Tuladem ti Kinapakumbaba ni Jehova

1. Apay a naisangsangayan ti kinapakumbaba ni Jehova?

NO OBSERBARANYO dagiti agtuturay ita, maibagayo kadi a napakumbabada? Baka saan. Ngem naiduma unay ni Jehova. Uray no isu ti mannakabalin-amin, isu ket napakumbaba. (Sal. 113:5-8) Awan ti makaartap iti kinapakumbabana. Awan a pulos ti masarakantayo a kinapannakkel kenkuana. Adu ti masursurotayo no usigentayo ti uppat a pamay-an nga ipakpakita ni Jehova ti kinapakumbabana. Kitaentayo met no kasano a tinulad ni Jesus ti kinapakumbaba ni Amana. Iti kasta, agbalintayo a nasingsinged ken Jehova ken ad-adda a matuladtayo ti kinapakumbabana.

NALAKA A MAAS-ASITGAN NI JEHOVA

2. Ania ti ipakita kadatayo ti Salmo 62:8 maipapan ken Jehova? (Kitaen met ti ladawan.)

² Narigat a maas-asitgan dagiti napannakkel. Apay? Nangato ngamin ti panagkitkitada iti bagida. Ken kaaduanna, saan a nasayaat ti panangtratoda iti dadduma isu a likliklikan ida dagiti tattao. Ngem pulos a saan a kasta ni Jehova! Napakumbaba ti nailangitan nga Amatayo. Aw-awisennatayo pay ketdi nga umasideg kenkuana ken ibagatayo ti linaon ti isip ken pusotayo. (Basaen ti Salmo 62:8.) No kasano a nakasagana a dumngeg ti maysa a nadungngo nga ama kadagiti pakaseknan ti annakna, kasta met laeng ni Jehova. Kayatna a denggen ti kararagtayo. Impaisuratna pay ketdi iti Biblia ti adu a kararag dagiti adipenna. Ebidensia dayta a nalaka a maas-asitgan ti Amatayo. (Jos. 10:12-14; 1 Sam. 1:10-18) Ngem kasano ngay no mariknatayo no dadduma a saantayo a maikari nga umasideg ken Jehova?

3. Apay a masiguradom a kayat ni Jehova a kanayon nga agkararagka kenkuana?

³ Makapagkararagtayo latta ken Jehova uray no mariknatayo a saantayo a maikari iti ayatna. Apay a maibagatayo dayta? Iti ilustrasion ni Jesus maipapan iti napukaw nga anak, impadana ni Jehova iti nadungngo nga ama. Panagrikna idi ti agbabbabawi nga anak ket saanen nga awaten ti amana gapu kadagiti kamali nga inar-aramidna. Ngem ania ti inaramid ti ama idi agsublin ti anakna? Imbaga ni Jesus nga apaman a nakita ti ama ti anakna, uray adayo pay laeng, “timmaray a simmabat. Inarakupna ti anakna ket sidudungngo nga inagkanna.” (Luc. 15:17-20) Ni Jehova ket kas iti dayta nga ama. No mangngegna ti kararagtayo gapu ta nalidaytayo, nakaaramidtayo iti kamali, wenno adda problematayo, denggennatayo a naimbag gapu ta isu ket napakumbaba. (Un. 3:19, 20) Gapu ta naasi ni Jehova, arigna ‘agtaray a sumabat’ kadatayo tapno liwliwaen ken ipasiguradona nga ay-ayaten ken maseknan kadatayo. (Isa. 57:15) Kasano nga ar-aramiden dayta ita ni Jehova? Masansan nga usarenna dagiti panglakayen, dagiti kapamiliatayo a padatayo a Saksi, ken dadduma pay a kapammatiantayo. (Sant. 5:14, 15) Ar-aramiden ni Jehova dagita ta kayatna nga agbalintayo a nasinged kenkuana.

