Talna iti Agsioman a Pamilia
• ‘Agsioman nga ama maipadamag a napukawna ti anusna ket pinang-orna ti siomanna nga agtutubo a lalaki agingga a natay.’
• ‘Tin-edyer a babai pinatayna ti agsioman nga amana babaen iti pumutputok a paltogna,’ sigun iti report ti polis.
• ‘Sangapulo ket uppat ti edadna nga ubing a lalaki pinaltogan ti agsioman nga inana, a naipadamag a napnuanen iti kababalinna.’
“DAGITI sangakabbalayan ti agsioman a pamilia ti mabalin a makariribuk unay a luglugar,” kuna ni Dr. John Visher, kadua a nangibangon iti Stepfamily Association of America. “No sumrek dagiti tattao iti relasion nga awan ti pudno nga inanamaen, mabalin nga agreklamoda nga addada iti sidong ti nakaro a rigat.” Gapu iti napartak nga iyaadu ti diborsio, kasta unay ti iyaadu dagiti agsioman a pampamilia. Ngem nakalkaldaang, 44 porsiento kadagitoy ti di nagballigi iti uneg ti umuna a lima a tawtawen! Ngem, adut’ nagballigi kadagiti naisangsangayan a parparikut iti panagtipon ti dua a pamilia. Ti panangiyaplikar kadagiti sumaganad a prinsipio ti Biblia ket nasken.
“Naim-imbag ti pannakalpas ti maysa a banag ngem iti rugina. Ket ti naanus nga espiritu naim-imbag ngem iti napusong nga espiritu. Saan koma a nadarasudos . . . nga agpungtot.” (Eclesiastes 7:8, 9) Kasapulan unay ti panaganus! Masapul a maipasdek ti relasion a saan a maikankano kadagiti gagangay a pampamilia. Dakayo saankay a maysa a “dagus a timmaud a pamilia.” Kuna dagiti eksperto a ti pamay-an ti panangpataud iti “dakami” mabalin nga alaenna ti uppat wenno pito a tawtawen. Idi punganay, dagiti agsioman kasla laglag-anenda laeng. Padasenyo ti saan a dagus nga agpungtot no ti damo a panangikagumaanyo a makigayyem kadagiti sioman nga annak ket saan a maawat.
“Gapu iti kinatangsit umay la ti riri, ngem kadagidiay a dumawat ti pammagbaga adda ni sirib.” (Proverbio 13:10) Ti nasukir, natangsit a kababalin—iti biang agpadpada ti annak wenno nagannak—agtungpal iti panagsuppiat. Maaddaan iti kanayon a panagsasarita kas maysa a pamilia ket pagsaritaan dagiti parikut. Sursuruenyo ti mangiyebkas ti rikriknayo iti pamay-an a mangipakita iti kinamannakipagrikna kadagiti dadduma. No ad-adda nga am-ammoyo ti “kabbaro” a miembro ti pamilia babaen iti silulukat a komunikasion, ad-addanto a nasingsinged.
“Ti pannakaawat iti sao masarakannanto ti imbag, ket siasinoman nga agkammatalek ken ni Jehova isu ti naragsak.” (Proverbio 16:20) Ti pannakaawat ramanenna ti panangmatmat iti labes ti nalawag a makita ken ti pannakabael a mangilasin kadagiti rason iti dadduma a kababalin ken tigtignay. (Kitaenyo ti panagsaludsod iti kasungani a panid.) Daytoy a kualidad tulongannakayonto a mangkita iti naimbag kadagiti dadduma a tao.
Kas pangarigan, bayat ti napungtot a panagsarita, maysa nga agsioman nga ina ti simmampataw ket insingasingna: “Bay-anta a sawen ti di kayat ti tunggal maysa kadata, ket kalpasanna dagus a pasarunuanta kadagiti bambanag a pudno a pagay-ayatta iti maysa ken maysa.” Kalpasanna, insuratna: “Nasdaawkami kadagiti amin a naimbag a kababalin nga apresiarenmi iti maysa ken maysa.” Dagiti lulua ken panaginnarakup ti simmaruno. Iti sabali a pagtaengan, maysa a tin-edyer ti immalsa idi nagasawa manen ni nanangna, ngem ti pannakaawat ti nangiyeg iti talna. “Kalpasan ti sumagmamano a bulan, nabigbigko a daytoy ti lalaki a mamaragsak ken nanangko,” kuna ni Jeff. “Ket dayta laeng ti napateg.”
Ngem iyaplikaryo man wenno saan dagitoy a prinsipio ket agpannuray iti espiritualidadyo. “Ti panagtalek ken Jehova,” a tarigagayan ti mangay-ayo kenkuana, isu ti sekreto ti talna iti agsioman a pamilia.