Ti Astrolohia​—Di Aya Makadangran a Pagraragsakan?

NABIIT pay, ti Briton nga astronomo a ni Patrick Moore kinunana: “Kasla minamaag a panunoten a ti panagbiag ken pagtungpalan ti tengtenglen dagiti bitbituen . . . [Ti astrolohia] ket maysa laeng a di makadangran a banag a naaramidan wenno naisurat, ngem kas iti aniaman a kita iti siensia dayta ket awan ti pakaibatayanna.”

Babaen ti panangmatmat kadagiti bambanag manipud iti praktikal a panangmatmat, nupay kasta, ti maysa ti mapilit nga agkuna a ti astrolohia ket makadangran.

‘Pabasolem dagiti Bitbituen!’

Maysa kadagiti nadnadlaw a peggad isu ti kinapudno a ti astrolohia upayenna dagiti tattao a mangala iti rebbengen a maipaay kadagiti tigtignayda. Alaenyon ti panagasawa, kas pangarigan. Kuna ti maysa nga astrologo iti Sud Africa maipapan kadagiti agassawa nga addaan iti di agkabagay a horoscopes: “Imbagakon kadagiti sumagmamano a tattao a saan a naballigi ti panagasawada, a masapul nga agdiborsioda.”

Ngem usigenyo: Nainkalintegan kadi nga ipatingga ti panagasawa gapu laeng ta dagiti bitbituen ken planeta ket nagdakes ti pannakaiparisda? Saan kadi a nasaysayaat para kadagiti agassawa nga addaan iti parparikut nga ibaklayda ti rebbengenda kadagiti tigtignayda ket mangsapulda iti tulong? Ti Biblia naglaon ti adu a praktikal a balakad maipaay iti panangrisot kadagiti parparikut iti panagasawa. (Kitaenyo, kas pangarigan, ti Efeso 5:22-25.) Ket adu kadagiti nangiyaplikar iti dayta ti nakasarak iti dayta nga isu ti umiso a tulong ket naitalimengda ti panagasawada. Pudno a daytoy ti nasaysayaat ngem ti panangipabasol iti parparikut kadagiti bitbituen!

Ket ania met ngay dagiti adu a biddut a maaramidtayo iti biag? Nasalun-at kadi ti agturong iti astrolohia a maipaay iti pannakapalinteg? Sumagmamano a tawtawenen ti napalabas, maysa a lalaki manipud Miami, Florida, (E.U.A.) ti napabasol iti panagtakaw, panangrames, ken panangbugbog. Ti kalinteganna? Napan kadagiti tallo nga astrologo a nagkuna nga isut’ di makapagballigi gapu iti “saan a panagtutunos dagiti planeta.” Ti panangsurot iti daytoy a kita iti panagrason ti mangpatangken laeng iti maysa iti kurso iti panagaramid iti dakes.

Kasta met, panunotenyo no dagiti mapagpiaran a tattao, kas kadagiti nasional a papangulo, matmatanda dagiti bitbituen a maipaay iti pannakaiwanwan. Iti libro a Human Destiny​—The Psychology of Astrology, ipaay ni Gwyn Turner daytoy makapatigerger a palagip: “Dagiti Ar-ari ken Agtuturay idi napalabas kanayon nga adda iti sibayda dagiti Astrologoda ken uray pay agingga iti naladawen a tiempo a kas idi maikadua a gubat sangalubongan maysa a taga Hungaria nga Astrologo, ni Louis de Wohl, ti siuulimek nga inyempleo ti British War Office.” Isut’ nangipaay kadagiti Briton kadagiti pammadles iti panagballigi dagiti dadduma nga opisiales ken panagbiktoria kadagiti dadduma a pannakigubat. Nabaelanna pay nga imbaga iti British War Office no ania a balakad ti magunggun-odan ni Hitler manipud kadagiti astrologona sigun iti horoscopena. Dadduma ti agkuna pay nga adu a politiko ita ti mangmatmat kadagiti bitbituen a maipaay iti pannakaiwanwan.

Agparang kadi a di makadangran kadakayo a ti pangngeddeng a mangapektar iti biag ken ipapatay ti mabalin nga agpannuray iti sasaden dagiti planeta?

Iti Likudan ti Pannakabalin ti Pammadles

No dadduma dagiti pammadles ti astrolohia ti pumayso. Ngem dayta kadi ket gapu iti pannakabasa kadagiti bitbituen? Sumagmamano a tawenen a napalabas, ti pimmusayen a sikologo a ni Vernon Clark ti nangsubok iti abilidad dagiti dadduma nga astrologo. Inikkanna ida kadagiti sangapulo a kaso ket dinawatna kadagiti astrologo nga ibagayda ti tunggal maysa iti agparis a horoscope. Dagiti astrologo nakaskasdaaw ti panagballigida! Tallo nga astrologo ti nakaibagay pay a siuumiso kadakuada!

Ti Americano nga astrologo a ni Dal Lee nakagun-od iti pito manipud iti sangapulo nga umiso. Ngem ania ti gapu iti balligina? Nalawag a saan laeng a ti panagbasa kadagiti bitbituen ti nairaman. “Sinapulna ti agarup kagudua nga oras para iti astrologo a mangusig iti tunggal tema, kayatna a sawen, sangapulo nga oras amin,” kinuna ni Lee. Ngem, agsipud ta isut’ okupado iti dayta a tiempo, ni Lee “ti nangipaay laeng iti maysa a minuto iti tunggal tema.” Ngarud, aminentayo, a ti balligina “saan laeng nga iti astrolohia.” Impudno ni Lee: “Imbes ketdi patiek a dayta ti ‘extra-sensory perception.’”