4. Kasano nga impakita ni Jesus nga isu ket nalaka a maas-asitgan?

⁴ Kasano a tultuladen ni Jesus ni Amana? Kas ken Amana, napakumbaba met ni Jesus. Idi adda isuna ditoy daga, nalag-an ti rikna dagiti tattao nga umasideg kenkuana. Saanda a mabuteng nga agsaludsod. (Mar. 4:10, 11) No damagenna ida no ania ti makunada iti maysa a banag, ibagada ti talaga a pampanunoten ken marikriknada. (Mat. 16:13-16) Ken no agkamalida, saanda a madanagan amangan no makapungtot kadakuada ni Jesus. Ngamin, ammoda a nasingpet, naasi, ken naanus isuna. (Mat. 17:24-27) Ad-adda a naam-ammo dagiti adalan ni Jesus ni Jehova gapu ta tinuladna a naimbag ti Amana. (Juan 14:9) Nasursuroda a ni Jehova ket saan a kas kadagiti lider ti relihion idi kaaldawanda a naulpit, napannakkel, ken nagrigat a maas-asitgan. Imbes ketdi, isu ket napakumbaba ken nalaka a maas-asitgan.

5. Kasano a makatulong ti kinapakumbaba tapno nalaklakatayo a maasitgan?

⁵ Kasanotayo a matulad ni Jehova? No napakumbabatayo, nalaklakatayo a maasitgan. Apay? Ngamin, no saantayo a napakumbaba, agbalintayo a naapal, napannakkel, ken marigatantayo a mangpakawan. Ket no kasta ti kababalintayo, adaywandatayo dagiti tattao. Ngem no ngay napakumbabatayo? Agbalintayo a naimbag, naanus, ken manangpakawan. Dagita ti kababalin a birbiroken ti dadduma kadagiti kayatda nga agbalin a gayyem. (Col. 3:12-14) Masapul a dagiti panglakayen ti nangnangruna a mangikagumaan nga agbalin a nalaka a maas-asitgan. Tapno maaramidda dayta, masapul a kanayon a makikaduada kadagiti kakabsat. Kayatna a sawen nga agingga a posible, ikagumaanda ti makigimong iti in person, imbes a babaen lattan iti videoconferencing. No met ipalubos ti kasasaadda, ikagumaanda a kaduaen dagiti kakabsat iti panangasaba iti binalaybalay. Ta no mas maam-ammo dagiti kakabsat dagiti panglakayen, nalaglag-an ti riknada nga agpatulong inton adda problemada.

NAINKALINTEGAN NI JEHOVA

6-7. Mangted kadagiti pagarigan no kasano a pinatgan ni Jehova dagiti kiddaw dagiti adipenna.

⁶ Masansan a pampanunoten dagiti napannakkel nga ammoda ti kasayaatan, isu a kayatda nga isuda ti masurot. Ngem saan a kasta ni Jehova. Gapu ta napakumbaba, isu ket nainkalintegan, wenno managpabus-oy, uray no kanayon nga ammona ti kasayaatan. Kitaentayo ti inaramidna ken Miriam a manang ni Moises. Nagtanabutobda a dua ken Aaron maibusor ken Moises a pannakangiwat ni Jehova. Idi inaramid ni Miriam dayta, ipakpakitana a saanna a raraemen ni Jehova. Kas resultana, nakapungtot ni Jehova ken Miriam ket pinagkukutelna. Ngem nagpakaasi ni Aaron ken Moises. Isu a nagpakaasi ni Moises ken Jehova a paimbagenna ti kabsatna. Ania ti inaramid ni Jehova? No koma napannakkel, baka saanna koma a binaliwan ti desisionna. Ngem gapu ta isu ket napakumbaba, pinaimbagna ni Miriam.—Num. 12:1-15.

⁷ Impakita met ni Jehova ti kinapakumbabana idi nagpakaasi kenkuana ni Ari Ezekias. Imbaon ni Jehova ni propeta Isaias tapno ibagana a matay ti ari. Idi naammuan dayta ni Ezekias, agsangsangit nga impakaasina a paimbagen koma ni Jehova. Ania ti inaramid ni Jehova? Gapu iti asina, ninayonanna iti 15 a tawen ti biag ti ari. (2 Ar. 20:1, 5, 6) Wen, talaga a napakumbaba ni Jehova ta denggenna dagiti panagpakaasi dagiti adipenna.

