Sangalubongan a Talna​—Kasano ken Kaano?

TI SANGALUBONGAN a talna isu ti maysa kadagiti nakaay-ayat unay a tagtagainep ti tao. Ngem ti panangpanunot a dagiti natauan a gobgobierno ti mangibanag iti dayta ket maysa laeng nga arapaap. Umanamong dagiti leksion iti historia iti sipupudno a patalgedan ti Biblia: “Saan nga agtaud iti tao a magna ti panangiturong kadagiti addangna.”​—Jeremias 10:23.

Ti laeng mannakabalin a Namarsua iti uniberso, ni Jehova a Dios, ti makaiyeg iti agnanayon a talna. Ket inkarina nga aramidenna dayta. Kasano? Saan a babaen iti panangikagumaan ti tao no di ket babaen iti inaramid ni Jesu-Kristo a tema iti amin a panangisurona​—ti nailangitan a Pagarian ti Dios. (Mateo 6:9, 10) Ti Agturay dayta a Pagarian, ni Kristo Jesus, a naawagan iti padto ti pudno a “Prinsipe ti Kappia.” (Isaias 9:6) Ket ti kari ti Dios a ta iti sidong ti turay iti Pagarian, addanto ti “naruay a talna” kadagiti amin ditoy daga.​—Salmo 72:7.

Nupay kasta, nalawag nga ipakita ti Biblia a sakbay a mapasamak daytoy, daytoy agdama nga agdadangadang a sistema dagiti bambanag ti masapul a mapukaw. (1 Juan 2:15-17) Ket ipamatmat ti padto ti Biblia nga umadanin ti pannakadadaelna.​—Mateo 24:3-14, 22, 34; Lucas 21:25-28; 1 Timoteo 3:1-5.

Daytoy, ngarud, isu ti di mabalbaliwan a panggep ti Dios “isu a dina mabalin ti agulbod.” (Tito 1:2) Gapuna, saan aya a rebbeng koma nga agkararag dagiti papangulo ti relihion, nangnangruna dagidiay adda iti Kakristianuan, kadagiti karkararag a maitunos iti daytoy a panggep? Saan aya koma a rebbeng met a nagtignayda a maitunos iti dayta a panggep? Ngem, awan kadagidiay a relihiuso a pannakabagi idiay Assisi ti nangdakamat iti asidegen a panungpalan daytoy a sistema ken ti umayen a turay ti Pagarian ti Dios, ti kangrunaan a mensahe ni Jesus ken ti Sao ti Dios.

Saan a nakaskasdaaw daytoy ta dagidiay a relrelihion saanda nga insuro dagiti paspasurotda iti kinapudno maipapan iti pangpanggep ti Dios. Imbes ketdi, pasetda ti lubong nga adda iti sidong ni Satanas, ket ipampamaysada ti panangikagumaanda iti panangparang-ay iti dayta. Kas banagna, dagiti umilida nabingaybingayda, nga ikabkabilda ti pammatida nga ad-adda iti nasionalismo ngem iti Pagarian ti Dios. Daytoy ti nangiturong kadakuada nga agpipinnatay iti maysa ken maysa iti panagdadangadang daytoy a lubong. Gapuna, dagitoy a sasao agaplikarda kadagita a relrelihion: “Makikamkamalala a babbai, dikay ammo aya a ti pannakipagayam iti lubong isu ti pannakibusor iti Dios.”​—Santiago 4:4.

Gapuna, dagiti dawdawat dagitoy a relrelihion a maipaay iti kappia saan a naipangag. Ipalagipda ti kasasaad iti panawen ni mammadto a Jeremias. Idi kinuna dagiti ulbod a relihiuso a mammadto: “Talna! Talna!” Idinto nga, ‘awan ti talna’ a maipaay kadakuada.​—Jeremias 6:14.

Sangalubongan a Trabaho a Panangisuro

Kaskasdi, matungpalto ti panggep ti Dios. (Isaias 55:11) Gapuna ita maysa a sangalubongan a trabaho a panangisuro iti Biblia ti maar-aramid. Daytoy ket maitunos iti padto idiay Mateo 24:14, a kunaenna: “Ket daytoy naimbag a damag ti pagarian maikaskasabanto iti isuamin a mapagnaedan a daga a maipaay a pammaneknek kadagiti amin a nasion; ket iti kasta umayton ti panungpalan.”

