Ti Dios Kadi ti Makimbasol iti Panagsagabatayo?

Sungbat ti Biblia

Ti sungbat ti Biblia ket nalawag a saan! Saan a paset ti panggep ni Jehova a Dios nga agsagaba ti sangatauan. Nupay kasta, ti umuna a pagassawaan ket nagrebelde iti Dios ken kinaykayatda nga isuda ti mangikeddeng iti bukodda a pagalagadan iti naimbag ken dakes. Nagsukirda iti Dios isu a sinagabada dagiti resulta dayta.

Mapaspasarantayo ita dagiti epekto ti di umiso a desisionda. Ngem saan a pulos a nagtaud iti Dios ti panagsagaba dagiti tattao.

Kuna ti Biblia: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta iti dakes a bambanag saan a mabalin a suoten ti Dios ket isu saanna met a suoten ti asinoman.” (Santiago 1:13) Mabalin nga agsagaba ti uray siasino—uray dagidiay patpatgen ti Dios.