No Kasano a Maidaydayawyo ni Jehova iti Kasaryo

1-2. Ania ti kayat ni Jehova a mapasamak iti aldaw ti kasaryo?

DANDANIKAYO kadin agkasar? No wen, makipagragsakkami unay kadakayo! Sigurado nga ar-aramidenyo ti amin a kabaelanyo tapno maiplanoyo a naimbag ti kasaryo. Kinapudnona, maragsakan met ni Jehova para kadakayo. Kayatna a naragsakto ti aldaw ti kasaryoa ken ti masakbayanyo.—Prov. 5:18; Kanta ni Sol. 3:11.

² Maikari unay ni Jehova a maidaydayaw iti aldaw ti kasaryo. Apay a maibagatayo dayta? Ken kasanoyo a maaramid dayta? Nairanta daytoy nga artikulo para kadagiti agnobio nga agsagsaganan iti kasarda. Ngem makatulong met kadatayo amin dagiti mapagsasaritaantayo a prinsipio tapno maidaydayawtayo ni Jehova no umatendertayo iti kasar wenno no adda agdamag iti opiniontayo maipapan iti kasarda.

APAY A PADAYAWANTAYO NI JEHOVA?

3. Ania ti masapul nga ikabilangan dagiti agnobio no iplamplanoda ti kasarda ken apay?

³ Masapul nga agdesision dagiti agnobio nga agplamplano nga agkasar maitunos kadagiti prinsipio ni Jehova a naibatay iti Saona. Apay? Gapu ta ni Jehova ti Nangirugi iti panagasawa. Isuna ti nangyurnos iti kaunaan a kasar, ti panagkallaysa da Adan ken Eva. (Gen. 1:28; 2:24) No kasta, ni ngarud Jehova ti kangrunaan nga ikabilangan dagidiay agplamplano nga agkasar tapno mapadayawanda isuna iti aldaw ti kasarda.

4. Ania pay ti dadduma a rason a ni Jehova ti masapul a padayawan dagiti agnobio iti aldaw ti kasarda?

⁴ Adda pay napateg a rason nga ikabilanganyo ni Jehova iti aldaw ti kasaryo: Isuna ti nailangitan nga Amayo ken kasingedan a Gayyemyo. (Heb. 12:9) Sigurado a saanyo a kayat a madadael ti relasionyo ken Jehova. Isu nga iti aldaw ti kasaryo wenno iti aniaman nga aldaw, diyo la ketdi kayat ti mangaramid iti aniaman a pakasaktan ti riknana. (Sal. 25:14) No panunotenyo a naimbag ti amin nga inaramiden ken aramidento pay ni Jehova para kadakayo, saan kadi a maikari laeng isuna a mapadayawan iti aldaw ti kasaryo?—Sal. 116:12.

KASANOYO A MAPADAYAWAN NI JEHOVA?

5. Kasano a makatulong ti Biblia kadagiti agnobio nga agplamplano iti kasarda?

⁵ Saan a mangted ti Biblia iti listaan iti mabalin ken saan a mabalin nga aramiden maipapan iti kasar dagiti Kristiano wenno ti maangay a padaya wenno reception kalpasanna. Isu a no agplamplano ti agnobio iti kasarda, ikabilanganda ti kasasaadda, no ania ti gagangay iti lugarda, ken no ania dagiti kayatda. Siempre, masapul nga agtulnog dagiti Kristiano kadagiti linteg ti gobierno maipapan iti panagkasar. (Mat. 22:21) Ngem aniaman a desision ti magtengan ti agnobio, maparagsak ken mapadayawanda ni Jehova no surotenda dagiti prinsipio ti Biblia. Isu nga ania dagiti prinsipio ti Biblia a masapul a laglagipenyo?

6. Apay a masapul a suroten dagiti agnobio dagiti linteg ti gobierno maipapan iti panagasawa?

⁶ Surotenyo dagiti linteg ti gobierno. (Roma 13:1, 2) Iti kaaduan a pagilian, adda dagiti linteg ti gobierno a masapul a suroten dagiti agplamplano nga agkasar. Masapul ngarud nga ammuenyo dagita. No kasapulanyo ti tulong, dikay koma bumdeng nga umasideg kadagiti panglakayen.b

7. Ania ti masapul a siguraduen ti agnobio maipapan iti kasarda?

⁷ Pagbalinenyo a nadayaw ti kasaryo. (1 Cor. 10:31, 32) Ikagumaanyo nga ipakita dagiti nagsayaat nga aspeto ti bunga ti espiritu ti Dios, imbes a ti espiritu ti lubong. (Gal. 5:19-26) Ti nobio ti agbalinen nga ulo ti baro a pamilia. Responsabilidadna ngarud a siguraduen a naragsak ken nadayaw ti kasar. Kasano nga agbalin a kasta? Makatulong ti palawag a naibatay iti Biblia. No maipalawag dayta iti nadayaw ken naayat a pamay-an, maawatanto ti amin a dumar-ay a ti panagasawa ket urnos ken regalo ni Jehova a Dios. Makitanto met ti amin nga umatender no kasano kaserioso dayta nga okasion. Kayat met ti kaaduan a Kristiano nga agnobio a maangay ti seremonia ti kasarda iti Kingdom Hall, no posible. No kasta met ti kayatyo, nasaksakbay nga isuratyo dayta a kiddawyo iti bagi dagiti panglakayen.