8. Ania dagiti pagarigan nga impakita ni Jesus nga isu ket nainkalintegan? (Marcos 3:1-6)

⁸ Kasano a tultuladen ni Jesus ni Amana? Idi adda ditoy daga ni Jesus, nagaramid iti naimbag kadagiti tattao no la ket ta nainkalitegan dayta. Kas pagarigan, pinaimbagna dagiti tattao iti aldaw ti Sabbath uray no para kadagiti lider ti relihion, saan koma a rumbeng nga aramidenna dayta. (Basaen ti Marcos 3:1-6.) Agingga ita, nainkalintegan latta ni Jesus kas ulo ti kongregasion Kristiano. Kas pagarigan, no adda makaaramid iti nadagsen a basol, an-anusan ken ik-ikkanna iti umdas a tiempo nga agbalbaliw.—Apoc. 2:2-5.

9. Kasanotayo a maipakita a nainkalintegantayo? (Kitaen met dagiti ladawan.)

⁹ Kasanotayo a matulad ni Jehova? Masapul a pagreggetantayo a tuladen ti kinanainkalintegan ni Jehova iti panagpampanunot ken aramidtayo. (Sant. 3:17) Kas pagarigan, dagiti nainkalintegan a nagannak ket saan a konsintidor. Saanda met nga ekspektaren nga ad-adu ti maaramidan dagiti annakda ngem iti kayada nga aramiden. Kasta ti nagsayaat nga inaramid ni Jacob, kas mabasa iti Genesis 33:12-14. Napakumbaba ken nainkalintegan dagiti nagannak no saanda nga ikompara dagiti annakda iti sabali. Masapul met a nainkalintegan dagiti panglakayen. Ti maysa a pamay-an a maipakitada dayta ket no suportaranda ti desision ti kaaduan a panglakayen no la ketdi ta awan ti masalungasing a prinsipio ti Biblia. (1 Tim. 3:2, 3) Ken ikagumaantayo koma ti agbalin a mannakaawat iti sabsabali uray no naiduma ti opinionda iti opiniontayo. (Roma 14:1) Ipakita ngarud koma ti tunggal maysa kadatayo a “nainkalintegantayo.”—Fil. 4:5.

NAANUS NI JEHOVA

10. Kasano nga ipakpakita ni Jehova ti kinaanus?

¹⁰ Mabalin a madlawyo a saan a makaur-uray dagiti napannakkel a tattao. Awan ti aanusanda gapu ta nangato ti pride-da. Ngem saan a kasta ni Jehova. Isu ti kangrunaan nga ulidantayo iti kinaanus. Kas pagarigan, idi kaaldawan ni Noe, imbaga ni Jehova nga aguray pay iti 120 a tawen sakbay a dadaelenna dagiti managdakdakes. (Gen. 6:3) Gapu iti dayta, adda tiempo ni Noe a nangpadakkel kadagiti annakna ken nangibangon iti daong a kadua ti pamiliana. Idi agangay, adda imbaon ni Jehova nga anghel ken Abraham. Siaanus a dimngeg dayta nga anghel idi nagadu ti insaludsod ni Abraham maipapan iti pannakadadael ti Sodoma ken Gomorra. No napannakkel koma a tao ti kasarsarita ni Abraham, baka ti imbagana ket, ‘Nagturedka la ketdin nga agsaludsod! Apay ti kunam, diak ammo ti ar-aramidek!’ Ngem tultuladen ti anghel ti kinaanus ni Jehova, isu nga inan-anusanna met ni Abraham.—Gen. 18:20-33.

