Manipud Managbasatayo—“No ti Inay-ayatyo Matay”
TI Oktubre 22, 1985 a ruar ti Agriingkayo! naglaon iti uppat-paset a serie iti Akkub a napauluan iti “No ti Inay-ayatyo Matay.” Adu a managbasa ti nagsurat a nangiyebkas iti panangapresiarda iti material. Tarigagayanmi nga iraman ti dadduma kadagiti komentoda.
“Pagyaman ti Panangipakaammoyo a Gagangay Laeng ti Riknak”
Kaaduan kadagidiay nagsurat ti nangiyebkas iti panagyaman iti pannakaammoda a gagangay laeng ti riknada. Nagsuratda:
“Ti anakmi a lalaki a ni Mark natay iti maysa nga aksidente idi napalabas a Hunio. Di maiyebkas dagiti sasao ti rikna ti maysa nga ina. Isut’ gayyemko ken kasta met anakko. Ti Agriingkayo! tinulongannak a makabigbig a ti riknak ket gagangay laeng.”
—A. D., Nebraska
“Dua a lawas kalpasan ti iruruar daytoy nga artikulo natay ni tatangko. Diak ammo no apay a nariknak ti rikna a nariknak ken no kasano ti panangtaming kadakuada. Kalpasanna nabasak dagitoy nga artikulo ket ti marikriknak gagangay laeng. Tunggal malidayak, basta pidutek laeng ti Agriingkayo! ket ulit-ulitek a basaen. Babaen ti panangaramidko iti kastoy, maliwliwaak, ket makapagtultuloyakon.”
—D.R., Pennsylvania
“Ti asawak natay idi Oktubre 1983. Mariknak a nakabasolak kadagiti dadduma a rikrikna a marikriknak. Itan apresiarekon a nupay no diak pagtangsit ti kakasta a rikna, dagitoy gagangay laeng. Agyamanak iti kasta unay gapu iti makaliwliwa nga impormasion.”
—L. B., Nebraska
Maysa a managbasa, a ti 15-años nga anakna a lalaki ti natay sumagmamano a tawenen a napalabas, gupgopenna ti riknana iti kastoy: “Pagyamanan iti panangipakaammoyo a gagangay laeng ti riknak.”
—L. A., Connecticut
Kanayonan a Pannakaawat
Dadduma a sursurat ti mangipaay iti kanayonan a pannakaawat iti rikrikna ken kasapulan dagiti natayan.
“Kadagiti uppat a tawtawen a pannakabalok, diak pay nakangngeg kadagiti balo a nangdakamat iti kararag. Patiendak, itan kankanayonen nga iramramanko kadagiti karkararagko dagiti adu a balo ken ti asinoman a nakapukaw kadagiti inay-ayatda iti ipapatay. Daytat’ naan-anay a makapaupay.”
—L. B., California
“Idi Marso natay ti anakko a lalaki a ni David gapu iti nakaro a panagpadara iti utek. Ti doktorko inikkannak iti tabletas a tomaren iti mamitlo iti maysa nga aldaw—ken kadagiti rabii a diak pannakaturog. Nupay no ammok a dagitoy ti naited kaniak gapu iti asi ken pannakipagrikna, dagus a nasarakak ti bagik a mangmatmatmat iti relo, nga inanamaek a ti sumaganad a tabletas ti tomarek manen. Nakaam-amak, ket kamaudiananna impudnok iti asawak ti riknak. Iti balakadna, inbukbokko ida amin iti kubita tapno maiyanudda. Dagiti artikulo ti Agriingkayo! dakkel ti naitulongda iti pamiliak ken siak. Buyogen ti asi mabalin kadi, nga iti masanguanan, mangisuratkayo iti pakdaar maipapan iti peggad dagiti tabletas a pangparmek iti panagaburido ken leddaang?”
—I. S., England
“Ti pagay-ayatko unay maipapan kadagiti artikulo isu ti no kasano ti panangtamingda kadagiti dadduma ken no ania ti aramidenda ken nalabit saanda nga aramiden. Adu iti uneg ti kongregasion ti maamak nga umasideg kaniak gapu iti negatibo a tignayko. Narigat para kaniak ken kasta met kadakuada! Gapuna inanamaek a dagiti artikulo ti makatulong kadakuada tapno makatulongda kaniak itan.”
—R. W., British Columbia
“Rikrikna a Diak Kayat a Marikna”
Gagangayen a ti maysa a tao mangiyebkas iti liday, kas paneknekan dagiti dadduma a sursurat.
