Naragsak a Pamilia, Tinumba ti Trahedia Ngem Binangon ti Namnama

Idi inyanak ni baketko a Kaye ti balasangmi a ni Lauren, diak idi ammo no kasano ti agbalin a nasayaat nga ama. Idi nayanak ti maikadua nga anakmi a ni Michael, diak latta ammo. Kanayon ngamin idi nga agap-apa dagiti nagannakko, agingga a nagdiborsioda. Isu nga uray no kayatko ti agbalin a nasayaat nga ulo ti pamilia, diak ammo no kasano.

Kasta met nga idi tin-edyerak, naadiktoak iti alkohol ken droga. Idi adultoakon, awan ti direksion ti biagko. Gapu iti pannakaadiktok, ken iti panagsugsugalko, nakaaramidak kadagiti kamali a desision. Kimmaro pay ti kasasaad isu a pinanawannak ni Kaye ken intugotna ti dua nga annakmi. Napalalo idi ti lidayko.

Dinamagko ken Kaye no ania ti aramidek tapno agsubli isuna. Makipagad-adal idin iti Biblia ken Gloria, a maysa a Saksi ni Jehova, isu a simple laeng ti kondisionna: Makipagadalak iti Biblia. Diak idi ammo no kasano dayta, ngem gapu ta kayatko nga agsubli kaniak ni Kaye, immanamongak a bisitaennak ni Gloria ken ti lakayna a ni Bill.

Maysa a Saritaan a Nangbalbaliw iti Biagko

Idi immay bimmisita da Bill ken Gloria iti balaymi, nagbilibak iti nadekket a relasionda. Naammuak a dagiti annakda a kasadarak ket nagsayaat ti pangus-usaranda iti biagda. Idi laeng a napanunotko a ti Biblia ti mabalin a sekreto iti naragsak a pamilia.

Iti dayta nga ibibisita da Bill ken Gloria, nagsasaritaanmi dagiti problemak. Impakitada ti ibagbaga ti Biblia iti Galacia 6:7: “Aniaman nga imulmula ti maysa a tao, daytanto met ti apitenna.” Napanunotko, ‘No idi koma pay a sinurotko dayta a prinsipio kadagiti desisionko, naliklikak koma ti adu a problema!’

Iti panaglabas dagiti aldaw, nakitak a simmayaat ti biagko gapu iti panangyaplikarko kadagiti prinsipio ti Biblia. Insardengmi ken ni Kaye ti agsigarilio ken natulonganak a mangisardeng kadagiti dadduma pay a bisiok. Idi 1985, nayanak ti maikatlo nga anakmi a ni David, nga inikkanmi iti palayaw a Davey, ammok met laengen ti agbalin a nasayaat nga ama.

Agkakadua nga Agserbi ken Jehova

Bayat nga isursuromi ken Kaye dagiti annakmi nga ayatenda ni Jehova, nariknami met a nagbalinkami a nasingsinged kenkuana. Adu ti nasursuromi kadagiti publikasiontayo kas iti Panagimdeng iti Naindaklan a Mannursuro! Nagsayaat met nga ulidan kadakami ken kadagiti annakmi dagiti pamilia iti kongregasionmi.

Idi agangay, nagpayunir ti amin nga annakmi. Idi rugrugi ti 2004, nagboluntario ni Lauren iti Spanish a kongregasion. Karuruar met idi ni Michael iti Bethel tapno makiasawa, ken dandanidan mapan ken baketna a Diana idiay Guam tapno agboluntarioda sadiay. Karugrugi met idi nga agboluntario ni Davey nga agtawen iti 19 idiay Dominican Republic.

Maragragsakankami ken Kaye kadagiti desision dagiti annakmi. Marikriknami dagiti sasao iti 3 Juan 4: “Awanen ti sabali a makaited kaniak iti dakdakkel pay a ragsak no di daytoy: a madamagko nga agtultuloy dagiti annakko a magna iti dalan ti kinapudno.” Ngem dimi ninamnama nga agbalbaliw ti biagmi iti maysa a tawag.

Nasaem a Trahedia

Idi Abril 24, 2004, nangankami iti restawran ken Kaye a kadua ti dua a pagassawaan. Gapu ta nasurok a 100 a kilometro (60 mi) ti kaadayo ti restawran, naglugankami nga innem iti kotsek. Kalpasanna, imbabak dagiti kakaduak iti maysa a café para iti dessert sa napanak nagbirok iti parking. Idi kuan, nag-ring ti selponko. Timmawag ti maysa a gayyemko ket nadlawko a madandanagan ti bosesna.

“Adda dakes a napasamak,” kunana. “Naaksidente ni Davey.”

“Grabe kadi?” insaludsodko, ngem madanaganak iti sungbatna.

Idi damo, saanna a maibagabaga. Idi kuan, imbagana a natayen ni Davey.

