Natataengan—Bendisionkayo iti Kongregasion

Baka saanyon a maaramidan ita dagiti maar-aramidanyo idi kabambannuaganyo. Uray no nabayagen nga agserserbikayo a simamatalek ken Jehova, baka maup-upaykayo itan no ikomparayo dagiti maar-aramidanyo idi iti maar-aramidanyo ita. No kasta ti marikriknayo, ania ti makatulong kadakayo?

TI NAMNAMAEN KADAKAYO NI JEHOVA

Isaludsodyo iti bagiyo, ‘Ania ti namnamaen kaniak ni Jehova?’ Makaliwliwa ti ibaga kadatayo ti Deuteronomio 6:5: “Masapul nga ayatenyo ni Jehova a Diosyo iti amin a pusoyo ken iti amin a kararuayo ken iti amin a pigsayo.”

Sigun iti dayta a teksto, namnamaen ni Jehova nga agserbikayo kenkuana iti amin a puso, kararua, ken pigsayo. Makatulong dayta tapno saanyo nga ikompara ti bagiyo iti dadduma wenno iti maar-aramidanyo ita iti maar-aramidanyo idi kabambannuaganyo.

Panunotenyo daytoy: Idi kapigpigsaanyo, sigurado la ketdi nga impaayyo ken Jehova ti kasayaatanyo, sigun iti kasasaadyo idi. Ngem uray no nagbaliwen ti situasionyo, ipapaayyo latta ken Jehova ti kasayaatanyo sigun iti kasasaadyo ita, kayatna a sawen, dagiti kabaelanyo nga aramiden iti agdama. No dagita ti panunotenyo, maamirisyo nga ipapaayyo latta ken Jehova ti kasayaatanyo a kas iti ar-aramidenyo idi kabambannuaganyo.

ADU TI MAITULONGYO ITI SABSABALI

Daytoy pay ti nasayaat a panunotenyo: Imbes a sangkapanunotyo dagiti saanyon a maaramidan gapu iti kinalakay wenno kinabaketyon, panunotenyo dagiti mabalinyo nga aramiden ita a saanyo a naaramid idi ubingkayo pay. Kas pagarigan, mabalinyo nga aramiden dagitoy:

Iyestoriayo dagiti kapadasanyo. Kitaenyo dagitoy a teksto iti Biblia:

Ari David: “Sipud idi ubingak agingga ita a lakayakon, diak pay nakakita iti asinoman a nalinteg a nabaybay-an, wenno uray dagiti annakna nga agsapsapul iti tinapay.”—Sal. 37:25.

Josue: “Ita kitaenyo! Dandaniakon matay, ket ammoyo iti amin a puso ken iti amin a kararuayo nga awan uray maysa a sao a saan a natungpal kadagiti naimbag nga inkari kadakayo ni Jehova a Diosyo. Pimmudnoda amin para kadakayo. Awan uray maysa a sao a di natungpal.”—Jos. 23:14.

Baka naibagayo metten dayta iti dadduma. Napadasan a mismo da David ken Josue dagita nga imbagada. Napaneknekanda dagita bayat ti dinekdekadan a matalek a panagserbida ken Jehova isu a talaga a nakappapati dagiti imbagada.

No nabayagkayon nga agserserbi ken Jehova, mabalinyo met nga iyestoria iti dadduma dagiti bendision a naawatyo. Adda kadi malagipyo a tiempo a nakitayo a tinulongan ni Jehova dagiti agserserbi kenkuana iti espesial a pamay-an? Iyestoriayo dayta! No maammuan ti dadduma dagiti kapadasanyo iti panagserbiyo ken Jehova, sigurado a maparegtayo ida.—Roma 1:11, 12.

Maparegtayo met ti dadduma no makigimongkayo iti in person, agingga a kabaelanyo. Ngem saanyo la a maparegta ti dadduma, uray dakayo ket maparegta met. Imbaga ti nadakamaten a ni Connie: “No makigimgimongak, saanak a maupay. Apay koma a maupayak idinto ta permi a marikriknak ti ayat dagiti kakabsat? Gapu iti dayta, ikagkagumaak nga ipakita ti panagyamanko kadagiti kakabsat. Ik-ikkak ida kadagiti simple a regalo. Sigsiguraduek met nga itultuloyko ti makiraman kadagiti naespirituan nga aktibidad a kadua dagiti kakabsat.”

