Dagiti Masursurom iti Libro a Job no Agsagsagabaka

1-2. Ania ti dadduma a rason no apay a nasayaat a basaentayo ti libro a Job?

NABIIT pay kadi a binasam ti libro a Job? Uray no naisurat dayta agarup 3,500 a tawenen ti napalabas, adu latta ti mangibilang iti dayta a nagkauna a libro kas maysa kadagiti kasayaatan a naisurat. Apay? Ngamin, makaay-ayo ken nalaka a maawatan dagiti sasao a nausar ken mangtukay pay ketdi iti puso. Sigun iti maysa a reperensia, inawaganna ti nangisurat iti libro a Job kas “nakalalaing a mannurat.” Ni Moises ti nangisurat iti daytoy a naisangsangayan a libro. Ngem ti talaga nga Autorna ket ni Jehova a Dios.—2 Tim. 3:16.

² Nagpateg a paset ti Biblia ti libro a Job. Apay? Ti maysa a rason ket nalawag nga ipakaammona ti nagpateg nga isyu a nakairamanan ti amin nga anghel ken tattao—ti pannakasantipikar ti nagan ni Jehova. Isurona met kadatayo dagiti nagsasayaat a kualidad ni Jehova, kas iti ayat, sirib, hustisia, ken pannakabalinna. Kas pagarigan, mamin-31 a daras a mabasa iti libro a Job ti “Mannakabalin-amin” a tumukoy ken Jehova. Ad-adu dayta uray no mapagtitipon ti amin a nakadakamatanna iti dadduma pay a libro ti Biblia. Sungbatan met ti libro a Job dagiti napateg a saludsod iti biag a kayat dagiti tattao a masungbatan kas iti: Apay nga ipalpalubos ti Dios ti panagsagaba wenno panagrigrigat?

3. Ania pay dagiti masursurotayo no adalentayo ti libro a Job?

³ Ipapanmo nga umul-ulika iti bantay. No nakadanonkan iti tuktok, nalawag a matannawagam ti aglikmutmo. Kasla kasta met laeng no basaentayo ti libro a Job. Bayat nga umad-adu ti maammuantayo, nalawlawag a makitatayo ti panangmatmat ni Jehova no apay nga agrigrigattayo. Kitaentayo no kasanonatayo a matulongan ti libro a Job no agrigrigattayo. Ammuentayo met no kasano a posible a nagunggonaan dagiti Israelita iti pakasaritaan ni Job ken no kasanotayo met a magunggonaan ita. Ammuentayo pay no kasanotayo nga usaren dayta a salaysay ti Biblia tapno matulongantayo ti dadduma.

IMPALUBOS TI DIOS NGA AGRIGAT NI JOB

4. Kasano a naiduma unay ni Job kadagiti Israelita idiay Egipto?

⁴ Agnanaed ni Job iti Uz idi naadipen dagiti Israelita idiay Egipto. Ti Uz ket posible nga adda iti dayaen ti Naikari a Daga ken iti umamianan nga Arabia. Saan a kas kadagiti Israelita a nagdaydayaw kadagiti idolo idiay Egipto, naiduma unay ni Job ta simamatalek a nagserbi ken Jehova. (Jos. 24:14; Ezek. 20:8) Kastoy ti imbaga ni Jehova maipapan ken Job: “Awan kapadana iti daga.”a (Job 1:8) Nakabakbaknang ken mararaem unay ni Job. Kinapudnona, isu idi ti maibilbilang a katan-okan iti amin a tao iti Daya. (Job 1:3) Isu nga idi nakita ni Satanas daytoy a lalaki nga agserserbi iti Dios nga awan pagkuranganna, nakapungtot la ketdi unay!

