Nakatulong Dagiti Saksi ni Jehova iti Irarang-ay ti Pannakaopera ti Puso
PINAULUAN ti Agosto 27, 1995 a Daily News ti New York ti report-da a “Ti Operasion nga Awan Mausar a Dara.” Inlanadna a ti New York Hospital-Cornell Medical Center ti “mangipalgak iti naiduma a wagas ti operasion a coronary bypass—ti umasping nga operasion a nabiit pay nga impakalikagum ti dati a mayor a ni David Dinkins—a saan unay a mapukawan iti ad-adu ngem iti sangatedted a dara.”
“Tangay nagutugot kadagiti pakaseknan dagiti Saksi ni Jehova,” inlanad ti periodiko, “ti nakaskasdaaw iti kabbaro a pamay-an . . . ti mayanninawto iti ginasut a ribu a doliar a masalimetmetan dagiti ospital ken agpayso a mapabassit ti peggad a mamulitan ti dara dagiti pasiente.” Imbaga ni Dr. Todd Rosengart, direktor ti programa ti ospital nga operasion nga awan mausar a dara: “Kabaelanmi itan a kissayan ti kantidad ti mayalison a dara a kasapulan kabayatan daytoy nga operasion manipud iti kadawyan a dua agingga iti uppat a unit iti kada pasiente agingga nga awanen ti mausar a dara.”
Imbaga ni Dr. Karl Krieger, cardiac surgeon ti ospital a timmulong a nangilungalong iti pamay-an: “No maisardengen ti pannakaidonar ti dara ken produkto ti dara, mapabassittayto met ti peggad ti sumagmamano a panaggurigor ken impeksion kalpasan ti operasion a kadawyan a mainaig iti panangyalison.”
Kunaen ti dadduma nga eksperto a “ti operasion nga awan mausar a dara pabassitenna ti tiempo a mabusbos idiay intensive care kalpasan ti operasion—manipud 24 nga oras wenno nasursurok iti innem laengen nga oras. Nabiit a nakaungar dagiti pasiente a napili agpaay iti operasion nga awan mausar a dara ket 48 nga oras a nasapsapa a nagawiddan manipud ospital ngem kadagiti pasiente a nayalisonan iti dara.” Kaipapananna a dakkel ti masalimetmetan dagiti ospital, gobierno, ken kompania ti seguro. Pinattapatta ni Dr. Rosengart a “makamenos daytoy nga operasion iti $1,600 iti kada pasiente.”
Intultuloy ti salaysay ti Daily News:
“Nakalkaldaang ta saan nga ekonomia wenno medisina ti nangidagadag iti baro nga operasion, no di ket ti narelihiosuan a panagregget. Ti kagimongan dagiti Saksi ni Jehova—nga iparit ti pammatida ti panagpayalison—ti mangsapsapul iti tulong agpaay kadagiti nataengan a miembro nga apektaran ti sakit ti puso. . . .
“Iti panangidagadag ti kagimongan dagiti Saksi ni Jehova, pinagkaykaysa dagiti doktor ti pamay-anda a mangsalbar iti dara babaen kadagiti kabbaro nga agas. Nakatakuatda pay iti baro a pamay-an a mangusar iti kadawyan a heart ken lung machine tapno agbiag latta dagiti pasiente kabayatan ti pannakaopera ti puso.
“Mainayon iti 40 a pasiente a Saksi ni Jehova a mangbukel iti damo a klinikal a panagadal, inyam-ammo ti timpuyog ti New York-Cornell ti operasion iti kaaduan a pasiente iti napalabas nga innem a bulan. ‘Sipud idin, agsasaganad a nakairingpasdan iti 100 nga operasion a bypass nga awan nausar a dara ken awan natay,’ imbaga ni Krieger. Agarup 2.3% ti matay iti normal a bypass nga operasion.”
Iti sangalubongan, innayonen dagiti 102 nga ospital ti programa nga operasion nga awan mausar a dara kadagiti pasilidadda, a mamagbalin kadagitoy a nataltalged a pamay-an a panangopera a magun-odan ti kaaduan a pasiente iti intero a daga.