Agsubli ti Astrolohia!

Ti inay-ayat nga asawa ti Kinatan-okna natayen. Ti maladingitan nga ari pinaayabanna iti sanguananna ti astrologo a nangipadto iti daytoy a trahedia. Addaan iti mangpapatay a panggep, kinuna ti ari: “Agpampammarangka a nakalalaing ken adduan pannakaammo. Ibagam kaniak, anianto ti gasatmo?”

“Apo,” insungbatna, “Makitkitak a matayakto iti uneg ti tallo nga aldaw iti sanguanan ti Kinatan-okmo.” Ti dagus a panagpampanunot ti nangisalakan iti biag daytoy nga astrologo!

AGPAYSO man daytoy nga estoria wenno saan, pudno nga iyilustrarna ti kinapudno a kadagiti napalabas a siglo dagiti astrologo ti maipatpateg, uray pay kadagiti agtuturay. No maipapan ken Louis XI iti Francia, maysa a historiador ti nagsurat: “Ti bunggoy dagiti astrologo . . . ti nanggundaway iti panagbutengna​—ken ti kuartana.” Bayat ti maika-15 ken maika-16 a siglo, ti kinalatak ti astrolohia nagtenganna ti kangitingitanna idiay Europa. Uray pay dagiti nalalatak a sientista mamatida iti dayta.

Ti lumlumgak a bituen iti astrolohia, nupay kasta, di nagbayag nangrugin a matnag. “Iti maminsan laeng a panangmatmat iti teleskopio,” kuna ti libro nga Astrology​—The Celestial Mirror, “ket ti intero a panagadal iti isuamin nga uniberso mapukawen. . . . Ti astrolohia ti impuera ti umad-adu nga autoridad dagiti sientipiko a panagrason.” Dagiti Europeo nga unibersidad ti nanglapped iti dayta. Ket iti panaglabas ti maika-20 a siglo, ti historiador a ni Bouché-Leclercq dineskribirna ti Makinlaud nga astrolohia a kas “naan-anay a natayen.”

Nasurok a 30 a tawtawenen a napalabas, maysa a panagsaludsod ni Gallup idiay Inglatera ti nangipalgak nga 6 laeng a porsiento kadagidiay napagsaludsodan ti mamati iti astrolohia. Ita 80 porsiento ti mamatin! Ket dagiti magasin, programa iti TV, ken dagiti pagiwarnak ipadamagda ti umad-adu a panaginteres iti astrolohia kadagiti dadduma a pagpagilian. “Ti umuna a banag a basaek no maawatkon ti diariok,” kuna ti maysa a lalaki a taga Sud Africa iti koresponsal ti Agriingkayo!, “isu dagiti bitbituen.”

Apay nga adda ti kasta a pannakaipasngay manen? Idi napagsaludsodan no apay nga isu ken dagiti dadduma agkonsultada kadagiti astrolohia, maysa nga Italiana ti simmungbat: “Adu unay a bambanag iti daytoy a lubong ti agbalbalin a dakes.” Wen, agbibiagtayo iti ‘napeggad a tiempo a narigat a pakilangenan.’ (2 Timoteo 3:1) Ket dadduma a tattao ti makarikna a ti astrolohia ti mangipaay kadakuada ti kasapulan a panangiwanwan. Ti bituen ti astrolohia ngarud ti limgak manen. Dagiti liblibro maipapan iti tema immadudan. Ti ebkas nga “Ania ti bituenmo?” nagbalinen a nalatak a mangilukat iti panagpapatang. Dadduma nga indibidual ti agkedked pay a maki-“date” no saanda nga agkabagay iti “bituen.”a

Nupay kasta, iti isuamin a kinalatakda, dagiti pammadto ti astrolohia ti kaskasdi a naibatay iti mapagduaduaan a panangipagarup: a ti naglugaran ti init, bulan ken dagiti planeta iti tiempo ti pannakaipasngay ti maysa ipalgakda agpadpada ti personalidad ken ti masanguanan ti maysa a tao. Nupay kasta, dagiti propesional nga astrologo dida agkedked a mangisurat kadagiti horoscopes a sumagmamano laeng a linea agingga iti adu a pinanid​—agpannuray iti no kasano kaadu ti kayat a pagbayad ti maysa a tao. Sigun iti magasin a Psychology Today, “minilmilion a doliar ti magasgasto maipapan iti panangipadles iti horoscopes.” Kinapudnona, ti Americano a sientista a ni John Wheeler nabiit pay a nagsennaay a ti pagilianna “mabaelanna ti maaddaan iti 20,000 nga astrologo ket maaddaan ti 2000 laeng nga astronomo.”

Nakabilbileg ti panagsubli ti astrolohia kadagiti Makinlaud a nasnasion ta ti pimmusayen a sikiatrista a ni Carl Jung nagsurat: “Kumatok iti ruangan dagiti unibersidad a nakapapanawannan agarup 300 a tawtawenen ti napalabas.” Kinapudnona, adu a Makinlaud nga unibersidad ti mangituktukonen iti kurso nga astrolohia. ‘Adda kadi kinapudno iti astrolohia?’ mabalin nga imtuoden ti maysa a tao.

[Dagiti Footnote]