Malagipyo Kadi?

Binasayo kadin a naimbag dagiti ruar Ti Pagwanawanan ita a tawen? Kitaenyo no masungbatanyo dagitoy a saludsod:

Ania ti mangtignay kadatayo a mangited iti dayag ken Jehova?

Gapu iti nauneg a panagraemtayo kenkuana, gapu ta ay-ayatentayo unay isuna, ken kayattayo a maam-ammo isuna dagiti tattao.—w25.01, p. 3.

No adda nangpasakit kadatayo, ania ti aramidentayo tapno nalaklakatayo a mangpakawan?

Ditay baybay-an ti marikriknatayo. No iwaksitayo ti pungtot ken sakit ti nakem, maparuttayo ti gura iti pusotayo.—w25.02, p. 15-16.

Apay a nasayaat nga ulidan ti adalan a ni Marcos kadagiti agtutubo a brother?

Situtulok nga inawat ni Marcos ti awis nga agserbi iti sabsabali. Nupay adda idi tiempo a posible a nasaktan ken naupay gapu iti maysa a situasion, saan a simmardeng nga agserbi. Intultuloyna ti kinasingedna ken Pablo ken iti dadduma pay a nataengan iti naespirituan.—w25.04, p. 27.

Ania ti kayat a sawen ni Jesus idi inkararagna: “Impakaammok kadakuada ti naganmo”? (Juan 17:26)

Ammon dagiti adalanna a Jehova ti nagan ti Dios. Ngem impakaammo ni Jesus no siasino a talaga ni Jehova, agraman dagiti panggepna, dagiti inaramid ken aramidennanto, ken dagiti kualidadna.—w25.05, p. 20-21.

No naemmatayo, ania ti bigbigentayo?

Bigbigentayo nga adu pay ti saantayo nga ammo. Kas pagarigan, saantayo nga ammo no kaano ti panungpalan wenno no ania ti aramiden ni Jehova iti dayta a tiempo. Saantayo met nga ammo ti mapasamak inton bigat wenno no kasano nga am-ammonatayo unay ni Jehova.—w25.06, pp. 15-18.

Ania ti makatulong tapno magunggonaantayo iti maysa nga artikulo wenno palawag publiko?

Mabalintayo nga isaludsod iti bagitayo: ‘Ania nga ebidensia ti nausar tapno makombinsir dagiti tattao? Adda kadi epektibo nga ilustrasion a mabalinkonto nga usaren inton isurok dayta a kinapudno iti dadduma? Siasino ngata ti mabalin nga aginteres iti daytoy a topiko?’—w25.07, p. 19.

Ania ti masursurotayo iti panangpakawan ti Dios ken David?

Nupay nakaaramid ni David kadagiti nadagsen a basol, pinakawan ni Jehova gapu ta sipapasnek a nagbabawi. (1 Ar. 9:4, 5) No pakawanen ni Jehova dagiti basol, lipatennan dagita ken saannan a singiren wenno dusaen pay ti nakabasol.—w25.08, p. 17.

No ti mayad-adalan ket marigatan a mangawat iti maysa a punto, ania ti mabalinmo nga aramiden?

No marigatan latta a mangawat iti maysa a punto kalpasan nga inlawlawagmon a naimbag dayta babaen ti Biblia, baka nasaysayaat no sublianyonto laengen.—w25.09, p. 24.

Kuna ti Biblia nga adda ‘manangallilaw a pannakabalin ti basol.’ (Heb. 3:13) Kasano a kasta?

Gapu ta nayanaktayo a managbasol, ti tendensiatayo ket agaramid iti dakes. Pasaray pagduaduaantayo met no talaga nga ay-ayatennatayo ni Jehova.—w25.10, p. 16.

Ania ti tallo a makatulong tapno mapasayaattayo ti personal a kararagtayo?

(1) Panunotentayo dagiti kualidad ni Jehova. (2) Panunotentayo ti problema a pakaipaspasanguantayo ket ikararagtayo dayta, kas iti no adda masapul a pakawanentayo. (3) Saantayo nga agdardaras nga agkararag. Iti kasta, ad-adda a mayebkastayo ti rikrikna ken pampanunotentayo.—w25.10, p. 19-20.

Kasanotayo a matulongan dagiti nataengan?

Mabalintayo a bisitaen wenno tawagan ida. Mabalintayo met a kaduaen ida nga agpa-checkup. Wenno kaduaentayo ida iti nadumaduma a pamay-an ti ministerio.—w25.11, p. 6-7.

Ania dagiti kangrunaan a maikabilangan iti nadayaw a kasar dagiti Kristiano?

Surotenyo dagiti linteg ti gobierno. Siguraduenyo nga iti seremonia ken reception, maipakita dagiti aspeto ti bunga ti espiritu ti Dios. Agbadokayo iti naemma ken siguraduenyo a liklikanyo dagiti kostumbre a maikontra iti Biblia. Pagtalinaedenyo a nasayaat ti panagsasarita bayat nga iplamplanoyo ti kasaryo.—w25.12, p. 21-24.