11. Sigun iti 2 Pedro 3:9, apay nga agan-anus ni Jehova iti kaaldawantayo?

¹¹ Sipapakumbaba nga agan-anus met ni Jehova iti kaaldawantayo. Inkeddengnan ti tiempo ti panungpalan ket siaanus nga ur-urayenna dayta. Apay? “Ta saanna a kayat a madadael ti asinoman no di ket kayatna nga agbabawi ti amin.” (Basaen ti 2 Pedro 3:9.) Awan kadi ti mamaayna ti panagan-anus ni Jehova? Adda! Minilion a nasingpet a tattao ti nagbalinen a nasinged a gagayyemna. Minilionto pay ti mangaramid iti kasta. Ngem siempre adda pagpatinggaan ti kinaanus ni Jehova. Ay-ayatenna dagiti tattao. Ngem saan a napanuynoy. Dina ipalubos nga agtultuloy ti kinadakes iti agnanayon.—Hab. 2:3.

12. Kasano a tultuladen ni Jesus ti kinaanus ni Jehova?

¹² Kasano a tultuladen ni Jesus ni Amana? Rinibun a tawen a tultuladen ni Jesus ti kinaanus ni Jehova. Nakitan ni Jesus no kasano a padpadaksen ni Satanas ni Jehova ken dagiti matalek a tattao. (Gen. 3:4, 5; Job 1:11; Apoc. 12:10) Nakita met ni Jesus ti nakaro a panagrigrigat dagiti tattao. Sigurado a kayatna la unayen a ‘dadaelen dagiti aramid ti Diablo’! (1 Juan 3:8) Ngem apay nga agan-anus ni Jesus agingga nga ibaga kenkuana ni Jehova a tiempon a pagpatinggaenna ti amin nga aramid ti Diablo? Ti maysa a rason ket napakumbaba ni Jesus. Bigbigenna a ni laeng Jehova ti addaan iti karbengan a mangikeddeng no kaano a mapasamak dayta.—Ara. 1:7.

13. Kasano ken apay nga inan-anusan ni Jesus dagiti apostolna?

¹³ Idi adda ni Jesus ditoy daga, inan-anusanna met dagiti apostolna. Kas pagarigan, namin-adu a nagsusupiatanda no asino kadakuada ti katan-okan. Ngem saan a nauma ni Jesus kadakuada. Imbes ketdi, inan-anusanna latta ida. (Luc. 9:46; 22:24-27) Sigurado isuna a makapagbalbaliwdanto met laeng. Maulit-ulit met kadi a makaaramidka iti kamali? No wen, awan duadua nga agyamyamanka ta napakumbaba ken naanus ti Ari a mangiturturay kenka.

14. Ania ti makatulong tapno agbalinka a naan-anus?

¹⁴ Kasanotayo a matulad ni Jehova? Tapno ad-adda a matuladtayo ti panagpampanunot ni Jehova, masapul nga ikagumaantayo a tuladen “ti panunot ni Kristo.” (1 Cor. 2:16) Kasano? Tiempo ti kasapulan. Masapul a basaentayo dagiti Ebanghelio. Mangiwayatayo met iti tiempo a mangutob kadagiti inaramid ni Jesus ken no apay nga inaramidna dagita. Kasapulan met nga ikararagtayo ken Jehova a tulongannatayo nga agbalin a napakumbaba ken naanus a kas ken Jesus. No ad-adda nga agpanunottayo a kas ken Jesus, ad-adda a matuladtayo ti Dios babaen ti panagbalintayo a naan-anus iti bagitayo ken kadagiti kapammatiantayo.—Mat. 18:26-30, 35.