IPATPATEG NI JEHOVA TI MATALEK A PANAGSERBIYO

Adu ti mabasatayo iti Biblia nga agserserbi ken Jehova nga impategna uray no limitadon idi dagiti maar-aramidanda para kenkuana. Maysa kadakuada ni Simeon a maysa a lakayen nga Israelita a sibibiag idi nayanak ni Jesus. No mapmapan idi ni Simeon iti templo, posible a makitkitana dagiti agtutubo a lallaki a mangas-asikaso kadagiti napateg a trabaho sadiay. Ania ngata ti mapampanunot idi ni Simeon? Posible a napanunotna a gapu ta lakayen, saanen nga ipatpateg ti Dios. Ngem naiduma ti panagkita kenkuana ni Jehova. Para ken Jehova, ni Simeon ket ‘nalinteg ken agbuteng iti Dios.’ Inikkanna pay ketdi iti pribilehio a makakita ken Jesus idi maladaga pay ken nangipadto iti panagbalin ni Jesus a Mesias! (Luc. 2:25-35) Nalawag a ti kitkitaen idi ni Jehova ken Simeon ket saan a ti kinalakayna, no di ket ti nabileg a pammatina ken ti kaadda “kenkuana ti nasantuan nga espiritu.”

Masiguradoyo met nga ipatpategnakayo ni Jehova gapu iti kinamatalekyo uray no limitadon dagiti maar-aramidanyo. Ania ngamin aya ti “nangnangruna nga awaten ti Dios”? Para ken Jehova, isu ti naimpusuan a panagserbi ti maysa a tao “sigun iti kabaelanna, saan a ti awan kenkuana.”—2 Cor. 8:12.

Agpokuskayo ngarud kadagiti kabaelanyo nga aramiden. Kas pagarigan, mabalinyo ti makiraman iti nagduduma a pamay-an ti panangasaba, uray apagbiit laeng. Mabalinyo met a tawagan wenno ikkan iti kard ti maysa a kabsat tapno maparegtayo. Mabalin a simple laeng dagita. Ngem dakkel ti maitulongna kadagiti kakabsat, lalo no ti mangaramid kadagita ket nabayagen nga agserserbi ken Jehova.

Uray no limitadon dagiti maar-aramidanyo ita, adu latta ti maaramidanyo para ken Jehova. Kitaentayo ti kapadasan ti maysa a kabsat idiay East Africa iti kahon a, “Nasalbar ti Biagna.”

Laglagipenyo a dakkel a pammaregta iti dadduma ti pammati ken kinamatalekyo iti adun a tawen. Nagsayaatkayo nga ulidan iti panagibtur. Masiguradoyo a “saan a nakillo ti Dios tapno lipatenna ti aramidyo ken ti ayat nga impakitayo iti naganna, babaen ti panagserbiyo ken agtultuloy a panagserbiyo kadagiti nasantuan.”—Heb. 6:10.

ITULTULOYYO TI TUMULONG

Sigun kadagiti panagadal, nasalsalun-at, natadtadem ti memoria, ken at-atiddog ti biag ti adu a lallakay ken babbaket a tumultulong iti dadduma.

Siempre, uray agar-aramidtayo iti naimbag, saan latta a maikkat ti amin nga epekto ti panaglakay wenno panagbaket. Ti laeng Pagarian ti Dios ti naan-anay a makaikkat iti amin nga epekto ti basol a natawidtayo—ti panaglakay, panagbaket, ken ipapatay.—Roma 5:12.

Ngem uray ita, agtultuloy latta a nabileg ti namnamayo ken agbalinkayo pay ketdi a nasalsalun-at no itultuloyyo ti agserbi ken Jehova ken tumulong iti dadduma a mangam-ammo kenkuana. Ay-ayatenmi a natataengan, laglagipenyo koma nga ap-apresiaren unay ni Jehova ti panagserbiyo kenkuana. Gapu iti pammatiyo, ibilbilangdakayo a bendision iti kongregasion.