8. Ania ti makatulong tapno agtalinaed a nadayaw ti angayenyo a reception? (Roma 13:13)

⁸ Basaen ti Roma 13:13. No pilienyo nga adda maangay a reception ti kasaryo, kasanoyo a masigurado a saan a malaokan iti espiritu ti lubong? Ti Griego a sao a naipatarus kas “nalabes a panagragragsak” ket tumukoy kadagiti gathering nga addaan iti nalabes a panagiinum ken musika uray no rabii unayen. (Kitaen ti study note a “wild parties” ti Roma 13:13.) Isu a no planoyo ti mangidasar iti arak, nasaksakbay a siguraduenyo nga awanto ti mabartek.c No adda musika a maipatokar, daydiay koma kalkalainganna ti kapigsana tapno makapagsasarita latta dagiti bisitayo. Pilienyo met a naimbag ti musika a maipatokar ken kitaenyo dagiti lirikona tapno awan ti asinoman a maitibkol.

9. Ania koma ti masapul a laglagipen dagiti agkasar no adda maangay a programa wenno adda dagiti mangted iti mensahe bayat ti reception ti kasarda?

⁹ Iti dadduma a reception, baka mangipaay iti mensahe dagiti gagayyem ken kapamilia ti agkasar maipapan kadakuada. Iti met dadduma, adda maipabuya nga slideshow, video, wenno dadduma pay a presentasion. Gapu kadagita, masansan nga ad-adda nga agbalin a nakallalagip dayta nga aldaw. Ngem siguraduenyo koma a makapabileg amin dagita. (Fil. 4:8) Isaludsodyo iti bagiyo: ‘Dagitinto kadi maipabuya, mangngegan, ken maipatokar ipakitada ti panangrespeto iti sabsabali? Ipakitadanto kadi ti panagraem iti urnos ti panagasawa?’ Ken kapatgan iti amin, ‘Maidaydayawto ngata ni Jehova?’ Awan met dakesna no adda agpakatawa. Masapul laeng a siguraduenda a dida mangibaga iti aniaman a di maitutop wenno naalas, a kas iti maipapan iti seks. (Efe. 5:3) No mangipaayto met iti mensahe dagiti gagayyem ken kapamiliayo, siguraduenyo a maawatan ken respetuenda dagiti saanyo a kayat nga ibagada.

10. Apay a masapul nga ipakita ti agnobio ti kinaemma no iplamplanoda ti kasarda? (1 Juan 2:15-17)

¹⁰ Ipakitayo ti kinaemma. (Basaen ti 1 Juan 2:15-17.) Maragsakan ni Jehova no ikagumaan dagidiay mangay-ayat kenkuana nga isu ti padayawanda imbes a ti bagida. Saan ngarud nga aggasto dagiti naemma a Kristiano iti adu a kuarta tapno ‘agparammag.’ Ania ti maitulongna kadakayo no simple ti kasaryo? Kitaenyo ti kapadasan ti taga-Norway a brother a ni Mike. Imbagana: “Naliklikanmi ti adu nga utang isu a nakapagtultuloykami a payunir. Simple nga agpayso ti kasarmi, ngem napintas met latta ken diminto pulos malipatan dayta.” Imbaga met ti taga-India a sister a ni Tabitha: “Saankami unay a na-stress. Gapu ta simple ti kasarmi, saankami a narigatan nga agplano ken manmano dagiti dimi nagtutunosan.”

11. Kasano a maipakita ti agkasar a naemmada iti panagbadbado ken panaglanglangada? (Kitaen met dagiti ladawan.)

¹¹ Nakapilikayo kadin iti pagbadoyo? Sigurado a kayatyo a naguapo ken napintaskayto inton kasaryo. Uray idi panawen ti Biblia, kayat dagiti agkasar a makaay-ayo ti itsurada. (Isa. 61:10) Siempre, naiduma la ketdi ti badoyo inton kasaryo ngem iti badoyo iti dadduma nga okasion. Ngem kaskasdi a naemma koma dayta. (1 Tim. 2:9) Saan koma a ti badoyo—wenno ti dadduma pay a material a banag—ti pagbalinenyo a kapatgan iti aldaw ti kasaryo.—1 Ped. 3:3, 4.