“Maysa nga inay-ayat ti natay, ket linapdak ti amin a naliday a riknak. Dagiti artikuloyo ti nangiruar kadagiti rikrikna a linapdak bayat iti 15 a tawtawen nanipud idi ipapatayna. Dagitoy dagiti rikna a diak kayat a marikna gapu iti nakaro a ladingit a pataudenda. Makitak itan a ti maysa masapul nga iyebkasna dagitoy a rikrikna a sipapanayag iti tiempo ti ipapatay.”
—R. M., Ohio
“Natay ni tatangko idi Oktubre 1984, ket agingga a nabasak daytoy a magasin diak inruar ti riknak. Iti sumaganad a dua a rabii a pannaturogko, nagkararagak ken Jehova, ket nagsangitak agingga a diakon makasangit. Nagyamanak ken Jehova ken ti ‘matalek ken naannad nga adipen’ maipaay iti mariknak a pannakabang-ar itan. Pagyamanan!”
—K. B., Ohio
Dadduma ti nalawag a nanglapped iti ladingitda ta mariknada a dakes para iti maysa a Kristiano nga agladingit. Nagsuratda:
“Sakbay ti pannakabasak kadagiti artikuloyo, mariknak a ti panagladingitko iparangarangna ti kinakurang iti pammati iti kari ni Jehova a Dios a panagungar. Inanamaek a makitanto manen ni nanangko, ngem dagiti artikuloyo tinulongandak a mangapresiar a ti panagladingit maawat para kadagiti Kristiano.”
—T. M., Kansas
“Ti nakatulong kaniak isu ti pannakaammo nga umiso ti panagladingit. Natibker ti pammatik iti panagungar, ket pagarupek a di umiso ti mangiyebkas iti panagladingit iti imatang dagiti dadduma, a pagarupek nga ikkak ida ti panagduadua a natibker ti pammatik iti dayta. Ti naudi nga artikulo tinulongannak a mangkita a ti namnamatayo dina ikkaten ti panagladingit, ngem pagbalinenna a nalaklaka nga ibturan dayta.”
—C. B., New Jersey
A ti panagladingit saan a di Nakristianuan makita iti ulidan ni Jesu-Kristo a mismo, idi isut’ “nagsangit” idi natay ti ingungotenna a gayyem a ni Lazaro. Ket nagladingit nupay kinapudnona iti mabiiten pagungarenna ti Lazaro manipud kadagiti natay!—Juan 11:33-44.
Makatulong dagiti Dadduma
Adu a managbasa ti nangiyebkas ti panangapresiarda kadagiti singasing no kasano a makatulongda kadagiti natayan.
“Sumagmamano a lawlawas a napalabas kellaat a natay ti ama ti maysa a naimbag a gayyem, a di ninamnama, idiay balay. Nangipatulodak iti kard a mangaw-awis kenkuana a bumisita. Pampanunotek a kanayon a saanto a nasayaat ti riknak no saritaenna ti maipapan ken tatangna. Sumagmamano nga aldaw sakbay ti ibibisitana, ay ken kitaenyo, ti Agriingkayo! dimteng nga addaan iti artikulo a ‘No kasano a Makatulong dagiti Dadduma.’ Binasak a namin-adu! Iti amin a kabaelak, inaramidko dagiti naisingasing. Dayta ket makabang-ar a malem, ket nagsaritakami a gagangay maipapan kadagiti bambanag a malagipmi maipapan ken tatangna. Nagkatawakami. Pagyamanan ti adu unay kadagidiay sasao iti umiso a tiempo.”
—K. E., Indiana
Dagiti natayan apresiarenda no dagiti dadduma ti agtignay a mismo, kas ipakita daytoy makasair a surat manipud managbasa a natay ti asawana.
“Adu ti nagkuna, ‘No adda aniaman a maaramidko, ibagam kaniak.’ Ngem maysa a Kristiano a babai saan a nagimtuod. Napan a dagus iti kuarto, ket linabaanna dagiti narugit nga ules. Ti sabali ti nangala iti timba, danum, ken dagiti pagdalus ket inugasanna ti alpombra a sinarwaan ti asawak. Dagitoy ti pudno a gagayyem, ket diakto ida maliplipatan. Sumagmamano a lawas kalpasanna, maysa kadagiti panglakayen ti immay a nakasuot iti pangtrabahona ken alikamenna ket kinunana, ‘Ammok nga adda tatarimaanen ditoy. Ania dayta?’ Anian a nagimbag dayta a lalaki ta tinarimaanna ti ruangan a marmarban ken tinarimaanna ti linea ti korientemi!”
