Saan a ti Kinaranggas ti Solusion

Umad-adu ti mamati ita a ti kinaranggas kano ti solusion kadagiti panaglalaban, gubat, wenno problema. Ngem naiduma unay dayta iti insuro ken inaramid ni Jesu-Kristo. Kitaem ti dadduma kadagita.

Ti imbaga ni Jesus

Iti sikat a Sermon ni Jesus iti Bantay, insurona a ti panagpungtot, panangatake, ken kinaranggas ket saan a solusion kadagiti di pagkikinnaawatan. Ammuem ti dadduma kadagiti insurona.

• “Aramidenyo . . . kadagiti tattao ti amin a kayatyo nga aramidenda kadakayo.” (Mateo 7:12; Lucas 6:31) Maawagan daytoy iti Nabalitokan a Bilin wenno Golden Rule.a Isursurona a tratuentayo ti sabsabali a kas iti kayattayo a pannakatrato. Siempre, awan kadatayo ti mayat a maranggasan, isu a saan kadi a kayattayo met a respetuen ken agbalin a nasingpet iti amin a tattao, uray kadagidiay saantayo a kapada ti kapanunotan?

• “No adda mangtungpa iti kannawan a pingpingmo, itayam pay ti kannigid.” (Mateo 5:38, 39; Lucas 6:29) Saan nga isursuro ditoy ni Jesus a bay-antayo lattan a dangrandatayo. Korkorehirenna laeng ti di umiso a kapanunotan a mabalin nga isursuro idi ti dadduma a lider ti relihion nga okey laeng ti agibales. Isursurona ketdi a no saan a nasayaat ti panangtratoda kadatayo, agbalintayo koma a kalmado imbes nga agibalestayo.b

• “Itultuloyyo nga ayaten dagiti kabusoryo.” (Mateo 5:43, 44; Lucas 6:27) Insuro ni Jesus a masapul a nasingpettayo kadagidiay manggurgura wenno saan a patas ti panangtratoda kadatayo. Saanna nga ibagbaga a konsintirentayo ti dakes nga aramidda.c Imbes ketdi, no agbalintayo a nasingpet kadagiti manggurgura kadatayo, mabalin a dayta ti mangpabaaw iti pungtotda ken baka sumingpetda met kadatayo.

Ti inaramid ken aramidento ni Jesus

Insuro ni Jesus a saan a ti kinaranggas ti solusion, ket inaramidna dayta. Iti rabii a naaresto ni Jesus, limmaban ti maysa kadagiti pasurotna tapno maidepensana isuna. Ngem imbaga ni Jesus: “Isublim ta espadam iti kalubanna, ta ti mangusar iti espada matayto iti espada.” (Mateo 26:52) Impakita ngarud ni Jesus ti ayat kadagiti bumusbusor kenkuana idi pinakawanna ida, nga uray la inkararaganna pay ida!—Lucas 23:33, 34; 1 Pedro 2:23.

Ikarkari ti Biblia nga asidegen a pagpatinggaen ti Prinsipe ti Kappia a ni Jesus ti amin a kinaranggas. (Isaias 9:6, 7) Tapno maammuam ti ad-adu pay maipapan iti daytoy nagmayat a masakbayan, basaem ti artikulo a “Gubat ken Panaglalaban—Kasano nga Agpatingga?”