5. Apay nga impalubos ni Jehova nga agrigat ni Job? (Job 1:20-22; 2:9, 10)

⁵ Imbaga ni Satanas a no agrigat ni Job, isardengna kanon ti agserbi ken Jehova. (Job 1:7-11; 2:2-5) Dayta a nakaro a panangkarit ni Satanas iti Dios ket nangpataud iti adu a napateg nga isyu. Isu nga uray no ipatpateg unay ni Jehova ni Job, pinalubosanna ni Satanas a mangpaneknek no umiso ti ibagbagana. (Job 1:12-19; 2:6-8) Ania ti inaramid ni Satanas? Gapu kenkuana, napukaw ti amin a taraken ni Job. Pinatayna met ti 10 nga annakna. Kalpasanna, pinagsakitna iti naut-ot a busali manipud iti dapan agingga iti tuktok ti ulona. Ngem nagballigi kadi ni Satanas a mangdadael iti kinamatalek ni Job ken Jehova uray no nakaro ti panangparigatna kenkuana? Pulos! (Basaen ti Job 1:20-22; 2:9, 10.) Idi agangay, insubli met laeng ni Jehova ti salun-at, kinabaknang, ken reputasion ni Job. Inikkanna pay iti 10 a sabali pay nga annak. Saan la a dayta. Pinaatiddog met ni Jehova ti biag ni Job iti 140 a tawen isu a nakitana pay dagiti annak ken appokona iti uppat a henerasion. (Job 42:10-13, 16) Kasano a posible a nakatulong daytoy a salaysay kadagiti adipen ti Dios idi, ken kasano met a makatulong kadatayo ita?

6. No naammuan dagiti Israelita ti pakasaritaan ni Job, kasano a posible a nakatulong dayta kadakuada tapno maawatanda no apay nga ipalpalubos ti Dios ti panagrigrigat? (Kitaen met ti ladawan.)

⁶ No kasano a posible a nagunggonaan dagiti Israelita. Nakarigrigat ti biag dagiti Israelita idiay Egipto. Kas pagarigan, nagbalin da Josue ken Caleb nga adipen sipud idi agtutuboda pay. Ti agpayso, awan met ti basolda. Ngem nairamramanda a nagpagnapagna iti let-ang nga awan ti masnup a turongenda iti las-ud ti 40 a tawen. No naammuan dagiti Israelita ti pakasaritaan ti pammati ni Job, sigurado la ketdi a nakatulong dayta kadakuada ken uray kadagiti simmaruno a henerasion. Kasano? Maawatanda a ni Satanas ti makinggapuanan iti panagrigrigatda, saan ketdi a ti Dios. Maawatanda met no apay nga ipalpalubos ni Jehova ti panagrigrigat ken no kasano kapateg kenkuana ti kinamatalek ti maysa.

7-8. Kasano a matulongannatayo ti libro a Job no maipasangotayo iti rigat? Mangdakamat iti kapadasan.

⁷ No kasano a magunggonaantayo ita. Makapaladingit ta adu a tattao ti saanen a mamati iti Dios gapu ta saanda a maawatan no apay a mapaspasamak ti dakes kadagiti naimbag a tattao. Kitaentayo ti kapadasan ni Hazelb a taga-Rwanda. Idi ubing pay, mamati met iti Dios. Ngem nagbalbaliw ti kasasaadna. Nagdiborsio dagiti nagannakna isu a ti nangpadakkel kenkuana ket ti stepfather-na. Ngem daydiay laeng ta saan a nasayaat ti panangtratona kenkuana. Idi tin-edyer pay ni Hazel, adda nang-rape kenkuana. Idi met napan iti simbaanda tapno maliwliwa koma, napaay laeng. Isu a napanunotna ti agaramid iti surat para iti Dios. Imbagana: “Apo Dios, agkarkararagak met kenka, nasingpetak met a tao. Ngem apay a dakes ti isubsubadmo kaniak? Isu a panawankan. Aramidek lattan ti ammok a mangparagsak kaniak.” Kas ken Hazel, adu met a tattao ti kinaulbod ti naammuanda maipapan iti Dios ken mamatida nga isu ti makimbasol iti panagrigrigatda. Maasiantayo la unay kadakuada ta saanda nga ammo ti kinapudno maipapan iti Dios isu a kayattayo la ketdi a tulongan ida.

⁸ Naammuantayo iti libro a Job a saan a ti Dios ti makimbasol iti panagrigrigattayo, no di ket ni Satanas! Naammuantayo met a no agrigrigat ti maysa, saantayo koma nga ipapan a baka adda dakes nga ar-aramidenna. Ibaga ti Biblia a “ti tiempo ken di ninamnama a pasamak” ket mabalin a dumteng iti asinoman ken iti aniaman a tiempo. (Ecl. 9:11; Job 4:1, 8) Nasursurotayo pay a no agtalinaedtayo a matalek ken Jehova uray adda dagiti pakarigatan, makatulongtayo a mangpaneknek nga ulbod ni Satanas. (Job 2:3; Prov. 27:11) Isu nga arig petpetantayo koma a naimbag dagitoy a nasursurotayo gapu ta naawatantayon no apay nga agrigrigattayo ken dagiti ipatpategtayo. Idi agangay, nakipagadal ni Hazel kadagiti Saksi ni Jehova isu a naawatanna a saan a ti Dios ti makimbasol iti panagrigrigatna. Imbagana: “Nagkararagak manen iti Dios ket imbagak ti amin a marikriknak. Imbagak ken Jehova nga idi naibagak a panawakon isuna, saanko met a talaga a kaya nga aramiden dayta. Naibagak lang met daydiay ta saanko pay met nga am-ammo isuna idi. Ngem ita, ammokon nga ay-ayatennak ni Jehova isu a naragsak ken kontentoakon.” Anian a yamantayo ta naammuantayo no apay nga ipalpalubos ti Dios ti panagrigrigat! Pagsasaritaantayo itan no kasano a makatulong ti pakasaritaan ni Job iti tunggal maysa kadatayo no maipasangotayo iti rigat.