Idi nalpasen ti tawag, inkararagko ken Jehova a pabilgennak. Idi kuan, simrekak iti café ket imbagak kadagiti kakaduami a madmadi ti riknak ken maymayat no agawidkamin. Saanko a maibaga ken Kaye ti napasamak ken Davey bayat nga adda kakaduami.

Nakarigrigat ti panagmanehok iti maysa ket kagudua nga oras a panagawidmi. Mangmangngegko nga eksayted ni Kaye a mangibagbaga kadagiti kakaduami a dandanin agawid ni Davey. Kabayatanna, adun ti agteteks iti selponko tapno makipagriknada, ngem saan pay nga ammo ni Kaye a natayen ti anakmi.

Idi naitulodmin dagiti kakaduami, nagawidkamin. Kinitanak ni Kaye ket ammonan nga adda dakes a napasamak. “Ania ti napasamak?” dinamagna. Ammok a kasla agtupak ti langit ken daga ken Kaye iti ibagak kenkuana, a kas iti napasamak kaniak dua nga oras sakbayna idi adda timmawag.

Panangsango iti Ipapatay ti Ipatpategmi

Naipasangokami idin ken Kaye kadagiti narigat a situasion, ken ammomi a liwliwaen ni Jehova dagiti agserserbi kenkuana. (Isaias 41:10, 13) Ngem naiduma unay daytoy a pannubok. Diak malapdan a panunoten, ‘Apay a napasamak daytoy ken ni Davey—nakaregregta nga agserserbi ken Jehova? Apay a saan a prinotektaran ni Jehova?’

Napalalo met ti liday dagiti kakabsatna iti napasamak. Nakasaksakit para ken Lauren ti ipapatayna ta kasla maikaduan nga ina ni Davey. Nakasaksakit met laeng dayta ken Michael. Uray no lima a tawenen nga awan iti balaymi, nabiit pay a nabigbigna a nakasaysayaat ti nagbalinan ti adingna.

Sipud idi damo, dagus a timmulong kadakami ti kongregasion. Kas pagarigan, uray idi saan pay a naawat ni Kaye a natayen ti anakmi, nagsangpet dagiti kakongregasionmi iti balaymi tapno liwliwaen ken tulongandakami. (Proverbio 17:17) Diakto pulos malipatan ti ayat nga impakitada!

Tapno mailiwliwagmi ti lidaymi, regular nga agkararagkami ken Kaye, agadalkami iti Biblia ken makigimongkami. Saan a naikkat dagita ti saem a marikriknami. Ngem ammomi nga importante dagita tapno natibker latta ti espiritualidadmi.—Filipos 3:16.

Kabayatanna, nagboluntario da Michael ken Diana iti as-asideg kadakami, ken nagsubli ni Lauren iti English a kongregasionmi. Nakatulong ti panagkakaduami kadagiti simmaruno a tawtawen tapno mailiwliwagmi ti ipapatay ni Davey. Idi nakiasawan ni Lauren, nagdakkel met ti naitulong ti lakayna a ni Justin.

Narigat a Biahe

Di nagbayag kalpasan ti ipapatay ni Davey, adda inaramidmi tapno mailiwliwagmi ti saem a marikriknami—nagrigat ngem nagbalin a bendision dayta. Iyestoria ni Kaye.

“Idi imbaga ni lakayko a natayen ni Davey, kaslaak la natnag iti nakaun-uneg nga abut, ket nagbayag a kasta ti nariknak. Sobra ti lidayko ket saankon a maaramidan dagiti normal nga ar-aramidek. Kanayon nga agsangsangitak. Aminek nga adda dagiti tiempo a kagurak ni Jehova ken ti asinoman a sibibiag. Panagriknak, saanak idin a rasonable.

“Kayatko ti mapan idiay Dominican Republic. Kayatko ti mapan iti nagyanan ni Davey ken nagserbianna ken Jehova bayat ti maudi a bulbulan ti biagna. Nakapuy pay idi ti emosionko, ken panagriknak, awan pay pigsak nga agbiahe iti adayo.

“Imbaga ti nadekket a gayyemko nga agladladingit met dagiti gagayyem ni Davey idiay Dominican Republic ken kayatda a maam-ammo ti pamiliana. Napabilegak iti suportana tapno mapanak.

“Dayta a biahe ti talaga a kasapulan ti pamiliami. Naammuanmi kadakuada a talaga a naespirituan a tao ni Davey. Imbaga ti kakaisuna a panglakayen iti kongregasion a nagserbianna a mapangnamnamaanna ti anakko kadagiti asaynment a naitalek kenkuana.

“Bayat a magmagnakami iti kalsada a mapan iti nagyanan ni Davey, umasideg kadakami dagiti tattao ket ibagada dagiti nagsasayaat nga inaramid kadakuada ti anakko. Ammok a nasingpet ti anakko, ngem naammuak iti daytoy a kapadasan no kasano nga inkagumaan ti anakko a tuladen ni Jesus.