Yantangay dagidiay a paset daytoy isuamin a daga a movimiento iti pudno a panagdayaw agpaiturayda kadagiti sapulen ti Dios, inikkatdan dagiti mangbingaybingay nga impluensia iti nasionalismo kadakuada. Nagbalindan a natalna a sosiedad dagiti tattao nga agayat iti maysa ken maysa ken agbiagda a maipaay iti Pagarian ti Dios. Kas banagna, tungtungpalenda ti makaparagsak a padto idiay Mikias 4, a kunaenna:

“Ngem kadagiti maud-udi nga al-aldaw maaramidto, a ti bantay ti balay ni Jehova [ti pudno a panagdayaw] maipasdekto iti tuktok dagiti bambantay [dagiti amin a dadduma a kita iti panagdayaw], . . . ket dagiti il-ili agayusdanto kenkuana. Ket adu a nasion mapandanto a kunaenda: ‘Umaykayo, ket umulitayo iti bantay ni Jehova, ken iti balay ti Dios ni Jacob; ket isuronatayto kadagiti dalanna, ket magnatayto kadagiti danana.’ . . . Ket pitpitendanto dagiti kampilanda a tadtadem ti arado, ken dagiti gayangda a komkompay a pagpukan. Ti nasion saannanto nga ilayat ti kampilan a maibusor iti sabali a nasion, ket didanto met sursuruenen ti gubat.”​—Mikias 4:1-3.

Nalawag unayen a daytoy a padto ti saan a natungpal ti panagtataripnong idiay Assisi. Dagidiay nga agay-ayus iti simboliko a bantay iti pudno a panagdayaw isuda dagiti tattao a nasursuruan iti managayat-talna a daldalan ni Jehova ken magmagna sigun iti panggepna ken dagiti kasapulanna. Dagitoy saanda a tattao nga agtalinaed iti dati a relihionda, a nabingaybingay kadagiti agsusuppiat a sursuro ken ar-aramid. Imbes ketdi, dagitoy agu-urnongda kas naipadto idiay Mikias 2:12: “Ikabilkonto ida a natiptipon a kasla karkarnero ti Bosra, kas maysa a pangen iti nagtengngaan ti pagarabanda.”

Ti nagbanagan daytoy a trabaho a panangisuro a ta nasurok a tallo a milion a tattao iti isuamin a daga ti nagbalin a manangiwaragawag iti “naimbag a damag ti Pagarian.” Nagbalinda a managayat-talna a tattao, ket iti sidong ti aniaman a kasasaad saanda a papatayen ti padada a tao. Kas naipadto idiay Mikias, pinitpitdan ‘dagiti kampilanda a pinagbalin a dingding ti arado . . . ; ket didan sursuruen ti gubat uray kaano.’ Ket adu a milion a dadduma pay nga interesado a tattao iti intero a daga ti isursuroda.

In-inanamaen dagiti Saksi ni Jehova ti agkaykaysa a baro a lubong isu a pakatungpalanto ti Mikias 4:4 kadagiti isuamin a sangatauan: “Ngem agtugawdanto tunggal maysa a tao iti sirok ti kayona nga ubas ken iti sirok ti kayona a higos; ket awanto ti mangpabuteng kadakuada; ta ti ngiwat ni Jehova dagiti [nailangitan] a buybuyot sinaona.” Sumaganad, idiay Mik 4 bersikulo 5, pinagduma ni Mikias dagidiay nga agdaydayaw kadagiti adu a didios ken dagidiay nga agdaydayaw iti maymaysa a pudno a Dios, a kunkunana: “Ta amin dagiti il-ili magnada tunggal maysa iti nagan ti diosna; ket magnatayto iti nagan ni Jehova a Diostayo iti agnanayon nga awan inggana.” Nalawag, ti nagan ti Dios ti di pulos nadakdakamat idiay Assisi. Nupay kasta, dikay kadi kayat a maammuan ti maipapan iti daytoy a Dios iti Biblia? Dagiti Saksi ni Jehova maragsakandanto a tumulong kadakayo iti daytoy.

[Ladawan iti panid 12]

Sino ti pudno a nangpitpiten kadagiti kampilanda a pinagbalinda a dingding ti arado?