Agyamanak iti Adda Kaniak

Kasano a makapagballigi ti maysa a tao no dumteng ti didigra ket isut’ nagbalin a baldado? Adda kadi maipaay ti nabileg a pammati iti Dios ken dagiti karkarina a pakaidumaan? Kasano ti panagtignayto ti pamilia? Posible kadi para kadagiti amin ti mangtaginayon iti positibo a panangmatmat? Ti sumaganad isu ti estoria ti panangsaranget ti maysa a pamilia iti dayta tapno makapagballigi.

HUNIO 1, 1957, ti naudi a “normal” nga aldaw iti panagbiagko. Daytat’ nangrugi kas iti aniaman a dadduma nga aldaw. Bimmangonak a nasapa ket napanakon iti trabahok kas maysa a lumberjack (managpukan ti kayo) idiay Deer Lake, Newfoundland. Naimbag ti isuamin.

Kellaat, ti dakkel a kayo a kapukpukanko, a matumtumban, ti naiduron ti simmabet nga angin a di ninamnama a nangbaliw iti direksion ti pakatumbaanna! Naladawen ti panaglisik. Ti kayo natumba kadagiti abagak, isu a nangpasag kaniak iti daga ket naawananak iti puot. Kalpasanna, idi nakapuotak, diakon makakuti!

Naipanak idiay ospital idiay Corner Brook. Dagiti adu a panangsukimat ti nangipalgak a ti dorik ti natukkol, a makasapul iti pannakaikkat ti tallo a tulangna. Daytat’ nangparalisado kaniak manipud iti tengnged nga agpababa!

Ti Ayat Parmekenna ti Kinaawan Gaway

Narigat a panunoten ti kasta unay a kinaawan gaway ken ti pannakaupay nga iyeg ti kasta a didigra. Diak pay masagaysay ti buokko wenno mapakan ti bagik. Kinapudnona, diak pay maibaga no mabisinak!

Maysaak idi a dakkel a tao, nabileg ken naalibtak. Itan nagbalinakon nga awan gawayna a pilay. Gapuna adu a panagbalbaliw ti kasapulan tapno makapagballigi iti biag. Agingga iti ania ti mabalin a maibturan ti tao? Maammuakto pay laeng kadagiti adu a tawtawen a sumaruno.

Pulos a diak makapagballigi no saan a gapu iti naayat a panangaywan ti asawak a ni Hilda. Ti Biblia, idiay Proverbio 18:22, imtuodenna: “Siasino ti nakasarak iti naimbag nga asawa?” No kasta, kunana a dayta ti “nakasarak iti naimbag a banag.” Pudno a ti asawak maysa a bendision kaniak ken iti pamiliami nga addaan pito nga annak.

Ti inaudi kadagiti annakmi ket 18 a bulan idi maaksidenteak, gapuna idi kaaduan iti tiempo ni Hilda ti mabusbos iti panangaywan kadakuada. Kalpasanna nagbalinak a maysa kadakuada, ken ad-adda pay, ta diak makababa tapno agtaray ken agay-ayam iti aglawlaw kalpasan ti pannakadigosko ken pannakasukatko. Saan, kanayon a nakaiddaak.

Kaskasdi, addada tiempo a no dadduma makasarakak kadagiti bambanag a pakakatawaak. Kas pangarigan, masansan nga iruarnak ti asawak nga addaak iti wheelchair. Naminsan kanayonak a matumba iti sikigan ti wheelchair. Ipatugawnak manen iti nalinteg, ngem kasla diak makapaginder iti dayta nga aldaw. Kamaudiananna kinuna ni Hilda: “Lindsay, aniat’ mapaspasamak?” Naammuanmi idi makaawidkamin. Idi inikkatnak iti tugawko, adda iti tugaw a pagtugtugawak ti dakkel a lata ti polbo! Agsipud ta diakon makarikna, pulos a diak marikna dayta. Gapuna ti dagsenko ket saan a natimbeng, ket kanayon a nakasikigak iti maysa a sikigan.

Naayat a Tulong

Nupay nakarigrigat ti kasasaadko, ti ayat ni Jehova a Dios ti nangtaginayon kaniak. Balakadannatayo ti Proverbio 3:5, 6 nga ‘agtalektayo ken ni Jehova iti amin a pusotayo, ket isu iturongnanto dagiti desdestayo.’ Anian a bendision dayta, ta no saan a gapu iti ayat ni Jehova ken ti kinapudno iti Biblia, mabalin a diak koma nabaelan ti nagibtur. Ngem saan a kankanayon a nagtalekak ken ni Jehova. Kinapudnona, addada tiempo nga isut’ diak pay am-ammo.

