Manipud Managbasatayo
Ipupusay iti Anak
Pagyamanan iti ruar a “Panangsaranget iti Ipupusay iti Anak.” (Agosto 8, 1987) Uray pay no nagsangitak iti sumagmamano a daras bayat ti panangbasak kadagiti artikulo, dayta ket nakatulong iti pannakaammok a dagiti dadduma met mariknada ti kas met iti rikriknaek. Marso 1978 idi ti 24-años nga anakmi a ni Karen ket natay idi isut’ nadungpar ti maysa a kotse iti maysa a pagsasangaan ti kalsada sumagmamano a bloke manipud iti pagtaenganmi. Inapresiarko unay ti kinuna ti artikuloyo a saan a dakes ti agladingit, ket dayta dina ipakita iti kinakurang iti pammati iti karkari ti Dios a panagungar; imbes ketdi, dayta ipamatmatna ti nauneg a panagayat iti natay a tao. Dayta ket makaliwliwa unay kaniak. Ti panagsursurat ni Diane Krych ken ni David maipapan iti kaadda iti party a maipaay kenkuana inton riingen ni Jehova manipud iti pannaturogna sinairna ti pusok. Siak met pampanunotek ti party ni Karen inton isut’ agungar. Kasla diakon makauray a mangkita iti nagpintasan nga isemna!
D.L., United States
Kabasbasak pay laeng ti ruaryo a “Panangsaranget iti Ipupusay iti Anak.” Mapaneknekak ti kinapudno iti tunggal sao sadiay. Ti panagladingit pulos a saan a pumanaw. Bayat iti 13 a tawtawen mariknak a nakabasolak gapu iti panagladingitko iti ipapatay ti anakko a lalaki. Saanakon a makarikna iti pannakabasol. Itan maliwliwaak a makaammo a ti panagladingit saanna nga ipamatmat iti aniaman a kinakurang iti pammati iti naindaklan a Diostayo, ni Jehova.
A. M., United States
Tarigagayak ti mangiyebkas iti nauneg a panangapresiarko iti artikulo a “Panangsaranget iti Ipupusay iti Anak.” Ti ingungoten nga anakmi a lalaki a ni John natay agarup pito a tawenen ti napalabas. Nagsagabaak iti adu kadagiti rikrikna a nadeskribir iti artikulo—di panamati, panangilibak, rikrikna a pannakabasol. Diak nagsurat kadagiti sursurat kenkuana ngem addaanak iti maysa a maleta a nakaipempenan dagiti alikamenna. Iti panunotko isut’ agbakbakasion ket di makasurat kaniak. Bayat iti dua a tawen malidlidayak, naadayu, ken awanan namnama. Diak maawatan dagiti rikriknak. Itan nasaysayaaten ti riknak, nupay no kaskasdi a dakkel pay ti pukaw. Pagyamanan unay ti panangtulongyo kadagiti dadduma a makaawat kadagiti rikriknada ken kadagiti positibo a bambanag a mabalinda nga ibaga wenno aramiden a makatulong.
V.W., United States
Kabasbasak pay laeng kadagiti artikuloyo maipapan iti “Panangsaranget iti Ipupusay iti Anak.” Innem a tawenen ken walo a bulbulan nanipud idi napukawmi ti kakaisuna nga anakmi a babai iti maysa nga aksidente iti kotse. Dagiti artikuloyo ti nangtulong kaniak a makakita a ti sagsagabaek ket gagangay laeng. Diak maawat nga isut’ natayen. Pampanunotek nga isu ti maysa a misionera iti sabali a daga, uray pay no ammok nga isut’ awanen. Mariknak met ti pannakasapul iti panagsurat kadagiti sursurat. Idi laeng napalabas a tawen nga inawatkon ti ipapatayna; nabigbigko a nupay kasano kabayag ti panagladingitko diak mabaelan ti mangipasubli kenkuana. Gapuna panawenen ti panangiwaksik iti nakaro a panagladingitko. Agyamanak iti kasta unay iti daytoy nga artikulo.
V. B., United States
Kas naibaga iti panid 14 iti nainaganan iti ngato a ruar, ti “Agriingkayo!” dina irekrekomendar ti panagsurat kadagiti sursurat iti natay a kas tulong iti panangiwaksi iti panagladingit. Dagiti sursurat ni Diane Krych ket naipablaakda saan laeng a tapno mangiyilustrar no kasano ti panangtaginayon ti namnama ti panagungar kenkuana no di ket tapno iyilustrarna no kasano ti panagtignay dagiti dadduma a tattao no agsagabada iti nakaro a panagladingit, tapno dagiti dadduma mabalinda ti agtignay a buyogen iti pannakaawat ken panangngaasi.—ED.