Ti Edukasion ti Anakyo ken Dakayo

“Ti kapanunotan ti anakyo maipapan iti edukasion ken ti kinapategna mangrugi kadakayo. Dakayo koma ti agbalin a sibibiag nga ulidan iti inanamaenyo a dayawen ken tuladen dagiti annakyo.”​—The National Commission on Excellence in Education.

ANIADA dagiti eskuelaan a kayatyo iti pagilianyo? Dagitoy man ti naisangsangayan wenno saan unay a nasayaat, ti anakyo busbosenna ti adu unay a tiempo sadiay. Aniada a kita ti impluensia ti pakaisaranganna? Ti laeng pamay-an tapno maammuan a sigurado isu ti kanayon a panangaramid iti ibibisita iti eskuelaan ti anakyo ket am-ammuenyo dagiti mannursurona. Kasta met taginayonenyo a silulukat ti komunikasionyo iti anakyo. Alertokayo koma iti aniaman a parikut wenno pakadanagan a mabalin a mainaig iti eskuelaan.

Pudno, adu a nagannak ti marigatan met iti edukasion. Ngem maysa kadagiti prinsipal idiay eskuelaan elementaria idiay Siudad ti Nueva York ti nangibaga iti Agriingkayo!: “Uray pay ti awan adalna a nagannak mabalin nga agbalin a positibo unay iti panagadal ti anakna. Mabalinna a paregtaen ti anakna a mapan ageskuela. Masiguradona a ti anakna aramidenna dagiti homeworkna ket ti ubing maaddaan ti umiso nga aglawlaw a pagadalan. Mabalinna a pabilgen ti maisursuro idiay eskuelaan babaen ti panagimtuodna, ‘Ania ti nasursurom idiay eskuelaan ita?’”

Laglagipenyo, met, a ti kangrunaan nga edukasion a maipaay ti nagannak isu “ti panangdisiplina ken panangiturong panunot ken Jehova.” (Efeso 6:4) Ti ubing a maisuro a kasta addaan ti nabileg a pakatignayan a mangsanay a naimbag kadagiti nasursurona a paglaingan. (Idiligyo ti Deuteronomio 17:18, 19; 1 Timoteo 4:13 ken 5:8.) Dayta nga ubing maaddaan met iti natimbeng a panangmatmat iti naaramidanna ken liklikanna ti makadangran a pannakisalisal, ket iti kasta nasaysayaat ti panangsarangetna kadagiti pannakapilit ken pakarigatan iti eskuelaan.a​—Eclesiastes 4:4; Galacia 5:26.

Dagiti saan nga agballigi nga eskuelaan ket basta paset laeng iti kumarkaro a pammaneknek a ti turay ti tao ket saan a naan-anay. (Jeremias 10:23) Dagiti paspasamak ti lubong paneknekanda a naimbag nga awan panagduadua a din agbayag ti Dios sublatennanton ti panangimaton iti daga. (Lucas 21:10-28) Awanton ti kinaawan adal wenno schulangst iti sidong ti panangiturayna. Ta dagiti amin nga agnanaed iti daga “isudanto dagiti tattao a nasursuruan ni Jehova.” (Isaias 54:13) Ket “ti daga mapnonto iti pannakaammo ken ni Jehova a kas dagiti dandanum saknapanda ti baybay.”​—Isaias 11:9.

Kabayatanna, nupay kasta, maaddaan iti interes iti edukasion ti anakyo. Kalpasanna, uray pay no saan a makalasat ti eskuelaan iti pannakasubok, ti anakyo agballiginto.

[Footnote]