“Naam-ammomi met ti maysa a Bible study ni Davey—maysa a lalaki a naidalit iti pagiddaanna iti nakabasbassit a balay. Nakapangpanglaw dayta a lalaki, ngem imbaga dagiti kakabsat iti kongregasion a nagsayaat ti panangtrato ni Davey kenkuana ken resrespetuenna. Maragragsakanak iti inaramid ti anakko!

“Daytan ti karirigatan a biahek. Ngem nakatulong kadakami ti pannakipagladingit ken panangliwliwa dagiti makaam-ammo ken Davey, ket kasta met ti nariknada. Limmag-an ti pusomi iti dayta a gundaway.”

Naparegta iti Ulidan ni Davey

Adda artikulo iti Enero 8, 2005, a ruar ti Agriingkayo! maipapan iti ipapatay ni Davey ken iti panagserbina idiay Dominican Republic. Saanmi idi nga ammo no ania ti agbalin nga epekto dayta nga artikulo kadagiti agbasa. Kas pagarigan, idi Mayo 2019, maysa a brother nga agnagan Nick ti nangkontak kadakami ket imbagana:

“Dandani idin agleppas ti 2004, addaak iti kolehio ken awan ti naespirituan a kalatko. Saanak a naragsak. Inkararagko ken Jehova a tulongannak a mangusar iti kinaagtutubok iti nasaysayaat a pamay-an. Di nagbayag, nabasak ti kapadasan ni Davey iti Agriingkayo! Dayta ti sungbat ti kararagko!

“Nagsardengak nga ageskuela sa nagpayunirak. Pinagbalinko met a kalat ti agsursuro iti Spanish ken umakar iti sabali a pagilian. Idi agangay, nagserbiak idiay Nicaragua ken nageskuelakami ken baketko iti School for Kingdom Evangelizers. No adda agdamag no apay a nagpayunirak, iyes-estoriak no kua ti kapadasan ni Davey.”

Adda pay sabali a nakasorpresaanmi idi naam-ammomi ti sister nga agnagan Abi, a nangasistir kadakami iti hotel idi nagbalinkami a delegado iti 2019 nga Internasional a Kombension idiay Buenos Aires, Argentina. Nakasingsingpet ken nakaay-ayat a sister. Mariknami ken Kaye nga adda pagpadaanda ken Davey.

Idi nagsublikami iti hotel, in-send-mi ken Abi ti link ti artikulo iti Agriingkayo! maipapan ken Davey. Sumagmamano a minuto kalpasanna, nag-reply. Kayatna unay ti makisarita kadakami, isu a nagkikitakami iti lobby. Agsangsangit ni Abi a nangyestoria a gapu iti kapadasan ni Davey, natignay nga agpayunir idi Septiembre 2011 sa nagboluntario iti adayo a teritoria. Kunana, “No marigrigatanak iti asaynmentko, basaek manen ti artikulo.” Awit-awitna pay ketdi ti kopiana!

Dagiti kapadasan a kas kadagitoy, ipakitana a pasetkami ti sangalubongan a pamilia. Awan pumada iti panagkaykaysa ti ili ni Jehova iti daytoy a lubong!

Naliwliwakami ken Kaye nga adu ti naparegta iti kapadasan ni Davey. Ti agpayso, maliwliwakami kadagiti ipatpategtayo nga agtutubo a mangmangted iti kasayaatanda ken Jehova. Mabalin a dida ammo nga adu ti mapabpabileg iti kinaregtada ken iti ulidanda, a mangtignay iti dadduma a mangipaay iti amin a kabaelanda ken Jehova.

“Sibibiagda Amin Kenkuana”

Iti Lucas 20:37, imbaga ni Jesus ti inyawag ni Jehova iti bagina kas “ti Dios ni Abraham ken Dios ni Isaac ken Dios ni Jacob.” Saan nga imbaga ni Jehova nga isu ti Diosda idi laeng sibibiagda no di ket isu latta ti Diosda uray nataydan! Apay? Imbaga ni Jesus iti bersikulo 38: “Sibibiagda amin kenkuana.”

Wen, iti panangmatmat ni Jehova, amin a matalek nga adipenna ket sibibiag; a mangipakita a kayatna unay a pagungaren ida! (Job 14:15; Juan 5:28, 29) Kombinsidoak a kasta ti marikrikna ni Jehova ken ni Davey, ken kadagiti amin nga adipenna a naturogen ken patay.

Kayatko unay a makita manen ni Davey, ngem kaykayatko a makita nga agkaduada manen ken Kaye, ta isuna ti kakaruan iti narikna a saem. Espesial kaniak ti sasao ti Lucas 7:15: “Bimmangon ti natay ken nagsao, sa inyasideg ni Jesus iti inana.”

Idi Septiembre 2005, nagpayunirak metten a kas ken Kaye. Anian a pribilehio ti agserbi kas payunir a kadua ni baketko, dagiti annakmi, ken ti assawada. Kas agkaykaysa a pamilia, supsuportaranmi ti maysa ken maysa, ken agtultuloykami a nakapokus iti namnama iti masanguanan a baro a lubong, inton makaduami manen ti ipatpategmi a ni Davey.