—E.L., Puerto Rico
No Ania ti Marikna ti Naganak
Kinapudnona, maysa kadagiti karirigatan a banag kadagiti amin isu ti ipapatay ti anak. Dadduma a managbasa pinaneknekanda no kasano a makaupay unay dayta.
“Agyamankam unay iti Abril 22 nga Awake! Daytat’ dakkel a liwliwa kaniak. Makitayo, naammuan nga idi Abril 19 ti ubing a sikogko natayen. Nakigtotak. Iti daytoy a tiempo ur-urayek pay laeng ti ipapanko iti kuarto a pagpasngayan tapno ipasngayko ti anakko. Ngem ammok a dagiti rikna a napadasak ket gagangay, pagyamanan unay iti organisasion ni Jehova.”
—J. H., Virginia
“Innem a tawenen a napalabas natay ti maikadua nga anakko a pito a lawasna; naipasngay nga addaan adu a depekto iti pannakaipasngay. Dagidiay nga artikulo ti nangitudo nga eksakto no ania ti riknak ken namagbalin kaniak a makakita nga addada dadduma a pudno a makaawat iti napadasak. Agyamanak unay iti panangisuratyo kamaudiananna iti nariknak ngem diak ammo nga inyebkas.”
—M. S., New York
“Tarigagayak ti mangipaay iti naisangsangayan a panagyaman iti artikuloyo a ‘No ti Inay-ayatyo Matay.’ Ti anakko a lalaki a ni Ricky nadungpar ti kotse ket natay idi Setiembre 28, 1984. Isut’ lima laeng ti tawenna. Uppat a lawas kalpasan ti aksidente, rinugiak ti nakipagadal iti Biblia iti maysa a Saksi ni Jehova. Daytat’ mangtultulong kaniak nga agballigi itoy a nakarigrigat a tiempo. Pampanunotek ni Ricky nga inaldaw, ket no dadduma nga al-aldaw agtugawak pay laeng nga agsangit ta mailiwak unay. Ngem itan babaen ti naayat a panangiwanwan ni Jehova ken babaen ti pananggun-odko iti umiso a pannakaammo iti Biblia, addaanak iti namnama a makitakto manen ni Ricky. Kunaek iti siasinoman a nakapukaw iti inay-ayatna, ‘Awaganyo ti maysa a Saksi ni Jehova a tumulong kadakayo nga agballigi iti dayta.’”
—F. P., Minnesota
Nalawag, ti ipapatay ti maysa nga inay-ayat ti kadadakkelan a rigat iti biag. Ti basta pannakaammo a ti marikriknayo ket gagangay ti makaipaay a mismo ti namnama. Kasta met, ti panangiyebkas, saan a ti pananglapped, iti riknayo makatulong met. Ket, kas iyebkas ti surat iti ngato, dakkel ti liwliwa manipud iti naibatay-Biblia a namnama nga “umayto ti oras a dagiti amin nga adda iti tanem a pakalaglagipan mangngegdanto ti timek [ni Jesus] ket rummuardanto.”—Juan 5:28, 29.
[Kahon iti panid 29]
Grupo a Manangsuportar iti Kanser Nasarakanda a Makatulong ti Agriingkayo!
Kas sungbat iti serie iti Agriingkayo! a “No ti Inay-ayatyo Matay,” ti sumaganad a surat ti naawat manipud iti direktor ti programa iti panangsuportar iti kanser.
“Ti CancerShare ket maysa a programa ti panangsuportar a boluntario a panangiparis iti maysa iti sabali a grupo a maipaay kadagiti pasiente iti kanser ken ti pamiliada. Masansan a makaawatkami kadagiti awag manipud kadagiti tattao nga agsensennaay gapu iti pannakapukawda iti inay-ayatda, ket padpadasenmi ti tumulong babaen iti panangipatulod kadakuada kadagiti literatura maipapan iti panagladingit ken babaen iti panangiyam-ammo kadakuada kadagiti grupo a mangsupsuportar kadagiti natayan.
“Addada uppat nga artikulo iti Okrubre 22, 1985 a ruar iti Agriingkayo! a makatulong a naimbag kadagidiay agladladingit: ‘No ti Inay-ayatyo Matay’; ‘Ti Rikna ti Naganak’; ‘No Kasano a Makatulong dagiti Dadduma’; ken ‘No Kasano ti Agballigi’. Mabalin kadi nga usaren ti CancerShare ti amin wenno paset dagitoy nga artikulo, nga ipaay ti dayaw iti Watchtower Bible and Tract Society kas ti gubuayan daytoy, tapno tumulong kadagiti tattao nga agsensennaay?”
Ti pammalubos ti siaayat a naipaay iti daytoy a kasasaad.