Manipud Managbasatayo

Ipapatay ti Inay-ayatyo

Daytoy a surat ket panagyaman kadakayo a maipaay iti nagsayaatan nga artikulo maipapan iti “No ti Inay-ayatyo Matay.” (Oktubre 22, 1985) Idi natay ni nanangko iti terminal a sakit idi Enero 1984, sinagabak dagiti adu a tigtignay ti panagliday a sinalaysayyo. Dinakamatyo a masansan a ti surat manipud iti maysa a gayyem makatulong. Pudno daytoy. Ti ingungutek a gayyem nagsurat kaniak a mangiyebkas iti ladingitna iti pukawko, ket daytat’ makaparegta unay ta nabasakon dayta a surat iti namin-adu a daras no mapanunotko ni nanangko. Tarigagayak nga isingasing a kalpasan ti pannakapukaw iti inay-ayat, ti maysa a tao ti masapul nga agsubli iti gagangay nga aramidna iti kabiitan a panawen. Okupadoak itan iti amin tiempo a ministerio, ket dayta ti nakatulong kaniak iti kasta unay.

A. M., Oklahoma

Agyamanak iti nagsayaatan nga impormasion nga impaayyo iti artikuloyo a “No ti Inay-ayatyo Matay.” Pinadakkelnak ti apok a baket, ket idi natay daytoy idi napalabas nga Enero pagarupek nga agmauyongakon. Nupay no addaanak iti namnama nga isut’ mapagungarto, mariknak a makapungtotak ken mariribukan. Mariribukanak ta siak, maysa a lalaki, sipapanayag a nagsangitak iti pompon. Nanipud idin, riribukennak ti riknak a pannakabasol. Dagiti artikuloyo isu laeng ti kasapulak. Kayatko nga ibaga ti maysa a banag kadagidiay a sibibiag pay dagiti dadakkelda. Ibagayo kadakuada nga inay-ayatyo ida, a masansan. Maysa nga aldaw saanyonton a maibaga dayta.

P. W., New York

Basta Aggayyem Laeng

Naan-anay a diak umanamong kadagiti kapanunotanyo iti artikulo nga “Agimtuod dagiti Agtutubo . . . Mabalin Aya nga ‘Aggayyem Laeng’ ti Babai ken Lalaki?” (Nobiembre 8, 1985) Addaanak kadagiti adu a lallaki a gagayyem ngem diak marikna ti aniaman a seksual a banag. Kunaen ti Biblia nga ibilangyo ti lalaki a kas kabsatyo a lalaki. Kasla iwalinyo daytoy babaen ti panagkunayo a dakes ti maaddaan iti nasinged a gayyem a lalaki. Patiek a naimbag a dagiti lallaki ken babbai mabalin a “aggayyemda laeng.”

D. B., Alabama

Wen, mabalin a nasayaat iti biang iti maysa ti panangpataud kadagiti adu a gagayyem iti agpada a sekso. Ti artikulo a napagduaduaan tamingenna nga ad-adda ti maysa a lalaki wenno babai a mangpampanunot nga isu mabalinna ti maaddaan iti maysa a nasinged, nalimed a gayyem iti kasungani a sekso, maysa a “kanayon a kaduana,” ket taginayonenna daytoy a relasion nga awan a pulos ti seksual a pakainaiganna. Saan a nainkalintegan ti mamati a ti maysa mabalinna a sukayen ti kasta a nasinged a pannakipagayam iti maysa laeng kadagiti kasungani a sekso a saan a pulos a mairaman iti emosional.​—ED.

Nauneg ti panangapresiarko kadagiti artikuloyo nga “Agimtuod dagiti Agtutubo . . . Mabalin Aya a ‘Aggayyem Laeng’ ti Babai ken Lalaki?” (Nobiembre 8, 1985) ken “Agimtuod dagiti Agtutubo . . . Aniat’ Dakes ti ‘Basta Panaggayyem Laeng’?” (Nobiembre 22, 1985) Dagitoy pudno a linuktanda ti panunotko. No naaddaanak iti daytoy nga impormasion dua a tawenen a nasaksakbay, nabang-aranak koma a naan-anay iti pakarigatan nga emosional a mapadpadasak ita. Ti parikut a ta pulos a diak nalagip ti nangikabil iti pagbeddengan iti lugar a pakasapulan iti dayta. Ngem ti balakad iti Proverbio 22:3 ti naan-anay a mangsalaknibto kaniak ita ken iti masanguanan.

J. L., New York

Agyamanak kadakayo iti artikulo nga “Agimtuod dagiti Agtutubo . . . Mabalin Aya a ‘Aggayyem Laeng’ ti Babai ken Lalaki?” Immay dayta iti umiso a tiempo. Iti dayta a kanito padpadasek ti agballigi kadagiti epekto a “sumged” gapu iti maymaysa-dasig a romantiko a rikna a timmaud gapu iti ‘nasayaat pannakigayyem’ iti maysa kadagiti kasungani a sekso. Pudno a dayta ket maysa a pakarigatan iti emosion.

D. G., Arkansas