Naipasngayak idi 1911 iti maysa a lugar a maawagan Little Catalina, Trinity Bay, Newfoundland. Gaput’ napadakkelak babaen kadagiti relihiuso a nagannak, adda panagraemko iti Biblia ket sagpaminsan a basaek dayta. Bayat ti panagbasbasak, adu a salsaludsod ti mapanunotko, kas iti: Pudno kadi a ti tao agbiag iti daga iti agnanayon, kas kunaen ti Salmo 37:29? Tapno maammuak, napanak iti padik ket inimtuodko kenkuana. Ti sungbatna ket: “Agurayka agingga a ‘mapasamak dayta’ tapno maammuam.” Dagiti ad-adu pay a saludsodko ti kasla mangriribuk kenkuana. Gapuna kinunana kaniak: “Ti parikutmo, Lindsay, a ta adu unay ti saludsodmo.”

Diak a makagun-od kadagiti sungbat agingga idi 1948 idi immakarkami iti komunidad iti Cormack. Sadiay nasabetko ni Gus Barnes ken Jack Keats, a dagitoy ket Saksi ni Jehova. Anian a ragsakko idi dagitoy a lallaki impakitada kaniak dagiti sungbat manipud iti Biblia! Napnekak iti kasta unay ta iti sumaganad a tawen nabautisaranak kas simbolo ti dedikasionko ken Jehova.

Iti dayta met laeng a tawen immakarkami manen, iti daytoy a tiempo nagpaamianankami idiay Goose Bay, Labrador, a sadiay ti nagtrabahuak a mangpaandar ti nadagsen nga alikamen. Di nagbayag idin naammuan ti nangiyempleo kaniak a maysaak kadagiti Saksi ni Jehova. Iti uneg ti dua a bulan naikkatak ket naibaga kaniak a pumanawak iti ili. Diak kayat nga aramiden daytoy. Kadagidiay nga al-aldaw maamak dagiti tattao a mangipangag iti maysa a banag a baro, uray pay no daytoy a mensahe ti laklakayen ngem isuda.

Di met nabaybay-an a di nadnadlaw dagiti annakko. Addaanda iti narikut a tiempo idiay eskuelaan agingga a dagiti polis napanda idiay eskuelaan ket impalagipda kadakuada a dagiti Saksi ni Jehova nakidangadangda ket nangabakda iti naisangsangayan unay a kaso idiay Canada maipapan iti wayawaya iti relihion. Ti banagna a ta dagiti annakko, ken ti annak dagiti dadduma a relihion, napanamnamaanda iti relihiuso a wayawaya.

Naiduman dagiti bambanag iti dayta a lugar ita. Idi 1985 maysa a napartak-pannakaibangonna a Kingdom Hall ti naibangon a maipaay iti dumakdakkel a kongregasion ti ili ni Jehova a mangiraman kadakuada iti anakko a babai.

Tulong iti Panagballigi iti Pukaw

Idi 1951 immakarkami iti ili a pagnanaedanmi pay laeng ita, ti Deer Lake. Kasapulan ti panagibtur kadagidiay a naririkut a tawtawen. Ngem mapasamak dagiti bambanag a makasapul iti ad-adda pay a panagibtur.

Ti nabayagen a kaduak iti biag, ni Hilda, nga addaan iti sakit ti puso, natay manipud iti kellaat a panagatake ti pusona idi 1963. Iti maysa a nalamiis nga aldaw, bayat ti panangbuyak manipud iti wheelchair, isut’ naibaba iti uneg ti daga. Ti mariknak a panagliday ti kasla saan a maibturan! Aniat’ aramidek itan? Naan-anay a diak maaywanan ti bagik, kasano ngarud ti panangaywanko iti pamiliak.

Ngem matalek ni Jehova, ket kanayon nga adda pamusposanna a maipaay kadatayo no agtalektayo kenkuana. (1 Corinto 10:13) Dagiti ad-adipenna, dagiti Kristiano a kakabsatko a lallaki ken babbai, ti nangipaay kaniak iti adu a liwliwa, isu a nangpabileg kaniak nga agtultuloy. Ti anakko a babai a ni Yvonne ti nangala iti rebbengen a mangaywan kaniak. Anian nga isut’ napaneknekan a bendision a maipaay kaniak!

Nupay ni Yvonne addaan iti bukod a pamilia nga aywanan, inaywananna pay laeng dagiti kasapulak. Ti kaasitgan nga ospital ket 30 milias (50 km) ti kaadayona. Mamin-adu nga ipannak ti anakko a babai sadiay tapno maagasanak. Idi kimmaro dagiti parikutko iti salun-at, mapanak iti ospital babaen iti eroplano idiay St. John’s, agarup 400 milias (640 km) ti kaadayona. Kanayon a kuyogennak ni Yvonne.

Gapu ta saanen a makapagandar ti bagik a kas ti kasapulan, no dadduma agsakitak iti serioso. Naikkat dagiti bato iti batok; ti impeksion ti masansan a makasapul iti pannakaoperak, dagiti sugsugat gapu iti kanayon a panagidda ti namagtalinaed kaniak idiay ospital iti adu a bulbulan ken iti pagiddaan iti adu pay a bulbulan, a dadduma kadagitoy a sugsugat kasapulanna ti pannakaimula dagiti kudil, dagiti parikut ti panagibleng ti nagtungpal iti colostomy; ket timmaud met ti diabetes.

