Down’s Syndrome​—Moderno a Pamusposan

Ti cosmetic surgery isu ti moderno a pamusposan a pangtulong kadagidiay agsagsagaba iti Down’s syndrome, nupay no ti kasta a pannakaopera ket nakangingngina. Maysa nga ubing idiay Britania ken sumagmamano nga ubbing idiay Estados Unidos ti naaddaan iti kasta nga operasion. Ngem ti pannakairugi ti trabaho kadagiti 60 nga ubbing ti inaramid ti grupo dagiti siruhano idiay Israel nga indauluan ni Propesor Ruben Feuerstein.

Ania ti nairaman? Dagiti sobra ti luyloyna a kudil ti mabalin a maikkat tapno makorihir ti nakaro ti singkitna a mata. Maimula dagiti silicone tapno mangipaay iti baro a pannakaingato ti agong. Mabalin a palukmegen dagiti pingping ken mabalbaliwan ti itsura ti di madlaw a timid. Mabalin met a maiyasideg iti ulo ti sarang a lapayag. Ti atiddog unay a dila, a gagangay kadagiti adu nga addaan iti Down’s syndrome, mabalin a maputdan.

“Dagitoy nga ubbing” kuna ni Feuerstein, “ti masansan a saandan a masursuruan ket dadduma ti mabaybay-anen a matay [kadagiti] ospital kalpasan ti pannakaipasngayda. Gapu iti naisangsangayan nga itsurada maipagarup a saanda a makasuro a masansan a maisupadi iti pudno a kasasaadda.”

Iti panangitudo iti nalawag a makapnek nga epekto iti kaso ti maysa a babai idiay Britania, ti Sunday Times iti Londres impablaakna ti maysa a report iti sidong ti paulo a “Happiness is a brand new face.” Siempre, ti plastic surgery kadagiti kakasta a kasasaad addaan kadagiti kritiko. Ket ti Agriingkayo! dina ibaga wenno irekomendar dagiti espisipiko a porma ti panangagas, gaput’ bigbigenda a dagitoy ket personal a pangngeddeng.