IPATPATEG NI JEHOVA DAGITI NANUMO

15. Kasano a tungtungpalen ni Jehova ti ibagbaga ti Salmo 138:6?

¹⁵ Basaen ti Salmo 138:6. Panunotem daytoy: Ni Jehova ti kangatuan iti intero nga uniberso. Ngem as-asikasuen ken padpadayawanna dagiti napakumbaba. Kitaentayo ti sumagmamano a pagarigan no kasano nga inaramid dayta ni Jehova kadagiti matalek nga adipenna nga ibilbilang idi ti dadduma a nababa. Baka saantayo pay ketdi a pamiliar iti dadduma kadakuada. Ngem impaisurat ni Jehova iti Biblia ti maipapan kadakuada. Impaisurat ni Jehova ken Moises ti salaysay maipapan iti paraaywan a ni Debora a nagbiag idi panawen dagiti patriarka. Simamatalek a nagserbi ni Debora iti sangakabbalayan da Isaac ken Jacob iti agarup 125 a tawen! Uray no bassit la ti ammotayo maipapan iti daytoy a matalek a babai, sinigurado ni Jehova a maisurat iti Biblia dagiti detalye a mangipakita a maipatpateg unay isuna. (Gen. 24:59; 35:8, ftn.) Ginasut a tawen kalpasanna, pinili ni Jehova ti agtutubo a pastor a ni David nga agbalin nga ari ti Israel. (2 Sam. 22:1, 36) Nangibaon met ni Jehova iti anghel a mangipakaammo kadagiti nanumo a pastor a nayanaken idiay Betlehem ti agbalinto a Mesias. Isuda ti immuna a nakaammo iti dayta. (Luc. 2:8-11) Ken idi impan da Jose ken Maria ni Jesus idiay templo, inikkan ni Jehova ti lakayen a ni Simeon ken ti baketen a ni Anna iti pribilehio a makakita iti Anakna. (Luc. 2:25-30, 36-38) Wen, “uray nangato ni Jehova, asikasuenna dagiti napakumbaba”!

16. Kasano a tinulad ni Jesus ti panangtrato ni Amana iti sabsabali?

¹⁶ Kasano a tultuladen ni Jesus ni Amana? Kas ken Amana, pinadayawan ni Jesus dagiti napakumbaba a tattao. Insurona ti kinapudno maipapan iti Pagarian ti Dios kadagiti ‘awan adalna ken ordinario a tattao.’ (Ara. 4:13; Mat. 11:25) Pinaimbagna met dagiti masakit ken inaramidna dayta iti pamay-an a mariknada nga ipatpateg ken raraemenna ida. (Luc. 5:13) Iti rabii sakbay a natay ni Jesus, binugguanna met ti saka dagiti apostolna, trabaho a gagangay nga ar-aramiden ti adipen. (Juan 13:5) Sa sakbay nga immuli idiay langit, intalekna iti amin a napakumbaba a pasurotna idi, a pakairamanantayo ita, ti kapatgan a trabaho. Ania dayta? Ti trabaho a panangasaba a mangtulong iti sabsabali a manggun-od iti biag nga agnanayon. Nagdakkel a pribilehio dayta!—Mat. 28:19, 20.

17. Kasanotayo a mapadayawan ti sabsabali? (Kitaen met ti ladawan.)

¹⁷ Kasanotayo a matulad ni Jehova? Padpadayawantayo dagiti tattao no iranudtayo kadakuada ti naimbag a damag aniaman ti kasasaadda, kolor ti kudilda, wenno naragpatda nga adal. Padpadayawantayo met dagiti kapammatiantayo no ibilangtayo ida a nangatngato ngem kadatayo, aniaman ti abilidad wenno pribilehiotayo. (Fil. 2:3) Maragsakan la ketdi ni Jehova no napakumbabatayo ken no datayo “ti mangyun-una” iti panagpipinnadayaw iti nadumaduma a pamay-an a kas kadagiti nadakamat.—Roma 12:10; Sof. 3:12.

18. Apay a kayatmo a tuladen ti kinapakumbaba ni Jehova?

¹⁸ No ikagumaantayo a tuladen ti kinapakumbaba ni Jehova, ti naayat a nailangitan nga Amatayo, nalaklakatayo a maasitgan, agbalintayo a mas nainkalintegan, ken naan-anus. Kas resultana, mapadayawantayo ti sabsabali a kas iti ar-aramiden ni Jehova. Laglagipentayo a no aramidentayo ti amin a kabaelantayo a mangtulad iti napakumbaba a Dios, agbalintayo a napatpateg kenkuana!—Isa. 43:4.