 15:4.

Ti Kaipapananna

Naglaon ti Biblia kadagiti makaliwliwa a sasao a makatulong kadatayo no negatibo ti mapampanunottayo. Ipanamnama met ti Biblia nga asidegen a maawan dagiti nasaem a marikriknatayo.

No Kasano a Makatulong

Makariknatayo amin iti danag no dadduma; ngem dagidiay addaan iti depresion wenno anxiety disorder ket mabalin nga inaldaw nga ib-ibturanda dagiti nasaem ken naliday nga emosionda. Kasano a makatulong ti Biblia?

Naglaon ti Biblia kadagiti positibo a sasao a mangsukat kadagiti negatibo a pampanunotentayo. (Filipos 4:8) Talaga a kabaelanna a liwliwaen ken pagkalmaen ti isiptayo tapno makontroltayo ti emosiontayo.—Salmo 94:18, 19.
Matulongannatayo ti Biblia a manglaban iti riknatayo a kasla awan serserbitayo.—Lucas 12:6, 7.
Adu a teksto iti Biblia ti mangipasigurado a saantayo nga agmaymaysa ken naan-anay a maawatan ti Dios, ti Namarsua kadatayo, ti marikriknatayo.—Salmo 34:18; 1 Juan 3:19, 20.
Ikarkari ti Biblia nga ikkatento ti Dios iti lagiptayo dagiti nasaem a napadasantayo. (Isaias 65:17; Apocalipsis 21:4) No maburburiboran ti panunottayo ken madagdagsenantayo gapu iti emosiontayo, makatulong daytoy a kari tapno bumilegtayo ken tapno saantayo a sumuko.

No Kasano a Makatulong ti Biblia—Jessica

Ti Epektona Kaniak ti Depresion

“Idi 25 anyosak, grabe ti panagnernerbiosko ken nadayagnos a nakaro ti depresionko. Biglabigla lattan a sumrek iti panunotko dagiti nasaem a napalabasko. Inlawlawag dagiti doktor a ti depresionko ket konektado iti panagpampanunotko iti negatibo gapu kadagiti makapa-trauma a napasamak iti biagko. Malaksid iti panagtomarko kadagiti naireseta nga agas, kinasapulak met ti makisarita iti espesialista tapno maammuak ken mabalbaliwak ti negatibo a taray ti panagpampanunotko.”

No Kasano a Matultulongannak ti Biblia

“No kakaro ti depresionko, diakon makontrol ti butengko, nagkaro ti panagdandanagko, ken saanakon a makaturog. Kaaduanna iti rabii, kasla mabambannogak gapu iti aglalaok a tumartaray iti panunotko. Kas ibaga ti Salmo 94:19, liwliwaen ken paragsakennatayo ti Dios no pakapsutennatayo ti panagdandanagtayo. Isu nga iyab-abayko iti pagiddaak ti Bibliak ken ti notebook-ko a nangisuratak kadagiti makapabileg a teksto. No saanak a makaturog, agbasaak kadagiti teksto, tapno sumrek iti panunotko dagiti makaliwliwa a sasao ti Dios.

“Parparegtaennatayo ti Biblia nga ikkatentayo dagiti di umiso a pampanunotentayo maipapan iti Dios. Dati, talaga a nariknak nga awan serserbik ken saanak a maikari a maayat. Ngem naadalko a dagita a pagarupko ket talaga a maikontra iti isursuro ti Biblia a ti Dios ket naayat ken naasi nga Ama a mangipatpateg iti tunggal maysa kadatayo. In-inut a nakontrolko ti panagpampanunotko. Diak impalubos a ti panunotko ti mangkontrol kaniak. Nasursurok a kitaen ti bagik a kas iti panangkita kaniak ti Dios. Maysa daytoy a nagdakkel a nakatulong kaniak tapno maikkatko ti negatibo a panangmatmatko iti bagik.

“Padpadaanak ti tiempo inton saanen a maipalagip ti amin a nasaem a napalabasko ken saanen a negatibo ti taray ti panunotko. Ammok nga awanton dagiti sakit iti isip iti masanguanan. Daytoy ti tumultulong kaniak a saan a sumuko ita ken mangnamnama nga awanton ti depresion iti masanguanan.”