Manipud Managbasatayo
Dagiti Agtutubo ken ti Panaginum
Pagyamanan dagiti dua nga artikulo a naipablaak iti “Agimtuod dagiti Agtutubo . . . ” a paset, “Panaginum—Apay a Di Uminum?” (Nobiembre 22, 1984) ken ti “Pudno Kadi a Matulongannak nga Agballigi ti Panaginum?” (Disiembre 8, 1984) Umisokayo. Aginumak idi iti kasta unay no adda parikutko, ngem no mariingak, mariknak a nalidayak. Masapul nga adda aramidek iti dayta, ket dagidiay dua nga artikulo immayda iti umiso a tiempo. Nanipud idi nabasak ida, insardengkon ti aginum. Tarigagayak pay laeng ti uminum, ngem babaen iti tulong ti Dios ken ti balakadyo, napagballigiak daytoy dakkel a parikut.
H. C., Brazil
As-aso—Kanayon a Gayyem ti Tao?
Di pay nabayag kinamatnak ti dakkel nga aso ket nagammangawak. Kalpasanna nalagipko ti artikulo nga “As-aso—Kanayon a Gayyem ti Tao?” (Hulio 8, 1985) ken ti balakad: “Dikay agammangaw wenno agtaray. . . . Agtakder a sitatalna ket kasaritayo a gagangay ti aso a kasla tarakenyo.” Sinurotko daytoy nga instruksion, ket simmardeng a nagtaol ti aso ket pimmanawen a sikakalma. Pagyaman iti dayta nga artikulo.
F. B., Nigeria
Pananglapped iti Aksidente
Kayatmi nga iyebkas ti panagyamanmi kadagiti kopia iti magasinyo nga “Aksidente—Malapdanda Aya?” (Disiembre 8, 1985), isu a naiwaras kadagiti miembro iti CIPA (Internal Committee for Accident Prevention). Innalami ti gundaway a mangkablaaw kadakayo iti panangtamingyo iti tema a ngangngani adelantado, awan panangidumdumana iti pammati, iramanna ti isuamin. Umdas ti panangsaklawna iti talged iti pagtaengan, iti otel, iti kalsada—kanayon a kumita iti masanguanan. Isuronatay nga agbiag a napaut, a mangusar iti kasayaatan a kampilantayo: ti tured, panagteppel, a di ikankano dagiti pagbiddutan.
R. G. R., Presidente ti CIPA, Brazil
“Maysaak a Madre a Katoliko”
Maysaak a Romano Katoliko, ket diak mangidumduma. Basaek dagiti magasinyo, ket ti pakasairak unay isu ti artikulo a “Maysaak a Madre a Katoliko.” (Disiembre 8, 1985) Nagikkatak iti eskuelaan idi 1948, ket naparegtakami a mangbasa iti Biblia. Kasano a maibagana a dakkel a basol ti panagbasa ti Biblia? Diak babbabalawen ti ipapanawna iti Iglesia Katolika, ngem awan ti nangpilit kenkuana a mangala iti karina. Babaen ti panangusar iti pagiwarnakyo, busbusorenna ti bilin babaen ti panangpabasolna kadagiti dadduma, ket adawek: “Daytoy ti bilinko nga agiinnayatkayo iti maysa ken maysa.” Nasaysayaat pay no kinunana, pakawanek ti Iglesia Katolika iti dida panangtulong kaniak a makasarak iti pudno a bokasionko.
R. H., England
Ti banag maipapan iti pannakaparegta dagiti Katoliko nga agbasa iti Biblia wenno saan agduduma a naimbag, agpannuray iti pagnanaedanyo. Iti maysa a lugar a Katoliko idiay Francia, nalaka laeng a maibaga kenkuana a dakkel a basol ti panagbasa iti Biblia, ket sika naisuroka iti naiduma a panangmatmat iti Protestante nga Inglatera. Kasta met, awan ti makitami iti aniaman a paset ti artikulo a daytoy a dati a madre pinabasolna dagiti dadduma iti panangalana iti karina wenno pabasolenna ti dadduma iti dakes a pannakatratona, a nangiduron kenkuana a mangsapul iti pannakawayawaya kadakuada. Nabasami a dakkel ti pannakasapulna iti naespirituan ket daytoy a kasapulan di naipaay ti Iglesia Katolika wenno biag idiay kumbento. Imbes ketdi, ti naespirituan a kasapulanna ti naipaay babaen iti panagadal iti Biblia ken ti panangikasaba iti Sao ti Dios a kadua dagiti Saksi ni Jehova. Saan a mangiyeb-ebkas ti panangibales iti Iglesia Katolika.—ED.