Addanto Talna iti Intero a Lubong

Kayat ti amin ti agbiag iti natalna a lubong. Idi pay a padpadasen dagiti lider ditoy lubong a pasardengen ti panaglalaban ken iyeg ti talna. No dadduma, agballigi dayta, ngem saan nga agbayag ta mangruginto manen ti panaglalaban. Agbalinto pay ngata a natalna ti intero a lubong? Wen! Panunotem ti insuro ken aramidento ni Jesus tapno mapasamak dayta.

Ti aramidento ni Jesus

Ipakita ti Biblia ti dandanin aramiden ni Jesus tapno agbalin a natalna ti lubong.

• “Mapanagananto [ni Jesus] iti . . . Prinsipe ti Kappia. Agsaknapto ti panagturayna ken saanto nga agpatingga ti kappia.” (Isaias 9:6, 7) Gapu ta ni Jesus ti Agturay iti Pagarian ti Dios, pagbalinennanto a natalna ti lubong ket saanto nga agpatingga dayta.

• “Ispalennanto dagiti napanglaw nga agpatpatulong . . . ken ti asinoman nga awan katulonganna.” (Salmo 72:12-14) Usarento ni Jesus ti autoridadna tapno ipakat ti pudpudno a hustisia ket pagpatinggaennanto ti amin a gubat, kinaranggas, ken panagrigrigat.

• “Saanto a mangilayat ti nasion iti espada maibusor iti sabali a nasion, ken saandanto metten a sursuruen ti makigubat.” (Isaias 2:4) Inton iturayan ni Jesus ti daga, sursuruento ti amin a tattao ti makikappia, saan ket a makigubat.

Tapno maammuam no kasanonto a pagbalinen ni Jesus a natalna ti lubong ken no kasanokanto a makapagbiag iti dayta, buyaem ti ababa a video nga Ania ti Pagarian ti Dios?

Ti insuro ni Jesus

Uray ita, matultulongan ti minilion a tattao nga agbalin a mannakikappia gapu kadagiti insuro ni Jesus. Iti popular a Sermon ni Jesus iti Bantay, insurona dagiti prinsipio a makatulong kadagiti tattao nga agbalin a mannakikappia. Kitaem ti dadduma a pagarigan.

• “Naragsak dagiti mannakikappia.” (Mateo 5:9) Insuro ni Jesus kadagiti pasurotna a saanda laeng a liklikan ti gulo no di ket isuda koma ti mangyun-una a mangisubli iti talna.

• “Mapanka makikappia nga umuna ken kabsatmo ket inton makasublika, ipaaymo ti datonmo.” (Mateo 5:23, 24) Imbaga ni Jesus kadagiti dumdumngeg kenkuana nga urnosenda a dagus dagiti pagririrrianda. Insurona a nagpateg a makikappiatayo tapno nasayaat ti relasiontayo iti Dios.

• “Isardengyo ti mangukom tapno saankayo a maukom.” (Mateo 7:1) Pinakdaarannatayo ni Jesus a saantayo koma a sobra a mangukom wenno ukomentayo ti dadduma iti banag a saantayo met nga ar-aramiden. Mabalin ngamin a dayta ti pangrugrugian iti panagaapa. Insuro ni Jesus nga imbes a managdillawtayo, ‘itultuloytayo koma a pakawanen’ dagiti pagkamkamalian ti dadduma.—Lucas 6:37.

Adu a tattao iti intero a lubong ti mangar-aramid kadagiti insuro ni Jesus. Uray kadagiti lugar a nakaro ti kinaranggas wenno gulo, ikagkagumaanda a natalna a solbaren dagiti di pagkikinnaawatan, agbalin a manangpakawan, ken agbalin a naayat uray no saan a nasayaat ti pannakatratoda.

Tapno maammuam no kasano a nakatulong dagiti insuro ni Jesus tapno maaddaan ti dadduma iti talna, basaem ti artikulo a “Natalna a Panunot Uray no Adda Gubat ken Panaglalaban.”