Manipud Managbasatayo
Pananglapped kadagiti Aksidente
Nagsuratak maipapan iti isyuyo a napauluan “Dagiti Aksidente—Malapdanda Aya?” (Disiembre 8, 1985) Iti kompaniami iti gas ken koriente serioso nga alaenmi ti addang iti kinatalged. Padasenmi nga ipaganetget ti kinatalged no awan iti trabaho agraman ti kinatalged no adda iti trabaho. Tarigagayanmi ti mangkalikagum iti pammalubos a mangiprenta iti binulan a pagbasaanmi a “Safety Bulletin,” iti intero wenno paset, dagiti artikulo a “Dagiti Aksidente—‘Apay a Siak’” ken “Dagiti Aksidente—Ti Makagapu ken Pananglapped.”
E. A., Shift Supervisor, Iowa
Basta Aggayyem Laeng
Kayatko nga iyebkas ti napasnek a panagyamanko iti naintiempuan a panangikagumaanyo a mangmolde iti kapanunotan dagiti agtutubo. Ti atensionko naawis iti artikuloyo nga “Agimtuod dagiti Agtutubo . . . Mabalin Aya nga ‘Aggayyem Laeng ti Babai ken Lalaki’?” (Nobiembre 8, 1985) Daytoy a topiko ti pampanunotekon iti nabayagen a tiempo. Babaen iti tulong ti naintiempuan a balakadyo, naisardengkon daytoy a kababalin, ket natulongak ti kaaduan kadagiti gagayyemko a maaddaan iti natimbeng a panangmatmat iti daytoy nga isyu. Itultuloykonto ti mangbasa kadagiti magasinyo ken usaren dayta a tumulong kadagiti amin a gagayyemko ken dagiti dadduma pay.
J. C. O., Nigeria
Kalkalpasko pay laeng a binasa ti artikulo nga “Agimtuod dagiti Agtutubo . . . Mabalin Aya nga ‘Aggayyem Laeng ti Babai ken Lalaki’?” Ti impormasion naisangsangayan ti kinasayaatna, nangnangruna maipaay kadagiti agtutubo nga agwaywayas. Daytoy nga artikulo ti mangipalagip iti maysa a banag a saan laeng a namnaminsan a nakitak. Ti kasasaad ti kasla maipapan iti tallo nga addaan iti nakasingsinged a relasion iti asawa a lalaki, asawa a babai ken ti kasayaatan a gayyem ti asawa a babai. Saan laeng a napeggad maipaay iti asawa a lalaki ken ti kasayaatan a gayyem ti asawa a babai ti mangbusbos iti adu a tiempo nga agkadua, uray pay no ti asawa a babai adda sadiay a kas met kadagiti agtutubo nga agwaywayas a mangsapul iti basta panaggayyem laeng?
K. B., Nueva York
Pudno, mabalin nga adda ti peggad iti emosion a nairaman no adda ti tallo a nasinged nga aggagayyem iti man kasayaatan a gayyem ti asawa a babai wenno ti kasayaatan a gayyem ti asawa a lalaki. Kasta met, mabalin nga adda ti maipada a peggad no dagiti dua ti kankanayon nga agkadua a nakasingsinged, uray pay iti trabaho, kadagiti sosial a panagtitipon, wenno kadagiti bakasion. No maigapu iti aniaman a rason ti naasawaan a tao mangpataud iti nasinged, nalimed, ken mannakipagrikna a pannakigayyem iti maysa a tao a saan a ti asawana, dayta ti mangawis iti peggad ken adu a panagladingit.—ED.
Di Naikasar nga Ina
Maipapan iti artikuloyo nga “Agimtuod dagiti Agtutubo . . . Di Kasado a Kinaina—Mapasamakto Aya Kaniak?” (Disiembre 22, 1985), isingasingko a mabalin nga inawaganyo koma daydiay ti “Di Kasado a Nagannak.” Masapul nga impaganetgetyo koma nga ad-adda pay iti artikulo ti biddut nga aramiden agpadpada dagiti lallaki ken babbai a tin-edyer. Pagarupek a mabalin nga ad-adda pay koma nga impaganetgetyo ti moral a rebbengen dagiti dua a partido ket ad-adu pay koma ti imbagayo iti parikut iti kababalin ti lalaki iti panagdenna sakbay ti panagasawa, a dagitoy a dua ti mangiturong iti panagsikog ti tin-edyer.
L. K. N., England
Umanamongkami a ti rebbengen dagiti agtutubo a lallaki ken ti pagbanaganna kadakuada iti moral ti masapul a maipaganetget met. Ti artikulo a masupsuppiat ti nangnangruna a naiturong kadagiti agtutubo a saan a naasawaan a babbai, nupay no ti maudi a tallo a parapo ti naiturong kadagiti agtutubo iti agpada a sekso. Addanto dadduma nga artikulo iti “Agimtuod dagiti Agtutubo . . . ” a mangtaming kadagiti nadumaduma a paset daytoy a parikut isu a mangiramanto kadagiti espisipiko a balakad a maipaay met kadagiti agtutubo a lallaki.—Ed.