NO KASANO A MAKATULONG KADATAYO NGA AGIBTUR TI PAKASARITAAN NI JOB

9. Kasanom nga iladawan ni Job bayat a nakatugaw iti dapo? (Santiago 5:11)

⁹ Imadyinem ni Job a nakatugaw iti dapo. Napno ti bagina iti busali nga uray la nakarukoben gapu iti napalalo nga ut-ot a marikriknana. Nakakutkuttongen ken nakalitlitem payen ti kudilna nga uray la agkupkuplaten. Naibusen ti pigsa ni Job. Ti la kayanan nga aramiden ket agtugaw ken kudkoden ti bagina babaen ti nabuong a paset ti banga. Dina malapdan ti bagina a mangyebkas iti sakit a marikriknana. Ngem saan la a basta inibturan ni Job ti panagrigrigatna, nagtalinaed met a matalek. (Basaen ti Santiago 5:11.) Ania ti nakatulong kenkuana nga agibtur?

10. Ania ti mangipakita a nasinged ni Job ken Jehova?

¹⁰ Imbaga ni Job ti amin a marikriknana ken Jehova. (Job 10:1, 2; 16:20) Kas pagarigan, mabasatayo iti kapitulo 3 a nagreklamo ni Job ken Jehova gapu ta kasla nagtupak ti langit kenkuana. Impapanna pay ketdi a ni Jehova ti makinggapuanan iti panagrigrigatna. Sa idi maulit-ulit nga imbaga ti tallo a peke a gagayyemna a dusdusaen kano ti Dios gapu kadagiti basolna, kombinsido a nalinteg isuna. Ipakita pay ketdi dagiti imbagana nga adda idi gundaway nga imbilangna a nalinlinteg isuna ngem iti Dios. (Job 10:1-3; 32:1, 2; 35:1, 2) Idi agangay, nabigbig ni Job a gapu ta kayatna nga idepensa ti kinamatalekna, ‘ti la adda a naibagbagana.’ (Job 6:3, 26) Sa iti kapitulo 31, mabasatayo a kayat ni Job a sungbatan isuna ti Dios ken imbagana a saan a rumbeng a madusa. (Job 31:35) Ngem siempre, saan nga umiso nga impapilit ni Job nga ilawlawag ti Dios no apay nga agrigrigat isuna.

11. Ania ti reaksion ni Jehova kadagiti imbaga ni Job maipapan iti kinamatalekna?

¹¹ Naawatantayon no apay a naibaga latta ni Job ken Jehova ti amin a marikriknana. Nasinged ngamin ken Jehova ken ammona a patas ti panangukomna. Idi agangay, sinungbatan ni Jehova ni Job babaen ti napigsa nga angin. Ngem saanna nga imbaga ti amin a rason no apay nga agrigrigat. Saanna met a dinusa wenno inungtan ni Job gapu ta imbagana ti marikriknana. Imbes ketdi, kas naayat nga ama, inlinteg ni Jehova ti pampanunot ni Job. Ket dayta ti kasayaatan a tulong para kenkuana. Kas resultana, sipapakumbaba a binigbig ni Job a saanna met gayam nga ammo ti amin, isu a pinagbabawyanna dagiti imbagana. (Job 31:6; 40:4, 5; 42:1-6) Kasano a posible a nakatulong daytoy a salaysay kadagiti Israelita ken kasano met a makatulong kadatayo ita?