Dagiti isyu maipapan iti panangyalison iti dara ti kanayon a tumaud. Ngem kamaudiananna dagiti dodoktor immanamongda a mangopera kaniak nga awan ti dara. Gapu iti kinalaingda ken pannakaseknanda, nakalasatak nga awan ti panangyalison iti dara.​—Aramid 15:29.

Ti anakko a babai ken ti asawana ken ti pamiliada inaywanandak kadagitoy amin a rigrigatko, a bumangonda iti rabii tapno aywanandak, pakanendak, digosendak, sukatandak, ipandak kadagiti Nakristianuan a gimgimong ken asamblea, a sadiay mapabilegak iti naespirituan. No dadduma addaanak pay iti paset iti programa iti asamblea. Dagiti naayat nga annak ti pudno a nabaknang a bendision manipud ken ni Jehova!​—Salmo 127:3.

Adu a Banag a Pagyamanan

Wen, addaanak kadagiti adu a bambanag a pagyamanan. Nupay no saan nga aktibo ti pisikal a bagik, alerto ti utekko, ken makasaoak. Inusarko daytoy nga abilidad a mangipakaammo iti nagan ni Jehova ken dagiti pangpanggepna kadagidiay dumngeg nga adda iti ospital​—dodoktor, dagiti nars, dagiti pasiente, dagiti bumisbisita a klero iti ospital, ken dagiti gagayyem nga umay mangkita kaniak.

Mainayon pay, addaanakon iti wheelchair a paandaren iti dua a 12-volt a bateria, isu a paandarek babaen iti switch nga adda iti pasamano. No dadduma no awanak iti tugawko, masabetko dagiti gagayyem ken kaarrubak ket addaanak pay ti gundaway a makisarita kadakuada maipapan kadagiti pangpanggep ti Dios. Agyamanak ta kabaelak nga aramiden daytoy.

Sumagmamano kadagiti annakko ti nangidedikaren kadagiti biagda ken Jehova, ket sansanayenda met dagiti annakda nga agserbi iti Dios. Daytat’ mangyeg rag-o kaniak. Ti asawak ket maysa a bautisado a managdaydayaw ken Jehova, ket ni nanangko, isu a nabautisaran idi agtawen iti 75, nagserbi ken ni Jehova agingga iti ipapatayna.

Itan ur-urayek ti aldaw inton ti ‘Dios a mismo makipagnaedto kadagiti tattao ket punasennanto ti amin a lulua kadagiti matada, ket awanton ni patay, awanto metten ti sasaibbek wenno sangsangit wenno rigrigat,’ ken inton “aglagtonto ti pilay a kas maysa nga ugsa.”​—Apocalipsis 21:3, 4; Isaias 35:5, 6.

Iti dayta a tiempo ti naan-anay a talna saknapannanto ti daga, ket dagidiay nga agpaituray iti Dios apitendanto dagiti gunggona. Ikari ti Biblia: “Dagiti naemma tawidendanto ti daga, ket maay-ayatandanto iti kinaruay ti talna.” Iti kasano kabayag? “Ti sililinteg tawidennanto ti daga, ket agtaengto kenkuana nga agnanayon.”​—Salmo 37:11, 29; 72:7.

Dagidiay dagiti nakaskasdaaw a bambanag nga inanamaentayo. Ket naan-anayton ti ragsakko inton, iti baro a sistema ni Jehova, uray ‘dagidiay natay nga adda kadagiti pakalaglagipan a tanem rummuardanto.’​—Juan 5:28, 29.

Bayat ti panagiddak nga inaldaw ditoy, addaanak ti gundaway a mangrepaso iti panagbiagko ket kitaek no nagunggonaanak iti aniaman a pamay-an. Makunak nga awan ti panagkedked a nagunggonaanak iti adu unay. Rimmang-ay ti espiritualidadko. Nasursurok ti agpannuray ken ni Jehova iti kasta unay. Imbes nga agreklamo maipapan iti kasasaadko iti biag wenno iti mabalin a pagkurangak, nasursurok nga inapresiar ti adda kaniak. Ket ti panangapresiarko iti naayat a pamiliak ti pudno a rimmang-ay.

Gapuna pudno nga agyamanak iti adda kaniak ita, ket inanamaekto ti kaitungpalan iti nakaskasdaaw a namnama nga adda iti masanguanan​—biag iti baro a sistema ti Dios. Iti kasta addaanakton ti naan-anay a salun-at. Anian a nagragsakto dayta nga aldaw!​—Kas insalaysay ni Lindsay Stead.

[Blurb iti panid 11]

Ti ipapatatay ti ingungotek nga asawa kasapulanna ti ad-adda pay a panagibtur

[Blurb iti panid 12]

Dagiti naayat nga annak ti pudno a bendision manipud ken ni Jehova