Makapainteres, adu nga astrologo ti nangamin met iti panangusar iti makuna a pannakabalin ti okultismo. Daytoy ti pakaseknan dagiti tattao nga interesado a mangay-ayo iti Dios. Ta idiay Isaias 1:13, direkta a kunaen ti Dios: “Diak maanusan ti kinadangkes ken nadaeg a gimong.” Apay? Ipakita ti Biblia a dagiti tattao a mangiparangarang kadagiti pannakabalin ti pammadles ti masansan nga adda iti sidong ti panangtengngel wenno impluensia dagiti nademonioan nga espiritu a puersa. (Idiligyo iti Aramid 16:16-18.) Dagiti pammadto iti astrolohia ngarud ti mabalin a no dadduma awan kapapay-anna a kas dagiti sasao dagiti demonio​—a nakaro a kabusor iti Dios ken dagiti tattao nga agserserbi kenkuana! Ti laeng pannakadangran ti dumteng iti siasinoman nga agsapul iti panangiwanwan dagiti demonio!

Astrolohia​—Maysa a Relihion?

Dadduma nupay kasta kunaenda a ti interesda iti astrolohia ket paspasaray laeng. Ngem ti masansan a mangrugi a paspasaray a panaginteres ti mabalin nga agtungpal a kas iti narelihiusuan a debosion. Maysa a sientista a nangpirma iti naibagan nga immun-una a deklarasion a maibusor iti astrolohia kinunana: “Kadagiti dadduma, ti astrolohia di pagduaduaan a maysa a kita iti paglisian . . . Kadagiti dadduma, ti astrolohia nagbalinen a nadiosan a paltiing, maysa a puro a kinapudno​—kayatna a sawen, pudpudno a relihion.” Kunaen dagiti autoridad nga adda ti panagannayas dagiti dadduma a mangipalubos a ti pammadles ti horoscope agbalin a padpadto a matungpal a bukodda. No tenglen ti astrolohia ti maysa a tao iti kastoy, pudno a dayta nagbalinen a maysa a relihion.

Ti astrolohia aktual a nagbalin nga opisial a paset iti relihion iti Babilonia idi ugma. Ngem daytoy kadi a relihion nagpaay a pagimbaganna? Maisupadi ketdi, ti Biblia naglaon iti daytoy a pammadto a maibusor iti Babilonia idi ugma: “Nagbannogka iti kinaadu ti patigmaanmo. Tumakderka koma ita a mangisalakan kenka kadagiti bambanag a dumtengto kenka, dagiti astrologos, dagiti agpaliiw kadagiti bitbituen, dagiti agpakta iti binulanbulan.” (Isaias 47:13, Ref. Bi., footnote) Dagiti pammadles dagiti astrologo iti Babilonia saanda a naisalakan ti siudad manipud iti pannakatnagna iti agnanayon a pannakarbek.​—Isaias 13:19, 20.

Makapainteres, nupay kasta, ti relihiuso nga impluensia iti Babilonia nagtalinaed. “Manipud Babilonia,” kuna ti libro nga A History of Astrology, “dagiti Caldeo inawitda ti astrolohia idiay Egipto, ken napatpateg pay agingga idiay Grecia.”

Ti panangsurot iti relihion iti astrolohia ngarud ket napeggad. Apay? Agsipud ta sigun iti Biblia, amin a relihion a naibatay kadagiti pammati iti Babilonia ti naikeddeng a madadael. Pudno unay, ti pannakarbek ti Babilonia idi ugma itudona daytoy a masanguanan a pannakadadael. Idiay Apocalipsis 18:4, napakdaarantayo: “Rummuarkayo kenkuana [ti Binababilonia nga organisasion], O tattaok, tapno dikay mairaman kadagiti basbasolna, ken tapno saanyo nga awaten dagiti saplitna.”

Ngarud ti astrolohia saan a maibilang a ‘di makadangran a pagraragsakan.’ (Idiligyo iti Deuteronomio 18:10-12.) Ti panangsurot iti dayta ti mabalin nga umuna nga addang iti pannakatnag iti sidong ti napeggad, dinidemonio nga impluensia ken ti pannakapukaw iti pannakipagayam ti maysa iti Dios! (2 Corinto 6:17, 18) Pudno, datay amin kasapulantayo ti panangiwanwan. Ngem anian a nataltalged ken nasaysayaat ti agturong iti Biblia a maipaay iti pannakaiwanwan! (Salmo 119:105) Dagidiay a mangipangag iti Sao ti Dios makagun-odda iti praktikal a tulong iti panagballigi kadagiti parparikut iti biag, maysa a banag a di naipaay iti astrolohia.

[Ladawan iti panid 8]

Kuna ti maysa nga astrologo iti Sud Africa: “Imbagakon kadagiti sumagmamano a tattao a saan a naballigi ti panagasawada, a masapul nga agdiborsioda”

[Ladawan iti panid 9]

Ti panagpannuray ti Babilonia idi ugma iti astrolohia dina linapdan ti pannakarbekna