12. Kasano a posible a nakatulong kadagiti Israelita ti pakasaritaan ni Job?

¹² No kasano a posible a nagunggonaan dagiti Israelita. Adu ti posible a nasursuro dagiti Israelita iti napasamak ken Job. Alaentayo a pagarigan ni Moises. Inibturanna ti adu a pakarigatan, pannakadismaya, ken pannakaupay bayat nga idadauluanna ti nasion ti Israel. Kadagita a narigat a kasasaad, ni Moises ket nagpatulong ken Jehova. Ngem naiduma dagiti rebelioso nga Israelita ta masansan a nagtanabutobda maibusor ken Jehova. (Ex. 16:6-8; Num. 11:10-14; 14:1-4, 11; 16:41, 49; 17:5) Posible a nakatulong met ken Moises ti ulidan ni Job idi inlinteg ni Jehova. Kas pagarigan, kitaentayo ti napasamak idi nagkampo dagiti Israelita idiay Kades. Mabalin nga iti maika-40 a tawen a panagpagnapagnada iti let-ang nga awan ti masnup a turongenda, “nagsao a sidadarasudos” ni Moises ken saanna a naited ken Jehova ti dayaw a maikari Kenkuana. (Sal. 106:32, 33) Kas resultana, saan nga impalubos ni Jehova a sumrek ni Moises iti Naikari a Daga. (Deut. 32:50-52) Naladingitan la ketdi unay ni Moises, ngem sipapakumbaba nga inawatna dayta. Ti pakasaritaan ni Job ket posible a nakatulong met kadagiti simmaruno a henerasion dagiti Israelita tapno maibturanda dagiti pakarigatanda. Posible a pinampanunot dayta dagiti matalek nga Israelita isu a nasursuroda no kasano nga iyebkas ken Jehova ti marikriknada ken no kasanoda a maliklikan ti agikalintegan. Posible met a nasursuroda ti agpakumbaba ken sidadaan a mangawat iti disiplina ni Jehova.

13. Kasano a makatulong kadatayo nga agibtur ti pakasaritaan ni Job? (Hebreo 10:36)

¹³ No kasano a magunggonaantayo ita. Kas Kristiano, kasapulantayo met ti agibtur. (Basaen ti Hebreo 10:36.) Kas pagarigan, baka adda nakaro a sakittayo, depresion, nakaro a panagdandanag, wenno problema iti pamilia. Baka natayantayo iti kapamilia wenno gayyem, wenno adda dadduma pay a nakaro a problematayo. No dadduma, nakarigrigat la ngaruden ti kasasaadtayo, posible nga adda pay maibaga wenno maaramid ti sabsabali a lallalo a mangdegdeg iti marikriknatayo. (Prov. 12:18) Ngem nasursurotayo iti libro a Job a mabalintayo nga ibukbok ti linaon ti pusotayo ken Jehova ken agtalek a denggennatayo. (1 Juan 5:14) Saan a makaunget kadatayo no ibagatayo ti marikriknatayo, uray no dadduma ket ‘ti la adda a maibagbagatayo’ kas ken Job. Imbes ketdi, ipaay ni Jehova ti bileg ken sirib a kasapulantayo tapno makapagibturtayo. (2 Cron. 16:9; Sant. 1:5) Mabalin met nga ilintegnatayo no kasapulan kas iti inaramidna ken Job. Tulongannatayo met ti libro a Job nga agibtur no adda maawattayo a disiplina manipud iti Sao ni Jehova, iti organisasionna, wenno kadagiti gagayyem a nataengan iti naespirituan. (Heb. 12:5-7) Nagsayaatan ni Job ti panagpakumbaba idi nailinteg. Pagsayaatantayo met no ipalubostayo nga ilintegnatayo ni Jehova. (2 Cor. 13:11) Nakapatpateg dagiti nasursurotayo maipapan iti libro a Job! Pagsasaritaantayo itan no kasanotayo nga usaren ti pakasaritaan ni Job a tumulong iti dadduma.

USAREM TI LIBRO A JOB A TUMULONG ITI DADDUMA

14. Iti ministerio, ania ti maysa a pamay-an a mailawlawagtayo no apay nga agrigrigattayo?

¹⁴ Adda kadin nakasabaam a nangisaludsod kenka iti, ‘Apay nga agrigrigattayo?’ Ania ngay ti insungbatmo? Mabalin nga impakitam iti Biblia ti napasamak iti hardin ti Eden. Baka inyestoriam pay ketdi a gapu ta inallilaw ti dakes nga anghel a ni Satanas da Adan ken Eva, nagrebeldeda iti Dios. (Gen. 3:1-6) Mabalin met nga imbagam a gapu iti dayta, agrigat ken matay ti amin a tao. (Roma 5:12) Sa inlawlawagmo nga ipalpalubos ti Dios nga aglabas ti umdas a tiempo tapno mapaneknekan nga ulbod ni Satanas. Us-usaren met ni Jehova dayta a tiempo tapno maipakaammo ti naimbag a damag nga agbiagto iti agnanayon dagiti tattao iti masanguanan. (Apoc. 21:3, 4) Maysa dayta nga epektibo a pangsungbat iti dayta a saludsod. Ket adun ti natulongan tapno maawatanda no apay nga agrigrigat dagiti nasingpet a tattao.