12. Apay a masapul a liklikan ti agkasar ti aniaman a kostumbre a maikontra iti Biblia a gagangay iti lugarda?

¹² Liklikanyo dagiti kostumbre a maikontra iti Biblia. (Apoc. 18:4) Iti lubong ita nga iturturayan ni Satanas, adu a tradision iti kasar ti nalaokan iti espiritismo agraman iti patpatien ken kostumbre ti ulbod a relihion. Nalawag a pakpakdaarannatayo ni Jehova nga adaywantayo dagita a narugit nga aramid. (2 Cor. 6:14-17) Ngem kasano ngay no adda dagiti kostumbre wenno tradision iti lugaryo a saanyo a sigurado no makaay-ayo ken Jehova? Ag-research-kayo nga umuna tapno maammuanyo no naggapuan dagita a tradision. Ammuenyo met dagiti prinsipio ti Biblia a makatulong kadakayo tapno makapagdesisionkayo no iramanyo dagita iti kasaryo wenno saan.

13. Kasano a matulad dagiti agkasar ti panangmatmat ni Jehova maipapan iti panangawat kadagiti regalo?

¹³ Kaugalian kadi iti lugaryo ti panangted iti regalo iti agkasar? Agduduma ti regalo a maited dagiti bisita, depende iti kasasaadda iti pinansial. Siempre, maiparparegta kadagiti Kristiano a mangtedda, ket naragsakda no aramidenda dayta. (Prov. 11:25; Ara. 20:35) Ngem saantayo koma nga iparikna nga obligado dagiti bisitatayo a mangted wenno mariknada a saantay nga apresiaren ti intedda gapu laeng ta simple dayta. Imbes ketdi, tuladentayo ni Jehova. Kasano? Apresiaren ken agyamantayo iti aniaman nga iregaloda kadatayo, sigun iti kabaelanda ken nagtaud iti pusoda.—2 Cor. 9:7.

NO KASANOYO A MALIKLIKAN KEN MAPAGBALLIGIAN DAGITI PROBLEMA

14. Ania dagiti problema a mabalin a pakaipasanguan dagiti agkasar?

¹⁴ Mabalin a maipasangokayo kadagiti problema bayat a mangiplamplanokayo iti kasar a mangpadayaw ken Jehova. Kas pagarigan, baka marigatankayo a mangiplano iti simple a kasar. Imbaga ni Charlie a taga-Solomon Islands: “Narigatankami a nangpili no siasino dagiti awisenmi iti reception. Adu ngamin ti gagayyemmi. Ket iti kulturami, namnamaen ti amin a maawisda!” Imbaga met ni Tabitha a nadakamaten: “Iti lugarmi, gagangay ti dadakkel a reception. Nabayag met sakbay a naakseptar dagiti nagannakmi ti desisionmi nga agarup 100 laeng ti awisenmi.” Imbaga met ni Sarah a taga-India: “Para iti dadduma, masapul a maipakitada no kasanoda kabaknang ken napateg kadakuada ti maibaga dagiti tattao. Kas pagarigan, enggrande ti kasar dagiti kasinsinko. Isu nga ipilpilit idi kaniak ti dadduma a masapul a naeng-enggrande pay ti kasarko.” Ania ti makatulong tapno mapagballigianyo dagitoy a problema?

15. Apay a nakapatpateg ti masansan a panagkararag bayat ti panagplano para iti kasar?

¹⁵ Kanayonkayo nga agkararag bayat nga agplamplanokayo. Mabalinyo nga ibaga ken Jehova ti aniaman a problema a pakaipaspasanguanyo ken uray ti aniaman a marikriknayo. (Fil. 4:6, 7 ken study note nga “in everything”) Mabalinyo met a kiddawen kenkuana a tulongannakayo tapno makaaramidkayo kadagiti nasayaat a desision, tapno agtalinaedkayo a kalmado uray makapadanag ti situasion, ken tapno maitakderanyo a situtured ti desisionyo, uray no naiduma dayta iti kayat ti dadduma nga aramidenyo. (1 Ped. 5:7) Sigurado a bumileg ti panagtalekyo ken Jehova bayat a makitkitayo a sungsungbatanna dagiti kararagyo. Imbaga ti nadakamaten a ni Tabitha: “Madanagankami idi iti nobiok. Baka ngamin addanto dagiti dimi pagkinnaawatan, ken uray dagiti pamiliami. Isu a kada pagsaritaanmi dagiti plano para iti kasarmi, agkararagkami nga umuna. Talaga a nariknami a tultulongannakami ni Jehova ta naragsak ken awan ti tension kada agsasaritakami.”

16-17. Kasano a makatulong ti nasayaat a komunikasion no iplamplanoyo ti kasaryo?