15. Kasanotayo nga usaren ti libro a Job a mangtulong iti maysa tapno maawatanna no apay nga agrigrigat dagiti nasingpet a tattao? (Kitaen met dagiti ladawan.)

¹⁵ Adda pay sabali a pamay-an a mailawlawagmo no apay nga agrigrigat dagiti nasingpet a tattao. Ania dayta? Ibagam ti maipapan ken Job. Komendaram nga umuna ta nagmayat ti saludsodna, sa mabalinmo nga ibaga a saan la nga isuna ti nakaisaludsoden iti kasta. Uray met idi ni Job, maysa a matalek a lalaki. Impagarupna pay ketdi a ti Dios ti makinggapuanan iti nakaro a panagsagabana. (Job 7:17-21) Baka masdaaw ti kasarsaritam a makaammo a nabayag gayamen nga isalsaludsod dayta dagiti tattao. Kalpasanna, mabalin a sitataktika nga ilawlawagmo a saan a ti Dios ti makinggapuanan iti panagrigat ni Job, no di ti Diablo. Inaramidna dagita ta kayatna a paruaren nga agserserbi laeng kano dagiti tattao iti Dios gapu kadagiti bendision a maaw-awatda. Ngem no agrigatdan, agsardengdan nga agserbi. Mabalinmo met nga inayon nga uray no saan a ti Dios ti makinggapuanan iti panagrigat ni Job, impalubosna dayta gapu ta ammona nga adda dagiti agmatalek kenkuana ken mangpaneknek nga ulbod ni Satanas. Sa mabalinmon nga ibaga a binendisionan ni Jehova ni Job gapu ta nagtalinaed a matalek. Isu a maliwliwatayo ti dadduma no ipasiguradotayo kadakuada a saan a ni Jehova ti makinggapuanan no apay nga agrigrigattayo.

16. Mangyestoriaka iti kapadasan no kasano a nakatulong ti libro a Job iti maysa nga agrigrigat.

¹⁶ Kitaentayo no kasano a nakatulong ken Mario ti libro a Job. Idi 2021, adda sister nga agtel-telephone witnessing. Ti umuna a natawaganna ket ni Mario. Imbasana kenkuana ti maysa a teksto ti Biblia sa inlawlawagna a dengdenggen ti Dios dagiti kararagtayo ken adda nasayaat a masakbayan nga isagsaganana kadatayo. Idi dinamag ti sister no ania ti maibaga ni Mario, imbagana nga idi tumawtawag ti sister, plamplanuennan ti agpakamatay ken agar-aramid payen iti pammakada a surat. Imbaga ni Mario: “Mamatiak iti Dios. Ngem itay bigat, panagriknak ket binaybay-annakon.” Iti maikadua a panagsaritada iti telepono, nagsaritaanda ti maipapan ken Job ken dagiti rigat a napasaranna. Isu a kayat ni Mario a basaen ti intero a libro a Job. Gapu iti dayta, in-send ti sister ti link ti Baro a Lubong a Patarus ti Nasantuan a Kasuratan. Ania ti resultana? Nakipagadal iti Biblia ni Mario ket kayatna la unayen a maammuan ti ad-adu pay maipapan iti Dios a mangipatpateg unay kenkuana.

17. Apay nga agyamyamanka ken Jehova ta inramanna ti libro a Job iti Saona? (Job 34:12)

¹⁷ Talaga a nakabilbileg ti Sao ti Dios ta kabaelanna a tulongan dagiti tattao agraman dagiti agrigrigat. (Heb. 4:12) Anian a yamantayo ta inraman ni Jehova ti pakasaritaan ni Job iti Saona! (Job 19:23, 24) Patalgedan kadatayo ti libro a Job a “sigurado a saan nga agaramid ti Dios iti dakes.” (Basaen ti Job 34:12.) Isurona met kadatayo no apay nga ipalpalubos ti Dios ti panagrigrigat ken no kasanotayo a maibturan dagita. Tulongannatayo met a mangliwliwa kadagiti agrigrigat. Iti sumaruno nga artikulo, pagsasaritaantayo no kasano a makatulong ti libro a Job iti panangipaay iti epektibo a balakad.