¹⁶ Nalawag ken nataktika koma ti pannakisaritayo. (Prov. 15:22) Kas agnobio, adu ti masapul a desisionanyo iti kasaryo. Karaman dita ti petsa ti kasaryo, no mano ti badyetyo, no siasino dagiti awisenyo, ken adu pay a banag. Sakbay nga agdesisionkayo, pagsaritaanyo a dua dagiti opsionyo ken dagiti makatulong a prinsipio iti Biblia. Agpabalakadkayo met kadagiti nataengan iti naespirituan ken mapagulidanan a kakabsat. No ibagayo dagiti kayatyo a mapasamak, nasingpet, nainkalintegan, ken nakasaganakayo koma a makibagay. No adda rasonable a kiddawen dagiti nadekket a kapamiliayo—kas kadagiti nagannakyo—patganyo koma dayta. Ngamin, ti kasaryo ket espesial met nga okasion para kadakuada. Ngem no diyo mapatgan ti kiddawda, nasingpet ken naayat koma nga ilawlawagyo ti rason. (Col. 4:6) Ilawlawagyo a naimbag kadagiti kapamiliayo a ti kapatgan kadakayo ket agbalin a naragsak nga okasion ti kasaryo a pakaidayawan ni Jehova.

¹⁷ Mabalin a mas marigatankayo a mangilawlawag kadagiti desisionyo no saan a Saksi dagiti nagannakyo. Ngem kayayo dayta. “Kayat dagiti kapamiliami a mangiramankami iti nadumaduma a ritual dagiti Hindu iti kasarmi,” imbaga ti brother a ni Santhosh a taga-India. “Nabayag met nga inlawlawagmi kadakuada ti desisionmi. Adda met sumagmamano a binaliwanmi aglalo no awan met ti masalungasingmi a prinsipio ti Biblia. Kas pagarigan, binaliwanmi ti dadduma a putahe iti reception tapno masurotmi ti kayatda. Awan metten ti panagkakanta wenno panagsasala ta saanda a nairuam kadagita.”

18. Ania ti makatulong tapno masiguradoyo a naballiginto ti aldaw ti kasaryo? (1 Corinto 14:40) (Kitaen met ti ladawan.)

¹⁸ Agplanokayo a naimbag. No organisado dagiti planoyo, posible a saankayonto unayen a ma-stress inton aldaw ti kasaryo. (Basaen ti 1 Corinto 14:40.) Imbaga ni Wayne a taga-Taiwan: “Sumagmamano nga aldaw sakbay ti kasarmi, minitingmi dagiti nagboluntario a tumulong. Nagsasaritaanmi dagiti kayatmi nga urnos ken prinaktismi pay ketdi ti dadduma a maaramid iti kasarmi tapno masigurado nga awanto ti aberia.” Tapno maipakitayo met ti respeto kadagiti bisitayo, ikagumaanyo koma a masurot ti oras nga inkeddengyo para iti kasaryo.

19. Ania ti makatulong tapno agtalinaed a nadayaw ti reception ti kasaryo?

¹⁹ Maliklikan ti adu a problema no nasaksakbay nga agplanokayo. (Prov. 22:3) Kas pagarigan, no aggigiankayo iti lugar a gagangay a mapan lattan iti reception ti kasar uray dagiti saan a naawis, panunotenyo a nasaksakbay dagiti aramidenyo tapno maliklikan dayta. No adda kabagianyo a saan a Saksi, siguraduenyo a maammuanda dagiti kayatyo a mapasamak iti kasaryo ken ilawlawagyo ti panangmatmatyo maipapan iti dadduma a kaugalian iti kasar. Mabalinyo nga ipabasa kadakuada ti artikulo a “Kasano ti Kasar Dagiti Saksi ni Jehova?” iti jw.org. Tapno masiguradoyo nga agtalinaed a naurnos ti kasaryo, mangpilikayo koma iti brother a nataengan iti naespirituan nga agserbi kas “direktor ti kasar.” (Juan 2:8) Ibagayo kenkuana dagiti kayatyo a mapasamak iti kasaryo. Iti kasta, matulongannakayo tapno agtalinaed a nadayaw ti kasaryo ken masurot dagiti implanoyo.

20. Ania ti laglagipen dagiti agnobio maipapan iti kasarda?

²⁰ Baka madanagankayo no panunotenyo ti amin a masapul nga aramidenyo bayat nga iplamplanoyo ti kasaryo. Ngem laglagipenyo a maysa la nga aldaw ti kasaryo. Dayta ti umuna nga aldaw ti naragsak a panagkaduayonto nga agserbi ken Jehova. Isu nga aramidenyo ngarud ti amin a kabaelanyo tapno agbalin a simple ken nadayaw ti kasaryo. Agtalekkayo ken Jehova. No agpatulongkayo kenkuana, makayurnoskayo iti naragsak a kasar a diyonto pulos malipatan ken pagbabawyan.—Sal. 37:3, 4.